សហរដ្ឋអាមេរិក ប្រកាសពីកំរិត​ ការដកទណ្ឌកម្ម​ ចំពោះប្រទេសភូមា

វ៉ាស៊ីនតោន៖ កាលពីថ្ងៃចន្ទ ទី០៦ ខែកុម្ភៈ ឆ្នាំ២០១២ សហរដ្ឋអាមេរិក បានឱ្យដឹងថា ខ្លួនបានដកទណ្ឌកម្មមួយ ក្នុងចំណោម ទណ្ឌកម្មជាច្រើន ដែលប្រឆាំងនឹង រដ្ឋាភិបាលភូមា ក្នុងគោលបំណង ទទួលស្គាល់ពីកំណែទម្រង់ នយោបាយជាវិជ្ជមាន ដោយប្រទេសនេះ ធ្លាប់មានការគ្រប់គ្រង ដោយផ្ទាល់ពីសំណាក់ យោធាអស់ជាច្រើន ទសវត្សរ៍កន្លងមកនេះ។

យោងតាមសារព័ត៌មានពីគេហទំព័រ Channel News Asia បានឱ្យដឹងនៅថ្ងៃអង្គារ ទី០៧ ខែកុម្ភៈ ឆ្នាំ២០១២ នេះថា រដ្ឋមន្រ្តីក្រសួងការបរទេសអាមេរិក លោកស្រី ហ៊ីលឡារី គ្លីនតុន បានចុះហត្ថលេខា ទៅលើកិច្ច ព្រមព្រៀង មួយស្តីពីសកម្មភាព ការពារជនរងគ្រោះពីការជួញដូរមនុស្ស។ កិច្ចព្រមព្រៀង នេះ ក៏នឹងអនុញ្ញាតឱ្យ មានបេសកម្មស្រាវជ្រាវ និង ការជួយឧបត្ថម្ភផ្នែកបច្ចេក វិទ្យានៅក្នុងប្រទេសភូមាពីសំណាក់ស្ថាប័ន ហិរញ្ញវត្ថុអន្តរជាតិ ដែលមានដូចជា ធនាគារពិភពលោក ធនាគារអភិវឌ្ឍន៍អាស៊ី និង មូលនិធិហិរញ្ញវត្ថុអន្តរជាតិ IMF ជាដើម។

រដ្ឋាភិបាលបច្ចុប្បន្នរបស់ប្រទេសភូមា បានឡើងកាន់អំណាច បន្ទាប់ពីការបោះឆ្នោតនៅក្នុងខែ វិច្ឆិកា ឆ្នាំ២០១០ មក ហើយបានធ្វើឲ្យពិភពលោកមានការភ្ញាក់ផ្អើល យ៉ាងខ្លាំង ជាមួយនិងសកម្មភាពវិជ្ជមានផ្សេងៗ ដែលរួម ទាំង ការដោះលែងអ្នកទោសនយោបាយផងដែរ។

លោកស្រីរដ្ឋមន្រ្តីក្រសួងការបរទេសសហរដ្ឋអាមេរិក គឺជាមន្រ្តីជាន់ខ្ពស់ទីមួយដែលបានធ្វើទស្សនកិច្ច  នៅក្នុងប្រទេសភូមា ដែលដំណើរទស្សនកិច្ចរបស់អាមេរិកបែបនេះ បានខកខានអស់រយៈពេលច្រើនជាង  ៥០ឆ្នាំកន្លងមកនេះ៕

Share