ក្រុងញូវយ៉ក : នេះជាដំណឹងល្អមួយសម្រាប់មនុស្សចាស់ដែលចូលចិត្តហែលទឹក។ ការសិក្សាថ្មីបានរកឃើញថា កីឡានេះអាចសម្រួលដល់សម្ពាធឈាម។
ក្រុមអ្នកស្រាវជ្រាវបានសង្កេតឃើញថា ក្នុងចំណោមមនុស្សចាស់ប្រុសស្រី៤៣នាក់ អ្នកដែលហែលទឹក២-៣ដងក្នុងមួយសប្ដាហ៍ អាចកាត់បន្ថយការឡើងសម្ពាធឈាមខុសប្រក្រតី។
សម្ពាធឈាមរបស់មនុស្សចាស់បានធ្លាក់ចុះពី ១៣១ mm Hg (មិល្លីម៉ែត្រនៃបារត) មកត្រឹម ១២២ mm Hg ក្រោយពីពួកគេអនុវត្តហែលទឹក២-៣ដងក្នុងមួយសប្ដាហ៍ អស់រយៈពេល៣ខែ។
ជាទូទៅ សម្ពាធឈាមប្រក្រតីគួរស្ថិតក្នុងចន្លោះពី ១២០/៨០ mm Hg។ រង្វាស់ ១៤០/៨០ mm Hg ឬខ្ពស់ជាងនេះ ត្រូវបានចាត់ទុកថាលើសឈាម។
ជាយូរណាស់មកហើយ ការហែលទឹកត្រូវបានចាត់ទុកជាកីឡាដែលសមស្របសម្រាប់មនុស្សចាស់ ដោយសារតែវាងាយស្រួលក្នុងការបត់បែនរាងកាយ សន្លាក់ និងមិនបង្កើនកម្ដៅរាងកាយ។
លោក ហ៊ីរ៉ូហ្វូមី តាណាកា (Hirofumi Tanaka) ជាអ្នកស្រាវជ្រាវជាន់ខ្ពស់នៃសាកលវិទ្យាល័យតិចសាស់ ដែលដឹកនាំការសិក្សា បានណែនាំថា ការហែលទឹកគឺជាជម្រើសទី២សម្រាប់មនុស្សចាស់ បន្ទាប់ពីលំហាត់ប្រាណដើរ៕
0 comments:
Please add comment to express your opinion, and share it on Twitter or Facebook. Thank you in advance.