បន្ទាយមានជ័យ ៖ សោកនាដកម្មគ្រោះថ្នាក់ចរាចរមួយបានកើតឡើងកាលពីយប់ម៉ោង៩ និង៣០នាទី ថ្ងៃទី ១៤ មករា ២០១២ បណ្តាលអោយនិស្សិតសាកលវិទ្យាល័យ BBU សាខាខេត្តបន្ទាយមានជ័យ៣នាក់ស្លាប់នៅនឹងកន្លែងបន្ទាប់ពីបើករថយន្តចេញពីកម្មវិធីជប់លៀងថ្ងៃខួបកំណើតមិត្តភក្តិហើយជិតដល់ផ្ទះ ក៏បើកទៅបុកផ្ទះដួល២ខ្នង ស្ថិតនៅមុខភ្នំបន្ទាយនាង ភូមិភ្នំ ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ។
បើតាមទិដ្ឋភាពកន្លែងកើតហេតុ និងប៉ូលិសចរាចរជើងគោកនៃអធិការស្រុកមង្គលបូរីបានអោយដឹងថាផ្ទះប្រជាពលរដ្ឋចំនួន២ខ្នងធ្វើអំពីឈើប្រក់ស័ង្កសី ស្ថិតនៅមុខភ្នំបន្ទាយនាង ត្រូវបានរថយន្តបាឡែនមួយគ្រឿងពាក់ស្លាកលេខ ភ្នំពេញ 2P 6494 ពណ៌ស្ករ បើកបរពីជើងទៅត្បូងបានរេចង្កូតរថយន្តទៅខាងស្តាំបុកបដាថ្នាលបណ្តុះកូនឈើរបស់មន្ទីរកសិកម្មរួចក៏ទៅបុកផ្ទះទី១អោយបាក់ខ្ទេច ហើយហោះទៅបុកផ្ទះមួយទៀតដែលមានស្ត្រីវ័យចំណាស់ម្នាក់ និងចៅស្រី ម្នាក់បណ្តាលអោយបាក់មួយកំណាត់ក្រោយផ្ទះម្ចាស់ចូលក្នុងទឹក រថយន្តខ្ទេចទាំងស្រុងជាប់នៅផ្ទះទី២ ។ នៅកន្លែង កើតហេតុគេឃើញមានបំណែករថយន្តជាចង្កូតបំពង់ស៊ីម៉ាំង កាងមុខដាច់ធ្លាក់រាយប៉ាយពេញនៅកន្លែងកើតហេតុ ។ ភ្លាមៗនោះនៅកន្លែងកើតហេតុអ្នកជិះក្នុងរថយន្ត៣នាក់ស្លាប់នៅនឹងកន្លែងមានទី១ឈ្មោះ លក្ខណា វាសនា ទី២-ឆឿង លក្ខិណា ប្រុស អាយុ ២០ឆ្នាំ , ទី៣-ថន ពិសិដ្ឋ ភេទប្រុស អ្នកទាំង៣មានទីលំនៅភូមិភ្នំ ឃុំបន្ទាយនាង ។ ដោយឡែកអ្នកទី៤ឈ្មោះ សេង ប៊ុនថាឌី មានទីលំនៅជាមួយអ្នកទាំង៣ បានរងរបួសធ្ងន់ដឹកទៅសង្គ្រោះនៅមន្ទីរពេទ្យ អ្នកទាំង៤ជានិស្សិតនៃសកលវិទ្យាល័យ BBU ខេត្តបន្ទាយមានជ័យ។
តាមការសន្និដ្ឋានរបស់ប៉ូលិសបានឲ្យដឹងថាគ្រោះថ្នាក់នេះកើតឡើងដោយសារ ការបើកលឿន ហើយស្រវឹងទើបបណ្តាល អោយបើកហោះទៅបុកផ្ទះ នាំអោយស្លាប់អ្នកក្នុងឡានយ៉ាងដូច្នេះ ប៉ុន្តែសំណាងដែរផ្ទះទី១ មិនមានមនុស្សនៅ៕ដកស្រង់ចេញពី៖ កម្ពុជាថ្មី
0 comments:
Please add comment to express your opinion, and share it on Twitter or Facebook. Thank you in advance.