ភ្នំពេញៈ ផ្ទុយពីលោក គង់ វិសាល ដែលហ៊ានរៀបការប្រពន្ធក្មេងដោយបើកចំហ និងមានការទទួលស្គាល់ពីឪពុកម្តាយទាំងសងខាង បែរជាអតីតពិធីការិនីរត់ចោលទ្រនំ នាង ពេជ្រ សេរីរ័ត្ន ដែលធ្លាប់រស់នៅក្នុងសំបុត្រស្នេហ៍ជាមួយលោក គង់ វិសាល ៥ឆ្នាំ បានបែកធ្លាយនូវព័ត៌មានថា រាល់ព័ត៌មានដែលនាងប្រកាសកន្លងមកថា នាងមានគូស្នេហ៍ជាអ្នកមានទ្រព្យស្តុកស្តម្ភអាណិកជនអាមេរិកនោះ ជារឿងក្លែងក្លាយ ខណៈដែលយីអ៊ុនដាក់ហាងស្ប៉ា ដែលទើបបើកថ្មីក៏កំពុងប្រកាសសេង នោះ។ នេះបើតាមការអះអាងពីអ្នកស្គាល់អ្នកស្រី សែត សាម៉េត ហៅយាយកេម ដែលពេជ្រ សេរីរ័ត្ន ធ្លាប់ប្រាប់គេឯងថាជាម្តាយក្មេកនោះ។
ស្របពេលដែលលោក គង់ វិសាល ប្រកាសភ្ជាប់ពាក្យ ពេជ្រ សេរីរ័ត្ន ក៏នាងនៅមិនសុខដែរ ពោលគឺនាងមានភាពក្លាហានមួយរំពេច ហ៊ានបង្ហាញមុខម្តាយក្មេក និងប្រាប់អ្នកសារព័ត៌មាន និងមិត្តភក្តិក្នុងសិល្បៈ ថា នាងមានម្ចាស់បេះដូងជាអាណិកជនខ្មែររស់នៅសហរដ្ឋអាមេរិក ហើយបុរសរូបនោះជាអ្នកនៅពីក្រោយភាពហ៊ឺហារបស់នាង។
អ្នកស្រី សែត សាម៉េត ហៅយាយ កេម ធ្លាប់ប្រាប់អ្នកសារព័ត៌មានកន្លងមកថា អ្នកស្រីមានកូនប្រុសម្នាក់រស់នៅសហរដ្ឋអាមេរិកឈ្មោះ សែត សុខា គេមានហាងនៅអាមេរិកជាច្រើនកន្លែង ហើយគេជាអ្នកជួយឧបត្ថម្ភពីក្រោយនាង ពេជ្រ សេរីរ័ត្ន ។
អ្នកស្រីថែមទាំងបានបញ្ជាក់ទៀតថា៖«ខ្ញុំបានចូលស្តីដណ្តឹង ពេជ្រ សេរីរ័ត្ន ឲ្យកូនប្រុសខ្ញុំ ហើយខ្ញុំគ្រោងនឹងនាំ ពេជ្រ សេរីរ័ត្ន ទៅអាមេរិកដើម្បីឲ្យស្គាល់គ្នាកាន់តែច្បាស់មុននឹងឈានដល់អាពាហ៍ ពិពាហ៍ទៀតផង»។
ប៉ុន្តែដំរីងាប់មិនអាចយកចង្អេរមកបាំងជិតបានទេ ពោលគឺអ្វីៗដែលជាវាំងននខ្មៅបាំងពីក្រោយការពិត និងភាពមានបានរបស់អតីតពិធីការិនីទូរទស្សន៍បាយ័នរូបនេះ ត្រូវបានអ្នកស្គាល់អ្នកស្រី សែត សាម៉េត ច្បាស់ដូចបាតដៃទម្លាយការពិតជុំវិញភាពមិនប្រក្រតីនេះ។
អ្នកស្គាល់គ្នាជាមួយអ្នកស្រី សែត សាម៉េត បានឲ្យដឹងថា ដំបូងឡើយ យាយ កេម ជាម្ចាស់ហាងលក់បាយឈ្មោះវិចិត្រ ក្រោយមកហាងនេះក៏ត្រូវបានសេងបន្តឲ្យពិធីការិនី ពេជ្រ សេរីរ័ត្ន តែពេលនេះ ហាងនោះក៏ត្រូវបានសេងបន្តឲ្យអ្នកផ្សេងដែរ។
