កន្លែងក្មេងលេង Monkey Business ដែលស្ថិតនៅផ្សារទំនើបផារ៉ាហ្កន រាជធានីភ្នំពេញ ។ រូបថត ទូច យិនវណ្ណនិត
ភ្នំពេញ : Monkey Business ជាកន្លែងកម្សាន្តដ៏មានសុវត្ថិភាព និងមានអនាម័យល្អ។ នេះជាដំណឹងល្អសម្រាប់មាតាបិតាដែលនឿយហត់ពីការងារ ហើយនៅតែចង់នាំកូនៗរបស់ខ្លួនទៅរត់លេងកម្សាន្តបង្កើន ប្រាជ្ញា និងសុខភាព។ ប្រសិនបើអ្នកខ្ជិលរត់ដេញចាប់កូន ពេលពួកគេកំពុងតែរត់លេងនោះ សូមសាកនាំពួកគេទៅ ស្ថិតនៅជាន់ទី២ នៃផ្សារផារ៉ាហ្គន Monkey Business ខុសពីកន្លែងក្មេងលេងដទៃទៀត ដោយសារវាមានល្បែងកម្សាន្តបែបប្រព័ន្ធអេឡិចត្រូនិក។
លោក ហ្ស៊ីន ហ្វីលីប បូហ្ស៊ីន (Jean Philippe Beaujean) ជាអ្នកចាត់ការទូទៅនៅទីនោះបានឲ្យដឹងថា កន្លែងកម្សាន្តនេះត្រូវបានបង្កើតឡើងប្រមាណជាកន្លះឆ្នាំមុន បន្ទាប់ពីអាជីវកម្មនេះជោគជ័យនៅប្រទេសសិង្ហបុរី។
លោកបាននិយាយថា៖ «តាមការពិត យើងចង់ផ្ដល់ឱកាសឲ្យកុមារនៅកម្ពុជាអាចរត់លេងធ្វើចលនារាងកាយ»។
លោកបានឲ្យដឹងទៀតថា៖ «ការរចនាកន្លែងកម្សាន្ត និងការផលិតឧបករណ៍ត្រូវបានធ្វើឡើងនៅប្រទេសអូស្ត្រាលី តាមរយៈក្រុមហ៊ុន PLAYTEC។ កន្លែងកម្សាន្តនេះក៏មានបំពាក់នូវឧបករណ៍លាងសម្អាតដោយស្វ័យ ប្រវត្តិ ដែលអាចកម្ចាត់មេរោគបាន៩៩ភាគរយ»។
នៅពេលចូលទៅដល់កន្លែងកម្សាន្ត Monkey Business ភ្ញៀវទាំងអស់តម្រូវឲ្យពាក់ស្រោមជើង ដើម្បីធានាសុវត្ថិភាព និងអនាម័យដល់កុមារ។ ប្រសិនបើអ្នកភ្លេចយកស្រោមជើងតាមខ្លួន អ្នកក៏អាចរកជាវវាបាននៅតុអ្នកទទួលភ្ញៀវក្បែរនោះដែរ។
ឪពុកម្ដាយដែលនាំកូនៗរបស់ខ្លួនទៅលេងនៅទីនោះក៏អាចអង្គុយសម្រាក ឬរីករាយនឹងដើរផ្សារ ញ៉ាំអាហារផ្សេងៗដោយឥតព្រួយបារម្ភ ដោយសារ Monkey Business មានបុគ្គលិកប្រចាំការមើលក្មេងៗ ខណៈពួកគេកំពុងលេង។
ឪពុកម្ដាយអាចអង្គុយឆែកអ៊ីនធឺណិតនៅក្នុងហាងកាហ្វេដែលផ្ដល់ប្រព័ន្ធ wifi ដោយឥតគិតថ្លៃផងដែរ។
អ្នកចាត់ការទូទៅរូបនេះបានបញ្ជាក់ផងដែរថា៖ «ជារៀងរាល់ថ្ងៃ មុនម៉ោង១០ព្រឹក មាតាបិតា ដែលនាំកូនមកលេងនៅទីនោះ ក៏អាចទទួលបាននូវកាសែត និងកាហ្វេដោយឥតគិតថ្លៃផងដែរ»។
លោក ហ្វីលីប បូហ្ស៊ីន បាននិយាយទៀតថា៖ «ហាងកាហ្វេរបស់យើងមានជម្រើសមុខម្ហូប និងអាហារសម្រន់ជាច្រើន ចម្អិនដោយចុងភៅដ៏ល្បីរបស់យើង។ យើងក៏មានផ្ដល់ទស្សនាវដ្ដី ប្រព័ន្ធ wifi ទូរទស្សន៍ខ្សែកាប និងសេវាកម្មម៉ាស្សានៅទីនេះផងដែរ»។
នៅកន្លែងកម្សាន្តមានបែងចែកជា៣តំបន់គឺ សម្រាប់ទារក ក្មេងចាប់ពី១ឆ្នាំដល់៣ឆ្នាំ និងកុមារអាយុលើសពី៣ឆ្នាំ។
កន្លែងកម្សាន្ត Monkey Business អាចទទួលក្មេងឲ្យចូលលេងបានម្តងរហូតដល់១៤០នាក់ ហើយជាទូទៅក្នុងមួយថ្ងៃមានកុមារពី៨០ទៅ១០០នាក់សម្រាប់ថ្ងៃ ចុងសប្ដាហ៍ និងពី១០ទៅ៥០នាក់សម្រាប់ថ្ងៃធ្វើការ។
ទារកវ័យក្រោម១ឆ្នាំអាចចូលលេងដោយឥតគិតថ្លៃ ខណៈដែលក្មេងអាយុក្រោម២ឆ្នាំមានតម្លៃសំបុត្រ៣ដុល្លារ និងចាប់ពី២ឆ្នាំឡើងទៅ៦ដុល្លារ។ Monkey Business ចាប់បើកពីម៉ោង ៩ព្រឹកដល់៨យប់ នៅផ្សារផារ៉ាហ្គន ខាងត្បូងវិទ្យាល័យចតុមុខ។
សម្រាប់ព័ត៌មានបន្ថែម សូមទៅកាន់គេហទំព័រ www.monkeybusinesskh.com ឬទូរស័ព្ទលេខ ០២៣ ៣១៩ ៣១៩៕
0 comments:
Please add comment to express your opinion, and share it on Twitter or Facebook. Thank you in advance.