លោក David Scheffer ក្នុងសន្និសីទកាសែតបង្ហាញពីជំហររបស់អង្គការសហប្រជាជាតិពីថ្ងៃពុធ។ រូបថត លីណា
ភ្នំពេញៈ មួយថ្ងៃក្រោយអ្នកជំនាញអង្គការសហប្រជាជាតិបានបញ្ជាក់ថា សហចៅក្រមស៊ើបអង្កេតបម្រុងដែលការតែងតាំងគាត់ត្រូវបានច្រានចោល ដោយអាជ្ញាធរកម្ពុជា មានអំណាចពេញលេញក្នុងការបំពេញតួនាទីនៅសាលាក្តីកាត់ទោសអតីតមេដឹកនាំខ្មែរក្រហម ត្រូវមេធាវីដើមបណ្តឹងរដ្ឋប្បវេណីមួយរូប សម្តែងក្តីព្រួយបារម្ភអំពីឥទ្ធិពលនៃបញ្ហាចម្រូងចម្រាសដែលអាចមាន លើអ្នកសុំតាំងខ្លួនជាដើមបណ្តឹងរដ្ឋប្បវេណី ក្នុងសំណុំរឿង ០០៣ និង ០០៤។
លោកមេធាវី ហុង គឹមសួន ដែលជាមេធាវីមួយរូបតំណាងដើមបណ្តឹងរដ្ឋប្បវេណីក្នុងសំណុំរឿង ០០៣ និង ០០៤ បានថ្លែងថា បញ្ហាចម្រូងចម្រាសនៅការិយាល័យនៃសហចៅក្រមស៊ើបអង្កេត នឹងធ្វើឲ្យខាតពេលវេលា ហើយអូសបន្លាយពេលដល់ដំណើរការកាត់ទោសជនសង្ស័យបន្ថែមទៀត ក្នុងតុលាការនេះដែលទីបំផុតនឹងធ្វើឲ្យជនរងគ្រោះខកចិត្ត។
លោក គឹមសួន បញ្ជាក់ថា៖«ពិតណាស់ វានឹងប៉ះពាល់ដល់ជនរងគ្រោះដែលដាក់ពាក្យបណ្តឹងធ្វើជាដើមបណ្តឹងរដ្ឋប្បវេណី»។
ក្នុងសន្និសីទកាសែតខ្លីកាលពីថ្ងៃពុធ លោក ដាវីដ សែហ្វឺ ដែលកាលពីពេលថ្មីៗនេះត្រូវបានតែងតាំងជាអ្នកជំនាញពិសេសដែល ផ្តល់ដំបូន្មានដល់គម្រោងជំនួយអង្គការសហប្រជាជាតិដល់សាលាក្តី ខ្មែរក្រហមបានថ្លែងប្រាប់អ្នកកាសែតថា សហចៅក្រមស៊ើបអង្កេតបម្រុងអន្តរជាតិ ចៅក្រម Kasper-Ansermet មានអំណាចយ៉ាងច្បាស់ក្នុងការបំពេញតួនាទីគាត់នៅសាលាក្តី នោះ។
ការិយាល័យរបស់អគ្គលេខាធិការអង្គការសហប្រជាជាតិ កាលពីថ្ងៃសុក្រសប្តាហ៍មុនបានធ្វើសេចក្តីថ្លែងការណ៍ថា ឧត្តមក្រុមប្រឹក្សានៃអង្គចៅក្រមកម្ពុជា បដិសេធមិនតែងតាំងចៅក្រម Kasper-Ansermet និងថា នេះជាការបំពានកិច្ចព្រមព្រៀងរវាងអង្គការសហប្រជាជាតិ និងរដ្ឋាភិបាលដែលបង្កើតសាលាក្តីនេះ។
ចៅក្រម Kasper-Ansermet ត្រូវបានតែងតាំងក្នុងតំណែងនេះដោយលោក បាន គីមូន អគ្គលេខាធិការអង្គការសហប្រជាជាតិក្រោយការលាលែងតំណែង ពីសហចៅក្រមស៊ើបអង្កេតបរទេស Siegfried Blunk ពីខែតុលា។
