ភ្នំពេញៈ តារាសម្តែង និងម៉ូដែល លី ម៉ារីណា បានប្រាប់ ភ្នំពេញ ប៉ុស្តិ៍ កាលពីមុននេះពីការប្រកាសលាឈប់ពីសិល្បៈ ហើយនាងនឹងវេចបង្វេចឡើងយន្តហោះតាមស្វាមីទៅកាន់សហរដ្ឋអាមេរិក នៅដើមខែនេះ។ ប៉ុន្តែសម្តីចេញពីមាត់របស់តារារូបនេះមិនទាន់នឹងធ្លាក់ដល់ដី ផង បែរជាមានជនអនាមិកម្នាក់បានផ្ញើសារមកកាន់ ភ្នំពេញ ប៉ុស្តិ៍ ដោយបានប្រើពាក្យជេរប្រមាថយ៉ាងធ្ងន់ធ្ងរមិនអាចទទួលយកបាន ហើយថែមទាំងបានគំរាមបាញ់សម្លាប់តារាម៉ូដែលរូបនេះទៀតផង។ ទន្ទឹមនឹងគ្នានេះមិនទាន់មានប្រភពណាមួយអាចបញ្ជាក់ថា លី ម៉ារីណា ស្ថិតនៅទីណាឲ្យបានប្រាកដនោះទេ។ តែបើតាមប្រភពមួយបានបញ្ជាក់ថា តារារូបនេះលាក់ខ្លួននៅទីក្រុងបាងកកប្រទេសថៃ។
ទន្ទឹមនឹងការបាត់ខ្លួន លី ម៉ារីណា ដោយមិនអាចបញ្ជាក់បានថា នាងទៅរស់នៅសហរដ្ឋអាមេរិកតាមស្វាមីមែន ឬយ៉ាងណានោះ កាលពីថ្ងៃទី១៥ ខែមករា ឆ្នាំ២០១២ ភ្នំពេញ ប៉ុស្តិ៍ បានទទួលសារដ៏មិននឹកស្មានមួយពាក់ព័ន្ធនឹងតារាសម្តែងរូបស្រស់ អ្នកនាងលី ម៉ារីណា ដែលអត្ថន័យនៅក្នុងសារនោះជាការប្រមាថហែកកេរ្តិ៍ខ្មាស និងការខឹងសម្បាររហូតឈានដល់ការគំរាមបាញ់សម្លាប់តារារូបនេះ ទៀតផង។ តើជនអនាមិកនោះជាអ្នកណា? ហេតុអ្វីបានជាជេរប្រមាថ និងមានកំហឹងចង់បាញ់សម្លាប់ លី ម៉ារីណា យ៉ាងសាហាវ ហាក់បីដូចប្រទេសគ្មានច្បាប់បែបនេះ?
សារដែលភ្នំពេញ ប៉ុស្តិ៍ ទទួលបាននោះ ត្រូវបានសរសេរឡើងដោយប្រើអក្សរឡាតាំងប្រកបជាភាសាខ្មែរជាមួយនឹង ភាសាអសុរោះបំផុតដែលភ្នំពេញ ប៉ុស្តិ៍ មិនអាចនឹងយកមកចុះផ្សាយទាំងស្រុងបានទេ ព្រោះនឹងអាចបណ្តាលឲ្យខូចកិត្តិយស កេរ្តិ៍ឈ្មោះ និងភាពថ្លៃថ្នូរយ៉ាងធ្ងន់ធ្ងរចំពោះតារារូបនេះ។
ក៏ប៉ុន្តែដើម្បីបញ្ជាក់ពីភាពជាក់ស្តែង ភ្នំពេញ ប៉ុស្តិ៍ សូមលើកយកនូវពាក្យពេចន៍ស្រាលៗនៅក្បាលដំបូងនៃសារនោះ សរសេរជាអក្សរឡាតាំងដែលបាននិយាយថា៖ «Mi Lymaryna mi Dara thok teap mi zhor ke banh mi sampheng Lymaryna (khna) mi gnaing zit trow kriob kam phleng hoi...»