ប៉ាណូ នៃការផ្សព្វផ្សាយពាណិជ្ជកម្មរបស់ស្រាបៀរ Tiger នៅតាមដងផ្លូវក្នុងរាជធានីភ្នំពេញ។ រូបថត ភ្នំពេញ ប៉ុស្តិ៍
ភ្នំពេញៈ ការផ្សព្វផ្សាយពាណិជ្ជកម្មស្រាបៀរនៅឆ្នាំ ២០១១ បានកើនឡើង១៦៤ ភាគរយ បើធៀបនឹងឆ្នាំ២០១០។ នេះបើតាមទិន្នន័យសិក្សាស្រាវជ្រាវរបស់ក្រុមហ៊ុន Indochina ។
កំណើននេះបានធ្វើឲ្យការផ្សព្វផ្សាយពាណិជ្ជកម្មនៅកម្ពុជាកើនឡើងយ៉ាងលឿនបំផុត។
ក្រុមហ៊ុនស្រាបៀរបានចំណាយប្រាក់ជាង៥លានដុល្លារលើការផ្សាយ ពាណិជ្ជកម្មក្នុងប្រទេសកម្ពុជាក្នុងឆ្នាំ២០១១ ច្រើនជាងការផ្សព្វផ្សាយលើផ្នែករថយន្ត និងផលិតផលអាហារ ជាង១លានដុល្លារ។
អ្នកនៅក្នុងឧស្សាហកម្មនេះបាននិយាយថា តួលេខនៃការផ្សព្វផ្សាយស្រាបៀរនឹងបន្តកើនឡើងទៀតនៅ ឆ្នាំ២០១២នេះ។
កាលពី ឆ្នាំ២០១១ គេឃើញមានយុទ្ធនាការផ្សព្វផ្សាយតាមទូរទស្សន៍ធំបំផុតមួយ ចំនួនដែលមិនធ្លាប់មានពីមុនមកក្នុងប្រទេសកម្ពុជាដើម្បីបង្ហាញ យីហោ ស្រាបៀររបស់ខ្លួន។
លោក មាន សាមល ជាអនុប្រធានផ្នែកគ្រប់គ្រងទីផ្សាររបស់ក្រុមហ៊ុន Cambodia Brewery Ltd បានថ្លែងកាលពីម្សិលមិញថា៖ «ស្រាបៀរពិតណាស់បានក្លាយជាផ្នែកសំខាន់មួយ [នៃឧស្សាហកម្មផ្សព្វផ្សាយ]។ ការផ្សព្វផ្សាយស្រាបៀរគឺកំពុងតែមានលក្ខណៈប្រកួតប្រជែងឡើង ៗនាពេលឥឡូវនេះ»។
ការសិក្សាស្រាវជ្រាវរបស់ក្រុមហ៊ុន Indochina បានបង្ហាញថា ក្រុមហ៊ុន Boon Rawd Trading International Co Ltd របស់ថៃ ដែលជាម្ចាស់ស្រាបៀរ លីអូ និងស្រាបៀរ សិង្ហាបៀរ គឺជាអ្នកចំណាយប្រាក់ផ្សព្វផ្សាយពាណិជ្ជកម្មស្រាបៀរធំបំផុត ក្នុងចំនួនទឹកប្រាក់ជាង ២លានដុល្លារកាលពីឆ្នាំមុន។
ក្រុមហ៊ុន Cambodia Brewer បានចំណាយប្រាក់ប្រហែលជា១,១លានដុល្លារលើការផ្សព្វផ្សាយ ពាណិជ្ជកម្មសម្រាប់ស្រាបៀរ អាន់ឆ័រ ស្រាបៀរ ABC និងស្រាបៀរ Tiger កាលពីឆ្នាំមុន។ នេះបើយោងតាមទិន្នន័យរបស់ Indochina។
