24hPlus

ពោធិ៍សាត់ ៖ ក្រុមការងារ របស់អាជ្ញាធរបឹងទន្លេសាប ដឹកនាំដោយលោក ចាន់ យុត្ថា នាយខុទ្ទកាល័យក្រសួង ធនធានទឹក និងជាអគ្គលេខាធិការ អាជ្ញាធរបឹងទន្លេសាប បានបន្ដប្រតិបត្ដិការ ចុះបង្ក្រាបបទល្មើសនេសាទ នៅក្នុងឃុំកញ្ជរ ស្រុកកណ្ដៀង ខេត្ដពោធិ៍សាត់ នៅថ្ងៃទី១០ ខែមករា ឆ្នាំ២០១២ នេះ ដែលជាថ្ងៃទីបួន នៃប្រតិបត្ដិការដ៏ក្ដៅគគុក ក្នុងការបង្ក្រាបបទល្មើស នេសាទ ឱ្យអស់ពីផ្ទៃបឹងទន្លេសាប តាមបទបញ្ជារបស់នាយករដ្ឋមន្ដ្រី ។

ប្រតិបត្ដិការដែលធ្វើឡើង នៅព្រឹកនេះ ក៏មានការចូលរួម ពីអាជ្ញាធរស្រុកកណ្ដៀង ដឹកនាំដោយលោកអភិបាលស្រុក និងមាន ការចូលរួមពីសហគមន៍នេសាទ ស្រីចឹកផងដែរ ។

លោក ចាន់ យុត្ថា បានថ្លែងឱ្យដឹងថា បទល្មើសនេសាទត្រូវបានរកឃើញ មួយចំនួនធំ នៅតំបន់ខាងលើនេះ ដូចជា ប្រភេទ ណរ៉ាវ ជាដើម ដែលមានប្រវែងរហូតដល់ ១០គីឡូម៉ែត្រ ហើយក្រុមការងាររបស់លោក បាន និងកំពុងរុះរើ ដើម្បីធ្វើការដុតបំផ្លាញចោល ៕