។ សម្តីជេរប្រមាថនេះ ត្រូវបាន ភ្នំពេញ ប៉ុស្តិ៍ សរសេរសម្រួលជាភាសាខ្មែរថា៖ «មី លី ម៉ារីណា មី តារាថោកទាប មីចោរគេបាញ់ មី សំផឹង លី ម៉ារីណា (ខ្នា) មី ង៉ែង ជិតត្រូវគ្រាប់កាំភ្លើងហើយ...»។ នេះគ្រាន់តែជាក្បាលបន្តិចនៃសារនោះប៉ុណ្ណោះ បើយើងយកមកចុះផ្សាយទាំងស្រុងនោះ វាពិតជាការប្រមាថឥតគណនាដែលមិនគប្បីនឹងស្តាប់ឡើយ។
តាមរយៈអត្ថន័យក្នុងសាររៀបរាប់ទាំងកំហឹងនោះ ត្រូវបានគេធ្វើការវិភាគថា អ្នកផ្ញើសារម្នាក់នោះជាមនុស្សស្រី ហើយរឿងរ៉ាវនោះអាចបណ្តាលមកពីស្នេហាត្រីកោណ ឬក៏ចំណងស្នេហ៍ប្តី ឬសង្សារគេ ព្រោះនៅក្នុងសារនោះមានបញ្ជាក់ថា តារារូបនេះមានទំនាក់ទំនង និងនៅជាមួយបុរសម្នាក់តែមិនបញ្ជាក់ឈ្មោះអស់រយៈពេល២ឆ្នាំហើយ ។
គួររំឭកថា លី ម៉ារីណា បានរៀបអាពាហ៍ពិពាហ៍ជាលើកដំបូងជាមួយលោក ទិត ថាវរិទ្ធ អគ្គនាយករងទូរទស្សន៍បាយ័ន កាលពីដើមខែមករា ឆ្នាំ២០០៦ តែតារារូបនេះរួមរស់ជាមួយគ្នាបានតែ២៩ថ្ងៃក៏បែកបាក់គ្នា ហើយនាងក៏បានរស់នៅក្នុងភាពជាមេម៉ាយក្តៅស្រួយអស់រយៈពេល៥ ឆ្នាំ ទើបសម្រេចចិត្តភ្ជាប់ពាក្យជាមួយអាណិកជនអាមេរិកលោក សាត ចាន់ថន អាយុ៤០ឆ្នាំកាលពីឆ្នាំ២០១០។
លី ម៉ារីណា ធ្លាប់ប្រាប់ភ្នំពេញ ប៉ុស្តិ៍ ថា នាង និងគូដណ្តឹង ស្រឡាញ់គ្នាខ្លាំងណាស់ ហើយគូដណ្តឹងនាង តែងឡើងចុះស្រុកខ្មែរជារៀងរាល់ខែ។ ជាចុងក្រោយដែលភ្នំពេញ ប៉ុស្តិ៍ សម្ភាសន៍ជាមួយនាងកាលពីដើមខែមករានេះ នាងប្រាប់ថា នាងនឹងត្រូវចេញទៅរស់នៅអាមេរិកជាមួយស្វាមី ព្រោះនាង និងគូដណ្តឹងចង់រស់នៅជុំគ្នា មិនអាចអូសបន្លាយពេលវេលាបានបន្តទៀតទេ។ ប៉ុន្តែនៅពេលនេះ សារអនាមិកបានលើកយករឿងនេះមកលាតត្រដាងថា ការណ៍ដែលនាងភ្ជាប់ពាក្យជាមួយលោក សាត ចាន់ថន នោះ វាគ្រាន់តែល្បិចរៀបចំ តាមពិតរឿងនោះគ្រាន់តែជាការភ្ជាប់ពាក្យ និងស្នេហាក្លែងក្លាយប៉ុណ្ណោះ។
ក្នុងសារនោះបានសរសេរថា៖ «mi gnaing yok He: (..) zit 2 year nis mi gnaig sman te ke min deng. A sat chan thoinn kou dang deng mi Sam Pheng aing nao USA nus vear khleng khlay te..»។ ជាភាសាខ្មែរមានន័យថា៖«មី ង៉ែង យកគាត់...ជិត២ឆ្នាំនេះ មីង៉ែងស្មានតែគេមិនដឹង។ អា សាត ចាន់ថន គូដណ្តឹង មី សំផឹងអែង នៅអាមេរិកនោះ វាក្លែងក្លាយទេ...»។
