Apple បន្តធ្វើការប្តឹង Samsung នៅក្នុងប្រទេសអាល្លឺម៉ង់

ជំលោះប្តឹងផ្តល់គ្នានៅមុខតុលាការរវាង Apple និង Samsung បានផ្ទុះឡើងសារជាថ្មីម្តង
ទៀតហើយបន្ទាប់ពីមានការស្ងប់ស្ងាត់អស់មួយរយៈពេលរួចមក។ ដោយឡែកលើកនេះ 
Apple បានដាក់ពាក្យបណ្តឹងថ្មីចំនួនពីរទៀតឡើងទៅកាន់តុលាការក្នុងប្រទេសអាល្លឺម៉ង់
ដោយបានធ្វើការចោទទៅលើទូរស័ព្ទ Smartphone ចំនួន ១០ប្រភេទនិងឧបករណ៍ Tablet 
ចំនួន ៥ ប្រភេទរបស់ Samsung ថាបានល្មើសលើគំរូរចនាម៉ូដរបស់ខ្លួន ។

ពាក្យបណ្តឹងនោះត្រូវបានដាក់ជូនតុលាការនៅក្នុងទីក្រុង Dusseldord ដោយ Apple បាន
ស្នើសុំអោយតុលាការធ្វើការហាមឃាត់មិនអោយ Samsung ធ្វើការដាក់លក់នៅក្នុងទីផ្សារ
ប្រទេសអាល្លឺម៉ង់នូវផលិតផលទូរស័ព្ទ Smartphone របស់ខ្លួនចំនួន ១០ប្រភេទដែលជា
ទូរស័ព្ទលេចធ្លោរបំផុតនាពេលបច្ចុប្បន្ននេះរបស់ Samsung ក្នុងនោះមានដូចជា Galaxy 
S II, Galaxy S Plus…ជាមួយនឹងគំរូឧបករណ៍ Tablet ចំនួន ៥ដែលរួមមានដូចជា Galaxy 
Tab 10.1, Galaxy Tab 10.1(…)...ជាដើម។

បណ្តឹងថ្មីនេះក៏ដូចជាបណ្តឹងនាពេលកន្លងមកដែរ Apple បានធ្វើការចោទប្រកាន់ទៅលើ 
Samsung ថាបានលួចចម្លងនូវគំរូរចនាម៉ូដពី iPad និង iPhone របស់ខ្លួនដោយចេតនា និង
យកគំរូទាំងនោះទៅរចនាម៉ូដអោយផលិតផល smartphone និង Tablet របស់ Samsung 
ដែលធ្វើអោយអតិថិជនមានការភ័ន្តច្រឡំ។

Peter Schutz អ្នកនាំពាក្យរបស់ក្រុមហ៊ុន Apple បានអោយដឹងថា៖ " Apple ជាថ្មីម្តងទៀត
បានធ្វើការកត់សំគាល់ឃើញថារាល់ផលិតផលរបស់ Samsung មើលទៅគឺមានលក្ខណៈ
ប្រហាក់ប្រហែលគ្នានឹងផលិតផលរបស់ខ្លួនខ្លាំងណាស់ ហេតុដូច្នេះក្រុមហ៊ុនត្រូវតែធ្វើពាក្យ
បណ្តឹងទៅកាន់តុលាការដើម្បីរារាំងទប់ស្កាត់រាល់ប្រការទាំងអស់នោះ"។

នេះមិនមែនជាលើកទីមួយនោះទេដែល Apple ដាក់ពាក្យបណ្តឹងប្តឹងក្រុមហ៊ុន Samsung ទៅ
កាន់តុលាការក្នុងប្រទេសអាល្លឺម៉ង់។ កាលពីឆ្នាំកន្លងទៅ Apple ក៏ធ្លាប់បានដាក់ពាក្យបណ្តឹង
ឡើងទៅតុលាការក្នុងប្រទេសនេះផងដែរដោយបានចោទប្រកាន់ Samsung ថាបានល្មើស
លើគំរូរចនារបស់ខ្លួនដែលទាក់ទងនឹងឧបករណ៍ Tablet Galaxy Tab 10.1 របស់ Samsung។ 
តុលាការអាល្លឺម៉ង់ក៏បានចេញសាលក្រមមួយដោយធ្វើការហាមឃាត់មិនអោយ Samsung 
ដាក់លក់ Tablet Galaxy Tab 10.1 នៅក្នុងប្រទេសនេះកាលពីខែតុលា ឆ្នាំកន្លងទៅ ជាហេតុ
ធ្វើអោយក្រុមហ៊ុន Samsung ត្រូវតែធ្វើការផ្លាស់ប្តូរនូវរូបរាងរចនាម៉ូដរបស់ Galaxy Tab 10.1
នេះនិងបានបញ្ចេញនូវគំរូឧបករណ៍ Tablet ថ្មីមួយទៀតមានឈ្មោះថា Galaxy Tab 10.1N 
ដើម្បីបញ្ចៀសអោយផុតពីសាលក្រមរបស់តុលាការ។ 