នៅខែមេសា ចៅក្រម Blunk និងសហចៅក្រមស៊ើបអង្កេតជាតិ លោក យូ ប៊ុនឡេង បានធ្វើការបិទការស៊ើបអង្កេតលើសំណុំរឿង ០០៣និង០០៤ យ៉ាងស្ងៀមស្ងាត់ ដោយត្រូវគេអះអាងថា ពុំបានធ្វើការសាកសួរជនសង្ស័យឬចុះទៅពិនិត្យទីកន្លែងចោទថាមាន ការប្រព្រឹត្តបទឧក្រិដ្ឋកម្មនោះផង។
កាលពីពេលកន្លងទៅ មន្ត្រីរដ្ឋាភិបាលបានបង្ហើបជាសាធារណៈ ពីការជំទាស់របស់ពួកគេទៅនឹងការកាត់ទោសហួសពីសំណុំរឿង ០០២។
កាលពីខែតុលា ការកែប្រែថ្មីនៃការពិចារណារបស់អង្គបុរេជំនុំជម្រះទោសលើការ ទាត់ចោលពាក្យសុំតាំងខ្លួនជាដើមបណ្តឹងរដ្ឋប្បវេណីរបស់លោក Rob Hamill សហចៅក្រមអន្តរជាតិ Rowan Downing និង Katinka Lahuis បានទទួលស្គាល់ថា សហចៅក្រម Blunk និងលោក យូ ប៊ុនឡេង បានបដិសេធមិនទទួលស្គាល់មេធាវីដើមបណ្តឹងរដ្ឋប្បវេណី ក្នុងសំណុំរឿង ០០៣ ហើយមិនអើពើ នឹងសំណើសុំពិនិត្យសំណុំឯកសារទៀតផង។
សហព្រះរាជអាជ្ញាអន្តរជាតិ លោក Andrew Cayley បានថ្លែងពីថ្ងៃម្សិលមិញថា ដោយមានការលើកលែងមួយចំនួននិងអាស្រ័យទៅតាមនីតិវិធីមិនចុះសម្រុងគ្នាក្រោមកិច្ចព្រម ព្រៀង និងបទបញ្ជាតុលាការ សហចៅក្រមស៊ើបអង្កេតអន្តរជាតិអាចបន្តការស៊ើបអង្កេតទាំងនេះ ទាំងករណី០០៣និង០០៤តទៅទៀត។
អ្នកស្រី Anne Heindel ទីប្រឹក្សាច្បាប់នៃមជ្ឈមណ្ឌលឯកសារកម្ពុជាបានថ្លែងថា វាអាចលំបាកសម្រាប់ចៅក្រម Kasper-Ansermet ក្នុងការធ្វើការស៊ើបអង្កេតប្រកបដោយប្រសិទ្ធភាព។
អ្នកស្រីថា ៖ «វាមានដែនកំណត់ផ្នែកច្បាប់លើអ្វីដែលគាត់អាចធ្វើបានតែម្នាក់ ឯង ហើយវាមានដែនកំណត់ក្នុងការអនុវត្តលើអ្វីដែលគាត់អាចធ្វើដោយ គ្មានការគាំទ្រពីភាគីកម្ពុជានៅក្នុងការិយាល័យរបស់គាត់»។
លោក នេត្រ ភក្ត្រា អ្នកនាំពាក្យសាលាក្តីកាលពីម្សិលមិញបានថ្លែងថា មានជនរងគ្រោះចំនួន ៣១៨ នាក់បានដាក់ពាក្យសុំតាំងខ្លួនជាដើមបណ្តឹងរដ្ឋប្បវេណីក្នុង សំណុំរឿង ០០៣ និង ០០៤ ដែលពួកគេមួយចំនួនត្រូវបានទទួលឲ្យធ្វើជាដើមបណ្តឹងរដ្ឋប្បវេណី ក្នុងករណី ០០២ រួចហើយ៕ប្រភព
0 comments:
Please add comment to express your opinion, and share it on Twitter or Facebook. Thank you in advance.