ចូល​ ប្លន់​យក​ម៉ូតូ​ដល់​ក្នុងផ្ទះ​សមត្ថកិច្ច​មូលដ្ឋាន​អះអាង​ថា​ជា​ករណី​លួច​


ភ្នំពេញ​ ៖ មានការ​ភ្ញាក់ផ្អើល​ទាំង​ព្រឹក​កាលពី​វេលា​ម៉ោង​៩​និង​៣០​នាទី​ ថ្ងៃ​ទី​១៨​ ខែមករា​ ឆ្នាំ​២០១២​ ស្ថិត​នៅ​ចំណុច​សិប្បកម្ម​ធ្វើ​ទ្វារ​បង្អួច​និង​រនាំង​ ដែល​មាន​ទីតាំង​ស្ថិត​នៅ​តាម​បណ្ដោយ​ផ្លូវ​ ឧកញ៉ា​ម៉ុង​ ឫ​ទ្ធី​ ក្នុង​សង្កាត់​ទួល​សង្កែ​ ខណ្ឌឫស្សីកែវ​ ដែល​មាន​ចម្ងាយ​ពី​រង្វង់​មូល​កាំ​កូ​ស៊ី​ធី​ជាង​១០០​ម៉ែត្រ​ ដោយ​សារ​តែ​ជនសង្ស័យ​២​នាក់​បាន​ចូល​ទៅ​គំរាម​ជន​រង​គ្រោះ​រួច​កាច់​សោ​.​ក​យក​ម៉ូតូ​ដោយ​សុវត្ថិភាព​ ។​ 
ម្ចាស់​ម៉ូតូ​ត្រូវ​បាន​គេ​ស្គាល់ឈ្មោះ​យក់​ ណា​រ៉ាត់​ អាយុ​៤០​ឆ្នាំ​ ជា​ម្ចាស់​ធ្វើ​សិប្បកម្ម​ទ្វារ​បង្អួច​ មាន​ទីលំនៅ​ផ្ទះ​លេខ​៤១៧​ សង្កាត់​ទួល​សង្កែ​ ខណ្ឌឫស្សីកែវ​ ហើយ​ម៉ូតូ​ដែល​ជនសង្ស័យ​យក​ទៅ​ដោយ​សុវត្ថិភាព​ខាងលើ​នេះ​ម៉ាក​ហុងដា​សេ​១២៥​ ពណ៌​ខ្មៅ​ ស៊េរី​ឆ្នាំ​២០១១​ មាន​ស្លាក​លេខ​ ភ្នំពេញ​ 1AX-2506 ។​
ក្នុង​សកម្មភាព​ដ៏​ព្រហើន​នេះ​គេ​បាន​ឃើញ​សមត្ថកិច្ច​ខណ្ឌឫស្សីកែវ​ បាន​ចុះ​មក​ត្រួតពិនិត្យ​ដល់​កន្លែង​កើតហេតុ​និង​ធ្វើការ​សួរនាំ​ជន​រង​គ្រោះ​ពី​ភិនភាគ​ជន​សង្ស័យ​ដែល​ធ្វើ​សកម្មភាព​យក​ម៉ូតូ​នោះ​ ។​ 
លោក​ហ៊ុយ​ ហ៊ាន​ នាយ​ប៉ុស្ដិ៍​ទួល​សង្កែ​បាន​ប្រាប់​ភ្នាក់ងារ​យក​ព័ត៌មាន​នគរវត្ដ​តាម​ទូរស័ព្ទ​កាលពី​រសៀល​ថ្ងៃ​ទី​១៨​ មក​រា​ ឆ្នាំ​២០១២​ ដោយ​លោក​បាន​បញ្ជាក់​ថា​ ករណី​ខាងលើ​នេះ​មិនមែន​ជា​ករណី​ប្លន់​ប្រដាប់​អាវុធ​ឡើយ​ គឺជា​ករណី​កាច់​សោ​.​ក​យក​ម៉ូតូ​ដោយសារ​តែ​ជន​រង​គ្រោះ​បម្រុង​នឹង​ស្រែក​ហើយ​ជនសង្ស័យ​គំរាម​ថា​បាញ់​សម្លាប់​។​ ប៉ុន្ដែ​បើ​ទោះបី​ជា​ករណី​លួច​ឬ​ប្លន់​ក៏​ដោយ​ គេ​បាន​សង្កេត​ឃើញ​ថា​នៅ​ដើមឆ្នាំ​២០១២​នេះ​ បទ​ល្មើស​បាន​កើត​ឡើងជា​ថ្មី​ម្ដងទៀត​មាន​ទាំង​ករណី​ឃាតកម្ម​ វាយ​ប្លន់​ លួច​ ឆក់​ ព្រោងព្រាត​នៅ​ក្នុង​រាជធានី​ភ្នំពេញ​ ដែល​ធ្វើ​ឱ្យ​ប្រជាពលរដ្ឋ​ក៏​ដូច​ជា​ជន​រង​គ្រោះ​មានការ​ព្រឺ​រងា​ស្ទើរតែ​រៀងរាល់ថ្ងៃ​ពី​បញ្ហា​សន្ដិសុខ​សុវត្ថិភាព​របស់​ពួក​គាត់​ ។​
ប្រជាពលរដ្ឋ​បាន​លើក​ឡើង​ថា​ នៅ​ក្នុង​រាជធានី​ភ្នំពេញ​ សមត្ថកិច្ច​មាន​រាប់​ពាន់​នាក់​តែ​ករណី​លួច​ ឆក់​ ប្លន់​ ឃាត​កម្ម​បាន​កើតឡើង​ស្ទើរតែ​រាល់ថ្ងៃ​ ដែល​បញ្ហា​ទាំង​អស់នេះ​ គឺ​ខុស​ពី​គោលការណ៍​ របស់​រាជរដ្ឋាភិបាល​ដែល​ដាក់ចុះ​ឱ្យ​អាជ្ញាធរ​មូលដ្ឋាន​ត្រូវ​ខិតខំ​ពង្រឹង​ពី​ ភូមិ​-​សង្កាត់​មាន​សុវត្ថិភាព​ ដើម្បី​ធានា​សន្ដិសុខ​ជូន​ប្រជាពលរដ្ឋ​ តែ​ផ្ទុយ​ទៅ​វិញ​បទល្មើស​ទាំងនោះ​បាន​កើត​មិន​ចេះ​ចប់​ពី​តំបន់​មួយ​ទៅ​តំបន់​មួយ​ក្នុង​រាជធានី​ភ្នំពេញ​ ។​
ចំពោះ​ករណី​ខាងលើ​នេះ​សមត្ថកិច្ច​កំពុង​តែ​ធ្វើការ​ស្រាវជ្រាវ​ដើម្បី​កំណត់​នូវ​មុខសញ្ញា​ដែល​ធ្វើ​សកម្មភាព​លួច​កាច់​សោ​.​ក​យក​ម៉ូតូ​របស់​ជន​រង​គ្រោះ​ដើម្បី​យក​មក​ឱ្យ​ច្បាប់​ផ្ដន្ទាទោស​ ៕ ប្រភព



0 comments:

Please add comment to express your opinion, and share it on Twitter or Facebook. Thank you in advance.