តារាដែលល្បីល្បាញ តាមរយៈផលិតកម្ម “បក្សីចាំក្រុង” រូបនេះ អះអាងថាលោកសប្បាយចិត្តណាស់ ដែលមហាជនភាគច្រើននៅតែគាំទ្រលោកក្នុងពិភពចម្រៀង ដែលរុញឲ្យលោកនៅតែមានជីវភាពល្អប្រសើរ។ ទោះយ៉ាងណា លោកអះអាងថា ទម្រាំឈរជើងដល់ចំណុចនេះ គឺលោកក៏មិនខុសពីតារាឯទៀតដែរ ព្រោះធ្លាប់ហែលឆ្លងនូវជីវិតជូរចត់ កាលពីអតីតកាលយ៉ាងឆ្អែតឆ្អន់។
ឈ្មោះ | ថ្ងៃ ខែឆ្នាំកំណើត | ទីកន្លែងកំណើត | បងប្អូន | កម្ពស់/ទម្ងន់ | |
សួស សងវាចា | ១២ កុម្ភៈ ១៩៦៨ | ឃុំគោកព្រីង ខេត្តព្រៃវែង | ៨នាក់ | ១៦៨ស.ម ទម្ងន់៧២ |
ស្ថានភាពគ្រួសារ
លោកសួស សងវាចា ជាកូនច្បងក្នុងចំណោមបងប្អូន៨នាក់ ដែលគ្មានសមាជិកណាម្នាក់ ស្រីទាល់តែសោះ។លោក មានស្រុកកំណើតនៅភូមិកន្ទួតប្រាង ក្នុងឃុំគោកព្រីង ស្រុកស្វាយរៀង ខេត្តស្វាយរៀង។ លោកមានមានឪពុកឈ្មោះសួស ហ៊ន់ អាយុ៧០ឆ្នាំជាកសិករ និងមានម្ដាយឈ្មោះអ៊ុក យ៉ង អាយុ៦៤ឆ្នាំជាកសិករដូចគ្នា។
ប្រវត្តិការសិក្សា
លោកសួស សងវាចា ធ្លាប់រៀននៅសាលាបឋមសិក្សាអង្គកប្បាស និងអនុវិទ្យាល័យស្វាយជ្រុំ ។ ទោះជាជីវភាពគ្រួសារក្រលំបាកកាលនៅវ័យក្មេង ក៏លោកបានតស៊ូសិក្សារហូតដល់បានចប់ នៅវិទ្យាល័យស្វាយរៀង ក្នុងកម្រិតថ្នាក់ទុតិយភូមិ ក្នុងឆ្នាំ១៩៨៩។ ជាអកុសលលោកគ្មានឱកាសបានរៀនថ្នាក់មហាវិទ្យាល័យដូចក្មេងៗស្រករក្រោយនោះទេ ប៉ុន្តែនៅសម័យលោក អ្នកដែលបានរៀនចប់ថ្នាក់បាក់ឌុប គឺត្រូវគេយល់ថាបានរៀនជ្រៅជ្រះ ដូចអ្នករៀនចប់ថ្នាក់មហាវិទ្យាល័យនាសម័យបច្ចុប្បន្នអញ្ចឹងដែរ។
លោកអះអាងថា គ្រាន់តែបានត្រឹមចប់ថ្នាក់ទី១២ហ្នឹង គឺលោកខំប្រឹងតស៊ូសឹងតែបោសខោបោសអាវអស់ទៅហើយ ហើយលោកក៏មានមោទនភាពដែរ ដែលលោកជាកូនកសិករសោះ តែអាចតស៊ូរៀនដល់ចប់ក្នុងសម័យកាលរបស់ខ្លួន។ ទោះយ៉ាងណា ក្រោយពីចប់បាក់ឌុបភ្លាមៗ រូបលោកក៏បានរៀនត្រៀមចូលមហាវិទ្យាល័យបានមួយរយៈដែរ ប៉ុន្តែមកពីសម័យនោះ មិនសូវមានភាពអំណោយផលឲ្យលោកបន្តការតស៊ូតទៅទៀត ទើបលោកសម្រេចចិត្តចេញធ្វើការរកលុយវិញ។