ស្រាបៀរ លីអូ របស់ក្រុមហ៊ុន Boon Rawd គឺជាអ្នកចំណាយប្រាក់ធំបំផុតទី៩ ក្នុងចំណោមក្រុមហ៊ុននិងផលិតផលផ្សេងៗ។
ក្រុមហ៊ុនផ្តល់សេវាទូរស័ព្ទ Cellcard បានចំណាយប្រាក់ចំនួន២,៧លានដុល្លារលើការផ្សព្វផ្សាយពាណិជ្ជកម្មកាលពីឆ្នាំមុន ដែលនេះបានធ្វើឲ្យវាក្លាយជាក្រុមហ៊ុនចំណាយធំបំផុត។
ក្រុមហ៊ុនដែលទើបមកថ្មីបំផុតគឺក្រុមហ៊ុន Khmer Brewery Ltd បានវាយលុកចូលក្នុងទីផ្សារយ៉ាងលំបាកនៅក្នុងឆមាសទី២ នៃឆ្នាំ២០១១ ដែលបានចំណាយប្រាក់ប្រហែល ៥១២ ០០០ដុល្លារលើការផ្សព្វផ្សាយពាណិជ្ជកម្មផលិតផលតែមួយ របស់ខ្លួនគឺ ស្រាបៀរកម្ពុជា។
មន្ត្រីម្នាក់ក្នុងក្រុមហ៊ុននេះបានថ្លែងថា ក្រុមហ៊ុននឹងទំនងជាចំណាយច្រើនជាង១លានដុល្លារលើការផ្សព្វផ្សាយតាមវិទ្យុ និងទូរទស្សន៍ក្នុងឆ្នាំ២០១២។
លោក Chris Ngiau អ្នកគ្រប់គ្រងផ្នែកពាណិជ្ជកម្មរបស់ក្រុមហ៊ុនKhmer Brewery បានថ្លែងថា ថវិកាសម្រាប់ផ្សព្វផ្សាយរបស់ ស្រាបៀរកម្ពុជា នឹងច្រើនជាងក្រុមហ៊ុនផ្សេងទៀតក្នុងប្រទេសនៅរយៈពេល២ទៅ៣ ឆ្នាំខាងមុខ។ លោកបានថ្លែងបន្តថា៖ «យើងនឹងវាយលុកយ៉ាងខ្លាំងទៅក្នុងទីផ្សារនៅប៉ុន្មានឆ្នាំខាង មុខ»។
ស្រាបៀរអង្គរ បានចំណាយប្រាក់ប្រហែល ៣១៤ ០០០ដុល្លារលើការផ្សព្វផ្សាយពាណិជ្ជកម្មកាលពីឆ្នាំមុន។
ក្នុងចំនួនទឹកប្រាក់ជាង ១៧,៦លានដុល្លារ គិតត្រឹមខែធ្នូ ២០១១ ការចំណាយលើការផ្សព្វផ្សាយស្រាបៀរគឺមានចំនួនច្រើនជាងការ ផ្សព្វផ្សាយផ្នែកទូរគមនាគមន៍ប្រហែល៤,៥លានដុល្លារ។ នេះបើយោងតាមទិន្នន័យដដែល។
ទិន្នន័យបង្ហាញថា ការផ្សព្វផ្សាយពាណិជ្ជកម្មក្នុងប្រទេសកម្ពុជាគឺជាឧស្សាហកម្ម មួយដែលមានចំនួនទឹកប្រាក់ជាង១០០លានដុល្លារ ក្នុង២០១១ ដែលកើនឡើង ៣៤ភាគរយ បើធៀបទៅនឹងឆ្នាំ២០១០។
ការផ្សព្វផ្សាយស្រាបៀរបានជាប់ចំណាត់ថ្នាក់លេខមួយកាលពីឆ្នាំ២០១០៕
0 comments:
Please add comment to express your opinion, and share it on Twitter or Facebook. Thank you in advance.