ភ្នំពេញៈ មន្ត្រីពាក់ព័ន្ធឲ្យដឹងថា បន្ទាប់ពីទិន្នផលកៅស៊ូនៅកម្ពុជាបានកើនឡើង ជាមួយនឹងតម្រូវការកាន់តែច្រើនពីទីផ្សារសកល សាកលវិទ្យាល័យភូមិន្ទកសិកម្ម នឹងបង្កើតមហាវិទ្យាល័យកៅស៊ូនៅពាក់កណ្តាលឆ្នាំនេះ។
មន្ត្រីនិយាយថា គំនិតផ្តួចផ្តើមនេះត្រូវបានស្នើដោយរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីឆ្នាំមុន ដើម្បីឲ្យស្របទៅនឹងការកើនឡើងដំណាំកៅស៊ូ ក្នុងរយៈពេលប៉ុន្មានឆ្នាំចុងក្រោយនេះ។
លោក ង៉ោ ប៊ុនថន សាកលវិទ្យាធិការនៃសាកលវិទ្យាល័យភូមិន្ទកសិកម្មមានប្រសាសន៍ថា៖ «យើងចង់បង្កើតធនធានមនុស្សឲ្យបានកាន់តែច្រើនដើម្បីឲ្យពួកគេ មានសមត្ថភាពអាចធ្វើការនៅក្នុងឧស្សាហកម្មនេះ»។
លោកបន្តថា ទោះបីនៅពេលនេះមានអ្នកជំនាញជាច្រើនហើយក៏ដោយ ប៉ុន្តែអ្នកទាំងនោះ ភាគច្រើន មានវ័យចំណាស់។ លោកបានបន្ថែមថា៖ «យើងបានកត់សម្គាល់ឃើញថា ក្រុមហ៊ុនវិនិយោគទុនក្នុងស្រុក និងក្រៅស្រុកដែលកំពុងវិនិយោគលើចម្ការកៅស៊ូ បានកំពុងទទួលទិន្នផលកើនឡើងស្របពេលដែលការប្រើប្រាស់កៅស៊ូលើពិភពលោកកំពុងកើនឡើង ប៉ុន្តែធនធានមនុស្សដើម្បីបម្រើក្នុងវិស័យនេះនៅមានការខ្វះខាតនៅឡើយ»។
លោកបន្តថា តាមមុខវិជ្ជាផ្នែកកៅស៊ូ មានស្រាប់ទៅហើយនៅសាកលវិទ្យាល័យនេះ ប៉ុន្តែវាគ្រាន់តែជាផ្នែកតូចប៉ុណ្ណោះ។
លោកបានបន្ថែមថា សាកលវិទ្យាល័យតម្រូវឲ្យមានមហាវិទ្យាល័យកៅស៊ូមួយដាច់ដោយឡែក ដើម្បីឲ្យកាន់តែជាក់លាក់ក្នុងឧស្សាហកម្មនេះ។ លោកថ្លែងថា សេចក្តីព្រាងកម្មវិធីសិក្សាត្រូវបានធ្វើរួចរាល់ហើយ បន្ទាប់ពីបានជួបជាមួយអ្នកជំនាញ។
សាកលវិទ្យាល័យ សហការ ជាមួយអគ្គនាយកដ្ឋានកៅស៊ូ និងវិទ្យាស្ថានស្រាវជ្រាវកៅស៊ូ ដើម្បីផ្តល់យោបល់ និងការពិសោធកៅស៊ូ ដល់អ្នកជំនាញ។ លោកបានលើកឡើងថា៖ «ដូច្នេះ យើងអាចបណ្តុះនិស្សិតទើបនឹងបញ្ចប់ការសិក្សាដែលមានសមត្ថភាពពិតប្រាកដ»។ លោកបន្ថែមថា៖ «យើងសង្ឃឹមថា មហាវិទ្យាល័យនេះ នឹងបង្កើតឡើងពាក់កណ្តាលឆ្នាំនេះ ដោយសារយើងកំពុងត្រៀមរៀបចំ បញ្ជូនសំណើនេះ ទៅកាន់លោកនាយករដ្ឋមន្ត្រី ដើម្បីអនុម័តសម្រេច»។