ការហ៊ានអះអាងបែបនេះ ដោយសារអ្នកផ្ញើសាររូបនោះបានបញ្ជាក់ថា គេមានវីដេអូ និងរូបថត តារាសម្តែងស្រស់សោភាខ្ពស់ស្រឡះរូបនេះ នៅជាមួយនឹងបុរសម្នាក់នោះទៀតផង។
ពាក់ព័ន្ធនឹងការជេរប្រមាថជាសាធារណៈ និងគំរាមបាញ់សម្លាប់នេះ លោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ មិនអាចសុំការបំភ្លឺបានទេកាលពីល្ងាចម្សិលមិញព្រោះ ទូរស័ព្ទរបស់លោកគ្មានអ្នកលើក។
រីឯលោក ខៀវ សុភ័ក្ត អ្នកនាំពាក្យក្រសួងមហាផ្ទៃ បានឲ្យដឹងថា ទាក់ទិននឹងរឿងនេះ លោកមិនទាន់បានដឹងនៅឡើយ ហើយក៏មិនទាន់បានទទួលបណ្តឹងណាមួយពីជនរងគ្រោះដែរ។
លោកមានប្រសាសន៍ថា៖ «ការជេរប្រមាថ គំរាមបាញ់សម្លាប់ ជារឿងរំលោភទៅលើសិទ្ធិសេរីភាពយ៉ាងខ្លាំង គឺមានទោស តែសូមស្នើសុំឲ្យជនរងគ្រោះត្រូវមានការសហការល្អជាមួយមន្ត្រី សមត្ថកិច្ចដើម្បីដោះស្រាយរឿងនេះ»។
ទោះបីជាសារដែលបានផ្ញើមកមានការអះអាងយ៉ាងច្បាស់បែបនេះក្តី តែគេនៅតែមិនអាចសន្មតថា សារដែលជនអនាមិកម្នាក់នោះផ្ញើមកជាការពិត១០០ភាគរយនោះដែរ ព្រោះបើសង្កេតមើលទៅតាមស្ថានភាព កាយវិការអ្នកផ្ញើសារម្នាក់នេះ វាប្រៀបបាននឹងលួចវាយគេពីក្រោយខ្នង ខណៈដែល លី ម៉ារីណា មានវត្តមានគេមិនហ៊ានចេញមុខបកស្រាយ តែក្រោយពេល លី ម៉ារីណា បាត់វត្តមាន ទើបគេហ៊ានផ្ញើសារជេរប្រមាថ និងគំរាមបាញ់សម្លាប់យ៉ាងអាថ៌កំបាំង។
ម្យ៉ាងដោយសារតែលេខទូរស័ព្ទដែលបានផ្ញើមកនោះ បន្ទាប់ពីផ្ញើសារហើយ គេក៏បានបិទទូរស័ព្ទមិនអាចទាក់ទងបានទេ។ រីឯលី ម៉ារីណា វិញក៏មិនអាចទាក់ទងបានដែរ ហើយក៏គ្មានប្រភពណាមួយអាចសុំបញ្ជាក់ថា នាងពិតជាបានទៅដល់អាមេរិកដូចសម្តីរបស់នាង ឬយ៉ាងណានោះឡើយ តែបើតាមសារព័ត៌មានក្នុងស្រុកមួយបានចុះផ្សាយថា គេបានឃើញ ម៉ារីណា នៅប្រទេសថៃ។
0 comments:
Please add comment to express your opinion, and share it on Twitter or Facebook. Thank you in advance.