ការថែរក្សា​ សុដន់

សម្រាប់ស្រ្តីគ្រប់រូប សុដន់ គឺជាផ្នែកមួយយ៉ាងសំខាន់មានការ ពាក់ព័ន្ឋច្រើនចំណុចក្នុងជីវភាពរស់នៅប្រចាំថ្ងៃ ដូចជាផ្នែកមួយនៃ សម្រស់ទាក់ទាញ អាចជួយបង្កើនសេចក្តីសុខជាមួយដៃគូរួមភេទ

និងមុខងារផ្តល់ទឹកដោះចិញ្ចឹមកូន។ ការរក្សាសម្រស់ដើមទ្រូងគឺជាកង្វល់ដ៏ធំមួយរបស់ ស្រ្តីគ្រប់រូប។        លោកស្រី ហូវ ដាណា នាយិកាមជ្ឈមណ្ឌលកែសម្ផស្សប្រ៊ីតធីសាឡន នឹងជម្រាប ជូនមិត្តនារីទាំងអស់ពីវិធីថែរក្សាស្បែក និង សម្រស់សុដន់ តាមរយ:ទស្សនាវដ្តី សុខភាពយើង។       លក្ខណៈទូទៅនៃសុដន់        សុដន់ម្ខាង មានក្រពេញផលឹតទឹកដោះប្រមាណ ១៥។ ក្រពេញទាំងនេះ ភ្ជាប់ខ្លួន ទៅនឹងសាច់ដុំដើមទ្រូង តាមរយៈសរសៃពួរមួយចំនួនដែលប្រៀបបាននឹងការចងក្រៀក វាកុំឱ្យរបូតចេញពីដើមទ្រូង។ លើសពីនេះក្រពេញទាំងឡាយ ត្រូវរុំស្រោបពីក្រៅដោយ ជាលិកាខ្លាញ់ និងជាលិកាទន់។ គឺបរិមាណច្រើន ឬតិចរបស់ជាលិការទាំងពីរនេះហើយ ដែលបង្កើតឱ្យមានភាពខុស​ ពីកំណើតនូវទំហំដើមទ្រូង។ ទម្ងន់នៃគ្រប់ផ្នែករបស់សុដន់ ត្រូវធ្លាក់ស្ទើរទាំងស្រុង ទៅលើស្បែកដែលពាក់ព័ន្ឋពីក្រៅ។ ស្បែករបស់សុដន់ មិនគ្រាន់ តែផ្តល់ទិដ្ឋភាពស្រស់ខ្ចីដល់សុដន់ប៉ុណ្ណោះទេ តែវានៅមាននាទីជាអ្នកទ្រទម្ងន់មួយផ្នែក ធំរបស់សុដន់ទៀតផង ពោលវាមាននាទីប្រៀបបាននឹងអាវទ្រនាប់ធម្មជាតិ។ សរុបសេចក្តី មកសម្រស់របស់សុដន់ គឺទាក់ទងទៅនឹងគុណភាពរបស់ស្បែក ដែលរុំស្រោបតួសុដន់ គឺមានន័យថាត្រូវថែរក្សាស្បែករបស់វាឱ្យនៅស្រស់ក្មេងជារៀងរហូត ទន្ទឹមនឹងការហាត់ ប្រាណពង្រឹងកម្លាំងសាច់ដុំដើមទ្រូង។       សុដន់ដ៏ព្រហើនបានមកពីការយកចិត្តទុកដាក់        ដើម្បីឱ្យបានដើមទ្រូងដ៏ស្រស់ស្អាត​ ដែលមិនមានពីកំណើត ឬ មានស្រាប់នោះ សុភាពនារីទាំងអស់ត្រូវតែយកចិត្តទុកដាក់ទៅលើប្រការមួយចំនួនដូចជា :        1 ការថែរក្សាសុខភាពទូទៅ : ការថែរក្សាស្បែករបស់សុដន់មិនអាចដាច់ចេញពី ការថែទាំសុខភាពរាងកាយទូទៅឡើយ។ ទាក់ទងករណីនេះ គឺចាំបាច់ត្រូវទទួលទាន អាហារឱ្យមានតុល្យភាព ជាមួយសេចក្តីត្រូវការរបស់រាងកាយព្រមទាំង ទទួលទាន ដំណេកឱ្យបានគ្រប់គ្រាន់ និងមិនត្រូវភ្លេចរៀបចំការលំហែខួរក្បាល តាមវិធីផ្សេងៗ ឡើយ។        2 ការធ្វើអនាម័យ : ត្រូវមានពេលគ្រប់គ្រាន់សម្រាប់ធ្វើអនាម័យតំបន់ដើមទ្រូង ជាមួយសាប៊ូដែលមិនធ្វើឱ្យស្ងួតស្បែក។ រាល់ពេលងូតទឹកនៅពេលព្រឹកគួរប្រើផ្កាឈូក បាញ់ទឹកត្រជាក់ជុំវិញតួសុដន់ឱ្យបានយូរ ដើម្បីភ្ញោចសាច់ដុំនឹងស្បែកមុខនឹងបញ្ចប់នៃ ការងូតទឹក។        3 ការថែទាំសុដន់ : ត្រូវម៉ាស្សាជាប្រចាំលើសុដន់ ទាំងទ្វេជាមួយនឹងក្រែមផ្តល់ សំណើមស្បែកដើម្បីការពារស្បែកស្ងួត និងរក្សាភាពរស់របស់ស្បែក ព្រមទាំងជួយ សម្រួលចលនាឈាមរត់ និងចលនាទឹករងៃក្នុងសុដន់។ ក្នុងរណីនេះ ប្រសិនមាន លទ្ឋភាពគួរប្រើបន្ថែមក្រែមដែលមានអំពើរឹតបន្តឹងស្បែកឱ្យបានទៀងទាត់អមដោយ ការប្រើហ្សែល១អាទិត្យម្តង។ ក្នុងពេលមានផ្ទៃពោះ បងប្អូនស្រី្តគួរប្រយ័ត្ន ចំពោះការ ចេញសង្វារ ដោយត្រូវប្រើក្រែមការពារសង្វាជាជំនួយថែមទៀតផង។ ត្រូវឧស្សាហ៍ ច្របាច់ពិនិត្យដោយខ្លួនឯងរៀងរាល់ថ្ងៃប្រសិនមានប៉ះអ្វីប្លែកត្រូវទៅជួបពិគ្រោះជាមួយ គ្រូពេទ្យភ្លាម។        ដោយ : ប៊ុនថន វរលក្ខណ៍ អ្នកប្រឹក្សា លោកស្រី ហូវ ដាណា នាយិកា មជ្ឈមណ្ឌលកែសម្ផស្សប្រ៊ីតធីសាឡន។              ទស្សនាវដ្តីសុខភាពយើង              លេខ ០៤៥ ឆ្នាំ២០០៩-សម្រាប់ខែ តុលា

Share