កម្ពុជាសង្ឃឹមថានឹងក្លាយជាប្រទេសមួយ ក្នុងចំណោមប្រទេសដាំកៅស៊ូច្រើនជាងគេទាំង១១ប្រទេស នៅក្នុងសមាគមប្រទេសដាំកៅស៊ូ (ANRPC) ក្នុងរយៈពេលប៉ុន្មានឆ្នាំក្រោយ។ នេះបើតាមសេចក្តីប្រកាសព័ត៌មានដែលភ្នំពេញ ប៉ុស្តិ៍ទទួលបានកាលពីចុងខែធ្នូ។
លោក លី ផល្លា អគ្គនាយកនៃអគ្គនាយកដ្ឋានកៅស៊ូ មិនអាចទាក់ទងបានទេ។ ទោះបីយ៉ាងនេះក្តី លោកបានឲ្យដឹងកាលពីលើកមុនថា ការដាំកៅស៊ូបានកើនឡើងប្រមាណ ៣០ភាគរយ ពីឆ្នាំ២០០៩ ដល់២០១០ ពោលបានកើនពី ១៣៦ ១០៧ហិកតា រហូតដល់១៨១ ៤០០ហិកតា និងកើន២១ហិកតា នៅ២០១១។
ផ្ទៃដីប្រហែល៤៥ភាគរយ បានមកពីកសិករដែលមានដីដាំកៅស៊ូតិចតួច ហើយ២៩ភាគរយ បានមកពីដីសម្បទានសេដ្ឋកិច្ច និង ២៦ភាគរយ បានមកពីចម្ការកៅស៊ូកសិ-ឧស្សាហកម្ម។
លោក លី ផល្លា ឲ្យដឹងថា កាលពី២០១០ មានកៅស៊ូតែ ២០ភាគរយប៉ុណ្ណោះ ត្រូវបានចៀរយកជ័រ ដោយសារដើមកៅស៊ូថ្មីៗត្រូវការពេលវេលាលូតលាស់។
លោក លឹម ស៊ុនលាង ម្ចាស់ចម្ការកៅស៊ូមេមត់ នៅខេត្តកំពង់ចាម គាំទ្រការសម្រេចចិត្តបង្កើតមហាវិទ្យាល័យកៅស៊ូថ្មីនេះ។ លោក ថ្លែងថា៖ «នោះជាការល្អដល់ការអភិវឌ្ឍធនធានមនុស្សសម្រាប់ដំណាំកៅស៊ូដែល កំពុងរីកចម្រើនយ៉ាងខ្លាំង ជាពិសេសដោយសារកំណើនតម្រូវការកៅស៊ូនៅលើពិភពលោក ខណៈដែលយើងកំពុងកង្វះធនធានមនុស្ស និងអ្នកជំនាញក្នុងវិស័យនោះ»។
លោក ស៊ុនលាង បានដាំកៅស៊ូជាង៦ពាន់ហិកតា ក្នុងនោះ ៣ពាន់ហិកតានឹងត្រូវចៀរយកជ័រ នៅឆ្នាំនេះ។ លោកមានគម្រោងពង្រីកចម្ការកៅស៊ូ រហូតដល់ជាង ៩ពាន់ហិកតា ដោយផលកៅស៊ូភាគច្រើន លោកនឹងបន្តនាំចេញទៅប្រទេសវៀតណាម សិង្ហបុរី និងម៉ាឡេស៊ី។
គោលដៅរបស់រដ្ឋាភិបាលកម្ពុជា គឺបង្កើនផ្ទៃដីដាំកៅស៊ូ រហូតដល់៣០ម៉ឺនហិកតា ដែលអាចទទួលបានបរិមាណផលសរុបប្រហែល ២៩ម៉ឺនតោន នៅត្រឹមឆ្នាំ២០២០។ នេះបើតាមលោក លី ផល្លា។
ទិន្នន័យជាផ្លូវការដែលទទួលបានពីក្រសួងពាណិជ្ជកម្ម បានបង្ហាញថា ការនាំចេញកៅស៊ូ កាលពីឆ្នាំ២០១១ មានចំនួនសរុប ៤៦ ៧២៧តោន បើគិតជាទឹកប្រាក់ ២០០,៩លានដុល្លារ។ កាលពីឆ្នាំ២០១០ មានត្រឹមតែ ៣០ ០៤០តោន គិតជាទឹកប្រាក់ ៨៦,៧៦លានដុល្លារ៕ប្រភព
0 comments:
Please add comment to express your opinion, and share it on Twitter or Facebook. Thank you in advance.