កំពង់ស្ពឺៈ ប្រជាពលរដ្ឋជាង ៣០០ នាក់មកពីស្រុក ២ ផ្សេងគ្នាក្នុងខេត្តកំពង់ស្ពឺ បានប្រមូលផ្តុំគ្នានៅមុខបរិវេណនៃសាលាដំបូងខេត្តកំពង់ស្ពឺកាល ពីម្សិលមិញ ធ្វើការតវ៉ាលើករណីផ្សេងៗគ្នា។
ពលរដ្ឋមួយក្រុមតវ៉ាលើករណីតុលាការខេត្តនេះពន្យារពេលក្នុងការ ចូលខ្លួនឆ្លើយបំភ្លឺរបស់ពួកគេពាក់ព័ន្ធនឹងការចោទប្រកាន់ថា ប្រជាពលរដ្ឋប្រឆាំងនឹងការអនុវត្តសាលដីការបស់តុលាការកំពូល និងមួយក្រុមទៀត បានស្នើតុលាការដោះលែងអ្នកភូមិម្នាក់ដែលកំពុងជាប់ឃុំក្នុង ពន្ធនាគារខេត្តពាក់ព័ន្ធនឹងករណីរស់នៅលើដីជាកម្មសិទ្ធិរបស់ អ្នកដទៃ។
ពលរដ្ឋមួយក្រុមទៀត មានគ្នាប្រមាណ ១៥០ រូបមកពីឃុំត្រែងត្រយឹង ស្រុកភ្នំស្រួចបានជួបជុំគ្នា ស្នើសុំឲ្យតុលាការខេត្តពន្យល់លើការសម្រេចពន្យារពេលសាកសួរតំណាង ប្រជាពលរដ្ឋ៥រូប រីឯប្រមាណ ២០០ នាក់ទៀតមកពីឃុំអមលាំង ស្រុក ថ្ពងបានប្រមូលផ្តុំគ្នាដើម្បីទាមទារឲ្យតុលាការ ដោះលែងប្រជាពលរដ្ឋម្នាក់ ដែលកំពុងជាប់ឃុំ និងជូនតំណាងអ្នកភូមិម្នាក់ទៀត ដែលត្រូវមកឆ្លើយបំភ្លឺនៅតុលាការនាថ្ងៃ
សុក្រនេះ។
លោក ឌួង ស៊ីប៊ុនថុល តំណាងពលរដ្ឋ មកពីឃុំត្រែងត្រយឹង ថ្លែងថា ប្រជាពលរដ្ឋ តវ៉ានៅមុខតុលាការ ចង់ឲ្យព្រះរាជអាជ្ញាពន្យល់ ហេតុអ្វីគាត់លើកពេលការចូលខ្លួនឆ្លើយបំភ្លឺ ដោយពុំបានជូនដំណឹងជាមុន។ លោកបន្ថែមថា៖«ហេតុអ្វីព្រះរាជអាជ្ញា ចោទយើងថា ប្រឆាំងការអនុវត្តសាលដីកាតុលាការកំពូល? យើងគ្រាន់តែការពារដីរបស់យើងប៉ុណ្ណោះ ហេតុអ្វីយើងខុស?»។
អ្នកស្រី ញឹម ឃីម អ្នកភូមិវ័យ ៥២ ឆ្នាំម្នាក់ ថ្លែងថា អ្នកភូមិមកឆ្លើយបំភ្លឺទៅតាមការបញ្ជារបស់តុលាការ តែពួកគេ បែរជាលើកពេល ដោយពុំមានជូនដំណឹងជាមុនទៅវិញ។ អ្នកស្រីលើកឡើងថាបើអ្នកភូមិមិនមកតាមបង្គាប់ ពួកគេនឹងចេញដីកាចាប់ខ្លួនអ្នកភូមិមិនខាន។ «យើងក្រ ពួកគេអាចធ្វើអ្វីៗគ្រប់យ៉ាងមកលើយើងតាមតែពួកគេចង់។ វាអយុត្តិធម៌ខ្លាំងណាស់សម្រាប់យើង»។
អ្នកស្រីបានបន្ថែមទៀតថា អ្នកភូមិជាកសិករ ដូចនេះ ពួកគេពុំទំនេរដូចពួកមន្ត្រីទេ បើប្រជាពលរដ្ឋរវល់តែមកតុលាការ តើត្រូវរកស៊ីចិញ្ចឹមជីវិតយ៉ាងដូចម្តេច?