ប្រភពដដែលនេះបានបន្តថា អ្នកស្រី សាម៉េត មានកូន៤នាក់ ម្នាក់ជាកូនប្រុសឈ្មោះ វិចិត្រ បានរៀបការរួចហើយ ហើយ៣នាក់ផ្សេងទៀតជាកូនស្រី។
ប្រភពនោះនិយាយថា៖ «ក្រៅពីនេះ អ្នកស្រីគ្មានកូនឈ្មោះ សែត សុខា ទេ ព្រោះកូនគាត់ទាំងពីរដែលរស់នៅអាមេរិកនោះជាកូនស្រីទាំងអស់។ សព្វថ្ងៃគាត់មានកូន២នាក់នៅខ្មែរឈ្មោះ វិចិត្រ រៀបការហើយ និងកូនស្រីម្នាក់ទៀតឈ្មោះ ស៊ីណា»។
តើ សែត សុខា ជាអ្នកណា ត្រូវជាអ្វីនឹងអ្នកស្រី សែត សាម៉េត ខណៈដែលអ្នកស្រីអះអាងថាជាកូននៅអាមេរិក តែអ្នកជិតខាងអ្នកស្រីថា មិនដែលស្គាល់មិនដែលឮនោះ?
នេះមានន័យថា ទាំងពេជ្រ សេរីរ័ត្ន និងអ្នកស្រី សែត សាម៉េត កំពុងកាឡៃរឿងបំភ្លៃការពិត ដើម្បីបិទបាំងភាពច្របូកច្របល់មួយចំនួនដែលគេល្បីថា ពេជ្រ សេរីរ័ត្ន កំពុងសាងទំនាក់ទំនងស្នេហាច្រើន។ បើតាមប្រភពព័ត៌មានកន្លងមកថា នាងមានទំនាក់ទំនងជាមួយមន្ត្រីទូតចិន ម្ចាស់ក្លិបមួយកន្លែង និងចុងក្រោយនេះថា នាងមានទំនាក់ទំនងជាមួយកូនមន្ត្រីយោធាផ្នែកភស្តុភាម្នាក់ដែលបុរស នោះមានប្រពន្ធ និងកូនរួចទៅហើយ។
ពាក់ព័ន្ធនឹងបញ្ហានេះ អ្នកស្រី សែត សាម៉េត មិនអាចទាក់ទងបានទេ រីឯពេជ្រ សេរីរ័ត្ន ធ្លាប់ប្រាប់ថា នាងមិនផ្តល់បទសម្ភាសឲ្យភ្នំពេញ ប៉ុស្តិ៍ទៀតទេ។
ទន្ទឹមនឹងការទម្លាយការពិតជុំវិញគូស្នេហ៍នៅអាមេរិកថា ក្លែងក្លាយ តែមិនទាន់ប្រាកដ១០០ភាគរយនោះ ពេជ្រ សេរីរ័ត្ន ដែលឈប់ពីការងារនៅបាយ័ន តែមានប្រាក់ច្រើនជាងមុន កំពុងពពាយនាយសេងហាងស្ប៉ាមួយកន្លែងនៅម្តុំទួលគោកដែលទើបតែបើក បានប្រហែលពីរខែ។
ការប្រកាសសេងហាងបន្ទាន់នេះ ត្រូវបានអ្នកជិតដិតនឹង ពេជ្រ សេរីរ័ត្ន ឲ្យដឹងថា ដោយសារតែហាងមានសភាពស្ងាត់ជ្រងំ មិនសូវមានភ្ញៀវ ហើយមិនអាចទប់ទល់នឹងតម្លៃឈ្នួល២០០០ដុល្លារក្នុងមួយខែៗនោះ។
តើតារាដែលបោះបង់បាយ័ន ហើយប្រកាសឈប់ពីសិល្បៈនឹងមានអនាគតបែបណា ខណៈនៅពេលនេះ នាងគ្មានអ្វីជាបង្គោលសម្រាប់ជីវភាពនោះ៕ប្រភព
0 comments:
Please add comment to express your opinion, and share it on Twitter or Facebook. Thank you in advance.