កណ្តាល ៖ ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣ ឆ្នាំ២០១២ បានចាប់ផ្តើមតាំងពីព្រឹកព្រលឹមថ្ងៃអាទិត្យ ទី២៩ ខែមករា ឆ្នាំ២០១២ច នៅពេលដែលអ្នកតំណាងរាស្រ្តក្នុងតំណែង និង សមាជិកក្រុមប្រឹក្សាឃុំ-សង្កាត់ទាំងអស់ ដែលជាអង្គបោះឆ្នោតបានធ្វើដំណើរទៅកាន់ការិយាល័យបោះឆ្នោតរៀងៗខ្លួន ដើម្បីបំពេញកាតព្វកិច្ចដ៏ចាំចាប់នេះ។ គណបក្សប្រជាជនកម្ពុជា និង គណបក្សសម រង្ស៊ី ជាគណបក្សនយោបាយតែ២ គត់ដែលបានចូលរួមក្នុងការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣នេះ។
នៅឯមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្តាល ដែលជាភូមិភាគ ៣ ក្នុងចំ ណោមភូមិភាគទាំងអស់ ៨ នោះ សមាជិក សមាជិកាទាំងអស់ នៃអង្គបោះឆ្នោតបានបង្ហាញវត្តមាន នៅពេលដែលការិយាល័យបោះឆ្នោតបានបើកទ្វារនៅម៉ោង ៧ គត់នោះ។ សម្តេចអគ្គមហាសេនាបតីតេជោ ហ៊ុន សែន ដែលជាអ្នកតំណាងរាស្រ្តមណ្ឌលកណ្តាល បានចូលទៅកាន់ការិយាល័យបោះឆ្នោតរបស់លោក ដែលមានលេខសំគាល់ ៣០០១ ដែលអ្នកលេខរៀងទី ១ បានបោះនៅការិយាល័យគឺជាបុរសម្នាក់ដែលត្រូវជិះក្នុងរទេះរុញ។ តាមព័ត៌មានឲ្យដឹងថា គាត់គឺជាសមាជិកក្រុមប្រឹក្សាឃុំបន្ទាយដែក មកពីគណបក្ស សម រង្ស៊ី ដែលបានទទួលរងគ្រោះថ្នាក់ចរាចរកាលពីថ្ងៃទី ២៨ ខែមករា កន្លងមកនោះ។
ដោយបានរុញបុរសនោះរហូតមកដល់ខាងក្រៅបរិវេណ នៃមជ្ឈមណ្ឌលគរុកោសល្យនោះ សម្តេចតេជោនាយករដ្ឋមន្រ្តីមានប្រសាសន៍យ៉ាងខ្លីថា លោកបានបំពេញភារកិច្ចជាអ្នកតំណាងរាស្រ្តរួចហើយ។
សម្តេចអគ្គមហាពញាចក្រី ហេង សំរិន អ្នកតំណាងរាស្រ្តមណ្ឌលកំពង់ចាម ក៏បានអញ្ជើញទៅបោះឆ្នោតនៅខេត្តកំពង់ចាម ហើយសម្តេចចៅហ្វាវាំង គង់ សំអុល ឧបនាយករដ្ឋមន្រ្តី រដ្ឋមន្រ្តីព្រះបរមរាជវាំង អ្នកតំណាងរាស្រ្តមណ្ឌលកំពង់ឆ្នាំង បានអញ្ជើញទៅបោះឆ្នោតនៅខេត្តកំពង់ឆ្នាំង ក្នុងការិយាល័យដែលមានលេខរៀង ៧០០៣។
អាសនៈនៅក្នុងការបោះឆ្នោតជ្រើសតាំងសមាជិកព្រឹទ្ធសភាអាណត្តិទី ៣ ឆ្នាំ ២០១២ នេះមានទាំងអស់ចំនួន ៦១ ដែលសមាជិកព្រឹទ្ធសភាចំនួន ២ រូបត្រូវបានតែងតាំងដោយព្រះមហាក្សត្រ ចំនួន ២ រូបត្រូវបានបោះឆ្នោតជ្រើសតាំងដោយរដ្ឋសភាតាមមតិភាគច្រើនដោយប្រៀប និង ចំនួន ៥៧ រូបទៀត ត្រូវបានបោះឆ្នោតដោយអង្គបោះឆ្នោត។ អាសនៈព្រឹទ្ធសភាក្នុងនីតិកាលទី ៣ នេះសរុបមាន ៥៧ ដោយបែងចែកជា ៨ ភូមិភាគ ក្នុងនោះរួមមានភូមិភាគទី១ រាជធានីភ្នំពេញ មាន ៦ អាសនៈ ភូមិភាគទី ២ ខេត្តកំពង់ចាម មាន ៨ អាសនៈ ភូមិភាគទី៣ ខេត្តកណ្តាល មាន ៥ អាសនៈ ភូមិភាគទី៤ ខេត្តបាត់ ដំបង បន្ទាយមានជ័យ សៀមរាប ឧត្តរមានជ័យ និង ខេត្តប៉ៃលិន មាន ១០ អាសនៈ ភូមិភាគទី៥ ខេត្ត តាកែវ កំពត និង ខេត្តកែប មាន ៧ អាសនៈ ភូមិភាគទី៦ ខេត្តព្រៃវែង និង ស្វាយរៀង មាន ៧ អាសនៈ ភូមិភាគទី៧ ខេត្តកំពង់ស្ពឺ កំពង់ឆ្នាំង ពោធិ៍សាត់ កោះកុង និង ខេត្តព្រះសីហនុ មាន ៨ អាសនៈ និង ភូមិភាគទី៨ ខេត្តកំពង់ធំ ព្រះវិហារ ក្រចេះ ស្ទឹងត្រែង រតនគីរី និង ខេត្តមណ្ឌលគីរី មាន ៦ អាសនៈ។
ការបោះឆ្នោតជ្រើសតាំងសមាជិកព្រឹទ្ធសភាជាការបោះឆ្នោតអសកល ដោយប្រព្រឹត្តទៅក្នុង រយៈពេលកំណត់រៀងរាល់ ៦ ឆ្នាំម្តង។
គណៈកម្មាធិការជាតិរៀបចំការបោះឆ្នោតក៏គ្រោងនឹងធ្វើសន្និសីទសារព័ត៌មាននៅម៉ោង៤រសៀល ថ្ងៃនេះដែរ ដើម្បីបង្ហាញលទ្ធផលបឋម សម្រាប់ការបោះឆ្នោតនេះ៕ ប្រភព
0 comments:
Please add comment to express your opinion, and share it on Twitter or Facebook. Thank you in advance.