ជាមួយនឹងការរចនាម៉ូដថ្មីមានការផ្លាស់ប្តូរបន្តិចបន្តួចរបស់ Samsung នេះតុលាការអាល្លឺម៉ង់
ក៏បានចេញសេចក្តីសំរេចថ្មីមួយកាលពីខែធ្នូ ឆ្នាំ ២០១១ ដោយបានធ្វើការអនុញ្ញាតអោយ
សមិទ្ធិផល Galaxy Tab 10.1N អាចធ្វើចរាចរនៅក្នុងប្រទេសនេះឡើងវិញ។ ហើយនៅពេល
នេះ Galaxy Tab 10.1N គឺជាកម្មវត្ថុដែលត្រូវបាន Apple លើកឡើងនៅក្នុងពាក្យបណ្តឹងរបស់
ខ្លួនដើម្បីធ្វើការស្នើដល់តុលាការចេញសាលក្រមហាមឃាត់ការដាក់លក់នូវប្រភេទនៃផលិត
ផលនេះ។

ដោយឡែកកាលពីកំឡុងខែធ្នូ ឆ្នាំ​ ២០១១ កន្លងទៅ Apple ក៏ធ្លាប់បានទទួលបរាជ័យម្តងរួច
មកហើយនៅក្នុងជំលោះប្តឹងផ្តល់គ្នាជាមួយ Samsung ក្នុងតុលាការប្រទេសអូស្រ្តាលី គឺនៅ
បន្ទាប់ពីតុលាការប្រទេសនេះធ្វើការច្រានចោលនូវពាក្យបណ្តឹងរបស់ Apple ដែលបានស្នើ
សុំអោយតុលាការធ្វើការហាមឃាត់ Samsung មិនអោយចេញលក់ផលិតផល smartphone 
Galaxy S II របស់ខ្លួនក្នុងទីផ្សារប្រទេសនេះ។ 

អ្នកនាំពាក្យរបស់ក្រុមហ៊ុន Samsung ក៏បានធ្វើការបញ្ជាក់ថាក្រុមហ៊ុនទទួលបានពត៌មានស្តី
អំពីពាក្យបណ្តឹងថ្មីចំនួនពីរពីខាងភាគី Apple នេះផងដែរ ប៉ុន្តែអ្នកនាំពាក្យរូបនោះបានធ្វើការ
បដិសេធមិនធ្វើការបញ្ចេញមតិអ្វីជុំវិញរឿងនេះឡើយ។

បណ្តាទំនាស់ក្តីប្តឹងផ្តល់គ្នាបានអូសបន្លាយអស់រយៈពេលដ៏យូរអង្វែងនៅតាមបណ្តាប្រទេស
ជាច្រើនក្នុងពិភពលោករវាងក្រុមហ៊ុន Apple និង Samsung បានធ្វើអោយគណៈកម្មការទ្វីប
អឺរ៉ុប (EC) ផ្តោតការយកចិត្តទុកដាក់យ៉ាងខ្លាំងបំផុត។ ហើយបើយោងតាមប្រភពពត៌មានជា
ច្រើនបានអោយដឹងថា EC នឹងធ្វើយុទ្ធនាការសើបអង្កេតពិសេសរបស់ខ្លួនមួយទៅលើសិទ្ធិ
ផ្តាច់មុខរបស់ Apple និង Samsung នេះផងដែរ៕

ប្រភព៖ LATimes

Share