តារារូបនេះបញ្ជាក់ថា “ខ្ញុំបានរៀនត្រៀមចូលមហាវិទ្យាល័យបានមួយឆ្នាំដែរ នៅចន្លោះឆ្នាំឆ្នាំ១៩៩១ដល់១៩៩៩២ ប៉ុន្តែដោយសារសម័យនោះពួកអ៊ុន តាក់ចូលស្រុក ហើយអ្នករៀនចប់បាក់ឌុបមួយៗ ត្រូវគេចាប់អារម្មណ៍ជ្រើសយកទៅធ្វើការ ទើបខ្ញុំសុខចិត្តឈប់រៀន ហើយចូលធ្វើការជាមួយពួកអ៊ុនតាក់តែម្ដង”។ លោកបានបម្រើការក្នុងនាមជាបុគ្គលិកមួយរូប ជាមួយនឹងមន្ត្រីអ៊ុន តាក់ ដោយទទួលបានប្រាក់ខែច្រើនគួរសម ដោយសារសម័យនោះ លោកបានលួចរៀនអង់គ្លេស ហើយចេះបានតិចតួច បន្ថែមពីលើភាសាកំណើត។
ទោះយ៉ាងណាការងារដែលលោកបានទទួលកាលនោះ គឺគ្រាន់តែជាមន្ត្រីពាំនាំព័ត៌មាននៅតាមភូមិស្រុក ដើម្បីផ្ដល់ឲ្យអ្នកភូមិយល់ដឹងពីការបោះឆ្នោតដែលគ្មានការគំរាមកំហែងប៉ុណ្ណោះ អញ្ចឹងហើយទើបគ្រាន់តែគម្រោងបោះឆ្នោតរបស់អ៊ុនតាក់ត្រូវបញ្ចប់ គឺរូបលោកក៏ធ្លាក់ទៅធ្វើស្រែចម្ការវិញ ហើយបន្តមករូបលោកក៏ត្រូវហែលឆ្លងនឹងការតស៊ូកាន់តែច្រើន ទម្រាំមានឈ្មោះជាអ្នកចម្រៀងអាជីព។
ជីវិតតស៊ូ
មុននឹងជួបជីវភាពរស់នៅល្អប្រសើរ ដូចពេលនេះ លោក សួស សងវាចា ធ្លាប់ឆ្លងកាត់ភាពតស៊ូច្រើនរួចមកហើយ ពិសេសក្នុងអំឡុង ពេលដែលលោកស្ថិតនៅឯស្រុកកំណើត។ ដោយសារតែលោកជាកូនច្បងគេ គឺបន្ទុកចេញធ្វើស្រែចម្ការស្ទើរទាំងស្រុងរបស់ឪពុកម្ដាយ គឺជាភារៈរបស់លោកតាំងពីវ័យជំទង់ម្ល៉េះ បើទោះជាពេលនោះ លោកជាប់ភារៈរៀនសូត្រផងក៏ដោយ។
លោកពោលថា “បើរំលឹកដល់ជីវិតកាលរបស់ខ្ញុំពីកុមារភាព រហូតដល់ធំដឹងក្ដីមក ខ្ញុំលំបាករហូត ព្រោះខ្ញុំជាកូនបងគេ ដែលមិនខុសពីឪពុករបស់ប្អូនៗនោះទេ អញ្ចឹងហើយ ទើបស្រែចម្ការក៏ខ្ញុំចំណាប់ ហើយរឿងរកត្រី ឬរកប្រាក់ផ្សេងៗជួយឪពុកម្ដាយ ក៏ខ្ញុំហែលឆ្លងច្រើនជាងគេ”។ លោកត្រូវជួយធ្វើការជំនួសដៃជើងប្អូនៗ និងឪពុកម្ដាយជារៀងរាល់ថ្ងៃ ពិសេសរឿងស្រែចម្ការ និងកិច្ចការក្នុងផ្ទះ ហើយលោកមិនធ្លាប់ស្រ ម៉ៃថាខ្លួនឯង បានស្រណុកសុខស្រួល និងបានក្លាយជាមនុស្សរបស់មហាជនដូចពេលនេះទេ ដោយសារតែកាលពីក្មេងគ្រួសាររបស់លោកគ្រាន់តែជាអ្នកស្រែ និងគ្មានខ្នងបង្អែកជួយឲ្យលោកចូលប្រឡូកសិល្បៈ។
លោកធ្លាប់ធ្វើកម្មកររែកដី អស់ជាច្រើនឆ្នាំ ដើម្បីរកប្រាក់ជួយផ្ទប់ការសិក្សា។ លោកបានបង្ហើបថា កាលពីលោកចេញប្រឡូកក្នុងពិភពសិល្បៈដំបូង រូបលោកក៏ធ្លាប់រកប្រាក់ពីការងារចេញរត់ម៉ូតូឌុប អស់ជាច្រើនឆ្នាំផងដែរ ដោយសារតែចំណូលពីសិល្បៈ ពេលនោះ មិនអាចទប់នឹងតម្រូវការក្នុងគ្រួសារបាន។