តំណាងអ្នកភូមិ ៥ នាក់ មកពីស្រុកភ្នំស្រួចដែលត្រូវចូលឆ្លើយបំភ្លឺកាលពីម្សិលមិញ មានអ្នកស្រី សុខ គង់ លោក ងួន ណាគ្រី លោក យីន ឆាង លោក គ្រី ថន និងលោក សេង អឿន។
ចំណែកករណីមួយទៀត លោក ផល វណ្ណៈ តំណាងពលរដ្ឋមកពីឃុំអមលាំង ដែលធ្វើដំណើរមកតុលាការខេត្ត ដោយគោយន្ត ស្នើសុំតុលាការដោះលែងអ្នកភូមិមួយរូប ដែលកំពុងជាប់ឃុំ នៅពន្ធនាគារខេត្ត បានថ្លែងថា ក្នុងនាមអ្នកភូមិដែលជាជនរងគ្រោះ ត្រូវតែគាំទ្រគ្នាទៅវិញទៅមក នៅពេលមានបញ្ហា។ លោកបានបន្តថា អ្នកទាមទារឲ្យតុលាការ ដោះលែងអ្នក ភូមិម្នាក់ ដែលត្រូវចាប់ឃុំដោយគ្មាន កំហុស។ លោកបានព្រមានថា៖«ថ្ងៃស្អែក (ថ្ងៃនេះ) បើពួកគេមិនព្រមដោះលែងនាងទេ យើងនឹងមកកាន់តែច្រើន ហើយនឹងធ្វើអ្វីមួយ»។
លោក កែវ សុភាង ព្រះរាជអាជ្ញាសាលាដំបូងខេត្ត ដែលបានចេញដីកាកោះហៅអ្នកភូមិ បានថ្លែងថា លោកមិនបានសាកសួរកាលពីម្សិលមិញ ដោយសារតែលោកបានបង្គាប់ឲ្យពួកគេចូលខ្លួននៅថ្ងៃទី ២០ និង ២១ ខែមករា តែពួកគេទើបតែមក។
លោកថ្លែងថា៖«ពាក់ព័ន្ធនឹងអ្នកភូមិអមលាំងស្នើដោះលែងប្រជាជនម្នាក់ ខ្ញុំពុំបានដឹងទេ។ ខ្ញុំនឹងពិនិត្យជាមួយចៅក្រមស៊ើបអង្កេត»។
លោក ក្លូត ពេជ្រ ប្រធានតុលាការខេត្ត បានថ្លែងថា លោកពុំបានដឹងអំពីករណីអ្នកភូមិ ស្នើឲ្យដោះលែងពលរដ្ឋម្នាក់ដែលកំពុងជាប់ឃុំក្នុងពន្ធនាគារទេ តែលោកនឹងសាកសួរចៅក្រមស៊ើបអង្កេតអំពីបញ្ហានេះ។
លោក ប៉ែន សំបូរ អភិបាលរងខេត្ត បដិសេធមិនធ្វើអត្ថាធិប្បាយពាក់ព័ន្ធនឹងសំណើរបស់អ្នកភូមិឡើយ ដោយគ្រាន់តែនិយាយថា៖«ខ្ញុំមិនដឹងអំពីបញ្ហានេះទេ។ សូមទៅសួរអភិបាលខេត្តទៅ»។
លោក ឆេង សម្ផស្ស មន្ត្រីស៊ើបអង្កេតជាន់ខ្ពស់ អង្គការលីកាដូបានថ្លែងថា មូលហេតុដែលអ្នកភូមិតវ៉ា ព្រោះតែអាជ្ញាធរចុះទៅអនុវត្តសាលដីកាតុលាការកំពូលខុសទីតាំង។ លោកថ្លែងថា៖«អាជ្ញាធរគួរតែធ្វើការស៊ើបអង្កេតបន្ថែមទៀត ទៅលើបញ្ហានោះថា តើអ្នកណាជាម្ចាស់កម្មសិទ្ធិពិតប្រាកដនៅលើដីទំនាស់នោះ»។
លោក អ៊ូច ឡេង ប្រធានកម្មវិធីដីធ្លី នៃអង្គការសិទ្ធិមនុស្សអាដហុក ថ្លែងថា ប្រជាជន ពុំមានសង្ឃឹមលើរដ្ឋាភិបាលឡើយ រដ្ឋាភិបាលពុំដែលដោះស្រាយបញ្ហាទំនាស់ដីធ្លីជូនពលរដ្ឋទេ។ លោកថ្លែងថា៖«រដ្ឋាភិបាលបង្កើតបញ្ហា តែមិនដោះស្រាយបញ្ហាឡើយ ហើយខ្ញុំមិនដែលឃើញអ្នកភូមិ ទទួលបានជោគជ័យ ក្នុងការតវ៉ារបស់ពួកគេទេ»៕ប្រភព
0 comments:
Please add comment to express your opinion, and share it on Twitter or Facebook. Thank you in advance.