លោក ហ៊ុន ម៉ានិត (ឆ្វេង) និង លោក ហ៊ុន ម៉ាណែត កាលពីកន្លងមក។ ជីវ័ន
ភ្នំពេញៈ លោក ហ៊ុន ម៉ានិត កូនច្បងទី ២ របស់លោកនាយករដ្ឋមន្រ្តី ហ៊ុន សែន ត្រូវបានតែងតាំង ជានាយករង នាយកដ្ឋានស្រាវជ្រាវចារកិច្ច កាលពីថ្ងៃសៅរ៍ គឺប្រហែល ១ សប្តាហ៍ បន្ទាប់ពីប្រធាននាយកដ្ឋានស្រាវជ្រាវចារកិច្ច នៃកងយោធពលខេមរភូមិន្ទ បានទទួលមរណភាព។
ទន្ទឹមនឹងនេះ លោកឧត្តមសេនីយ៍ ជា តារា អគ្គមេបញ្ជាការរង នៃកងយោធពលខេមរភូមិន្ទ និងជាប្រធានគណៈបញ្ជាការសមរភូមិព្រំដែនជួរមុខ ត្រូវបានតែងតាំង ជាប្រធាននាយកដ្ឋានស្រាវជ្រាវចារកិច្ច ជំនួសលោកឧត្តមសេនីយ មល់ រឿប អតីតប្រធាននាយកដ្ឋានស្រាវជ្រាវចារកិច្ច ដែលស្លាប់កាលពីថ្ងៃទី ១២ មករា ដោយសារជំងឺទឹកនោមផ្អែម និងជំងឺគាំងបេះដូង ក្នុងជន្មាយុ ៦២ ឆ្នាំ។
លោក មល់ រឿប ជាឥស្សរជនកងទ័ពសំខាន់ម្នាក់ និងជាមនុស្សជំនិតរបស់លោក ហ៊ុន សែន ក្នុងប៉ុន្មានទស្សវត្សរ៍កន្លងមកនេះ ប៉ុន្តែលោក ម៉ល់ រឿប ត្រូវបានមជ្ឈដ្ឋានមួយចំនួន ចោទថា បានប្រព្រឹត្តអំពើរំលោភសិទិ្ធមនុស្សយ៉ាងធ្ងន់ធ្ងរ ដោយសារតួនាទីរបស់លោក ក្នុងអំពើវាយប្រហារឆ្នាំ ១៩៩៧ រវាងកម្លាំងគណបក្សប្រជាជនកម្ពុជា និងគណបក្សហ៊្វុនស៊ិនប៉ិច។
លោកឧត្តមសេនីយ ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ បានថ្លែងក្នុងពិធីតែងតាំង នៅទីបញ្ជាការកងយោធពលខេមរភូមិន្ទ កាលពីថ្ងៃទី ១៤ មករាថា ការតែងតាំងនេះ បានធ្វើឡើង ដោយផ្អែកលើបទពិសោធន៍បញ្ជាកងទ័ព។ លោកថ្លែងថា៖ «ស្ថាប័នទាំងពីរ ដែលមានការតែងតាំង ប្រធានដឹកនាំថ្មីនេះ ពិសេស នាយកដ្ឋានស្រាវជ្រាវចារកម្មយោធា មានភារកិច្ចសំខាន់បំផុត ដែលមិនអាចខ្វះបាន ជាសសរទ្រូង ជាខ្នងបង្អែកដ៏រឹងមាំរបស់ប្រទេសជាតិ ដែលទាមទារឲ្យមានអ្នកដឹកនាំ អ្នកគ្រប់គ្រង ប្រកបដោយវិជ្ជាជីវៈខ្ពស់ និងមានបទពិសោធន៍ ក្នុងកិច្ចសហការទាំងថ្នាក់ជាតិនិងអន្តរជាតិ»។
លោក ហ៊ុន ម៉ានិត អាយុ ៣០ ឆ្នាំ ជាកូនច្បងទី ២ របស់លោក ហ៊ុន សែន។ កូនច្បងទី ១ គឺលោក ហ៊ុន ម៉ាណែត អាយុ ៣៤ ឆ្នាំ បច្ចុប្បន្ន មានតំណែងឧត្តមសេនីយទោ និងជាអគ្គមេបញ្ជាការរង នៃកងថ្មើរជើង និងជាមេបញ្ជាការរង អង្គភាពអង្គរក្សរបស់លោក ហ៊ុន សែន ព្រមទាំងជាប្រធានអង្គភាពប្រឆាំងអំពើភេវរកម្ម។
លោកឧត្តមសេនីយទោម្នាក់ទៀត គឺលោក សៀក សុជាតិ ជាអនុប្រធានគណៈបញ្ជាការឯកភាពសមរភូមិមុខ ទិសយោធ ភូមិភាគទី៤ទទួលមុខងារបន្ថែម ជានាយកទីចាត់ការព្រំដែន នៃអគ្គបញ្ជាការដ្ឋាន៕ TK
0 comments:
Please add comment to express your opinion, and share it on Twitter or Facebook. Thank you in advance.