តាមរយៈការសិក្សារបស់លោកយេលីម សេនឃីន (Yelim Sheynkin) អ្នកជំនាញផ្នែកបស្សាវៈ (ផ្លូវនោម) ពីសាកលវិទ្យាល័យរដ្ឋញូវយ៉ក (State University of New York) សហរដ្ឋអាមេរិក បានឲ្យដឹងថា ការសិក្សាដោយវាស់សីតុណ្ហភាព របស់ថង់ពងស្វាសបុរស ២៩ នាក់ ដែលប្រើឡេបថបដាក់នៅលើភ្លៅ និងមានបន្ទះទ្រាប់ពីលើភ្លៅមួយជាន់ទៀត បានរកឃើញថា សីតុណ្ហភាពរបស់ថង់ពងស្វាស កើនឡើងយ៉ាងរហ័ស ដោយគ្រាន់តែក្នុងរយៈពេលពី ១០-១៥ នាទី សីតុណ្ហភាបានកើនឡើងខ្ពស់ជាងកម្រិតសុវត្ថិភាពទៅហើយ ដោយពួកគេមិនបានដឹងខ្លួន ។
តាមទិន្នន័យរបស់សមាគមប្រព័ន្ធបស្សាវៈ សហរដ្ឋអាមេរិកបានឲ្យដឹងថា ស្វាមីភរិយា ស្ទើរតែ ១\៦ នៅសហរដ្ឋអាមេរិក ជួបប្រទះបញ្ហាពិបាកមានកូន ដោយជាងពាក់កណ្តាលនៃចំនួននេះ បណ្តាលមកពីភាពខុសប្រក្រតីផ្នែកប្រព័ន្ធបន្តពូជបុរស ។
តាមធម្មតា ដោយសារទីតាំងពងស្វាស នៅក្រៅរាងកាយ នឹងជួយឲ្យសីតុណ្ហភាពរបស់ពងស្វាស មិនឡើងខ្ពស់ប៉ុន្មានទេ បើប្រៀបធៀបនឹងសរីរាង្គនៅក្នុងរាងកាយ ដែលមានឥទ្ធិពលច្រើន ចំពោះការផលិតមេរូបជីវិត (ស្ពែម) ។
ទោះជាយ៉ាងណា មិនទាន់មានលទ្ធផលការសិក្សាឲ្យច្បាស់លាស់នៅឡើយទេថា ឡេបថប មានឥទ្ធិពលយ៉ាងដូចម្តេច ចំពោះការបន្តពូជរបស់បុរស ហើយក៏មិនទាន់មានហេតុការណ៍ប៉ះពាល់ធ្ងន់ធ្ងរនោះដែរ ។ ប៉ុន្តែ តាមការសិក្សាមុននេះរកឃើញថា សីតុណ្ហភាពរបស់ពងស្វាស ដែលកើនឡើងសូម្បីតែ១អង្សាសេ ក៏អាចបំផ្លាញមេជីវិត (ស្ពែម) បានដែរ ។
អ្នកស្រាវជ្រាវបានរកឃើញថា ការប្រើឡេបថប ដោយដាក់លើភ្លៅ ជាពិសេសបើជើងទាំងពីរផ្អឹបជាប់គ្នា រយៈពេលយូរជាង១ម៉ោង អាចធ្វើឲ្យសីតុណ្ហភាពរបស់ពងស្វាស ឡើងដល់២,៥អង្សាសេ ។ ម្យ៉ាងទៀត ទោះបីជាយល់ថា ការប្រើបន្ទះទ្រនាប់ការពារកម្តៅ ទ្រាប់ពីក្រោមឡេបថប នឹងជួយបន្ថយសីតុណ្ហភាព ដែលអាចបញ្ជូនមកកាន់រាងកាយក្តី ប៉ុន្តែអ្នកជំនាញបានដាស់តឿនថា ឧបករណ៍នោះមិនបានជួយបន្ថយសីតុណ្ហភាពបានប៉ុន្មានទេ ។ ទោះយ៉ាងណា ចំពោះបុរសដែលអង្គុយញែកជើងចេញពីគ្នា អាចដាក់ឡេបថបលើភ្លៅបាន ដោយមានបន្ទះទ្រនាប់ការពារកម្តៅផង ទើបអាចរក្សាសីតុណ្ហភាពរបស់ពងស្វាសបាន ប៉ុន្តែក៏មិនគួរលើសពី ៣០ នាទី នោះទេ ព្រោះបើលើសពីនេះ សីតុណ្ហភាពពងស្វាស នឹងកើនឡើងហើយបំផ្លាញស្ពែម (Sperm) របស់អ្នកបាន ៕
0 comments:
Please add comment to express your opinion, and share it on Twitter or Facebook. Thank you in advance.