ប្រវត្តិសិល្បៈ
ក្នុងពេលបម្រើការងារជាមន្ត្រីអ៊ុនតាក់ រូបលោកក៏បានស្គាល់រាប់អានអ្នកមានខ្សែទុយយោផ្នែកសិល្បៈពីរបីរូប ដែលជាអ្នកបើកផ្លូវឲ្យលោកមានគំនិតចង់ក្លាយជាអ្នកចម្រៀង។ នៅក្រោយពីបញ្ចប់ការងារជាមួយពួកអ៊ុនតាក់ រូបលោកក៏ត្រូវអ្នករាប់អានទាំងនោះ ទាក់ទងឲ្យទៅច្រៀង នៅក្នុងកងអង្គរក្សសម្ដេចហ៊ុនសែន ក្នុងអំឡុងឆ្នាំ១៩៩៤ ក្រោមការដឹកនាំរបស់លោកជំទាវ ម៉ែនសំអន។
នៅពេលនោះលោកត្រូវគេឲ្យចេញសម្ដែងក្នុងកម្មវិធីសិល្បៈធំៗម្ដងម្កាលប៉ុណ្ណោះ ទើបលោកត្រូវបង្ខំចិត្តរត់ម៉ូតូឌុប ដើម្បីអាចជួលផ្ទះគេរស់នៅក្នុងទីក្រុងភ្នំពេញបាន។ បន្ទាប់មកលោកក៏បានស្គាល់រាប់អានជាមួយលោកសោម ឆាយា ដែលជាមន្ត្រីប្រចាំទូរទស្សន៍CTN នាពេលនេះ ហើយត្រូវលោកណែនាំឲ្យចូលច្រៀងនៅផលិតកម្មបក្សីចាំក្រុង ក្នុងឆ្នាំ១៩៩៩។ កាលនោះលោកបានច្រៀងបទពីជំនាន់ដើមមួយចំនួន ហើយត្រូវបានមហាជនកាន់តែច្រើនចាប់ផ្ដើមកត់សម្គាល់ស្គាល់ឈ្មោះលោក។
ជំហាននេះហើយ ដែលលោកត្រូវបានគេជ្រោមជ្រែងឲ្យបានឡើងឆាកទូរទស្សន៍ តាមរយៈសំណើរបស់ម្ចាស់ផលិតកម្ម និងការជួយជ្រោមជ្រែងពីលោក សោម ឆាយ៉ា ក្នុងឆ្នាំ២០០០។ តារាប្រជ្រុយធំរូបនេះ និយាយថា “បើក្នុងឆ្នាំ១៩៩៤ ខ្ញុំមិនប្រថុយមកនៅភ្នំពេញ ដើម្បីច្រៀងឲ្យក្រុមតន្ត្រីកងអង្គរក្សសម្ដេចទេ ខ្ញុំប្រហែលជាមិនបានក្លាយជាអ្នកចម្រៀងទេ ហើយតាមមើលពេលនេះ ប្រហែលជាខ្ញុំនៅតែធ្វើស្រែមួយជីវិតផងក៏មិនដឹង”។
បច្ចុប្បន្ន លោកគឺជាតារារីកស្កុះស្គាយនៅគ្រប់ផលិតកម្មក្រៅស្រុក ដោយមិនបានកុងត្រាច្រៀងផ្ដាច់មុខឲ្យផលិតកម្មណាមួយដូចមុនទៀតទេ។ អញ្ចឹងហើយ ទើបគេកត់សម្គាល់ឃើញរូបលោកចេញច្រៀងនៅផលិតកម្មរ៉ៃមាស តោមាស ផលិតកម្មបុប្ផា និងផលិតកម្មដែលមានមូលដ្ឋាននៅស្រុកក្រៅមួយចំនួនទៀតផង។
ឱកាសសម្ដែងក្រៅស្រុក
បន្ទាប់ពីបានល្បីឈ្មោះ លោក សួស សងវាចា ចាប់ផ្ដើមមានឱកាសចេញច្រៀងក្រៅស្រុកជាច្រើនដូចជាប្រទេសបារាំង ២ដង នៅអំឡុងឆ្នាំ២០០៤និង២០០៩ នៅអាមេរិកម្ដងក្នុងឆ្នាំ២០០៦ ព្រមទាំងនៅក្នុងឆ្នាំ២០០៧ បានចេញទៅប្រទេសកាណាដា និងអូស្ត្រាលី។
នៅពេលឆាប់ៗខាងមុខនេះលោកមានគម្រោងចេញទៅកាន់ប្រទេសផ្សេងៗទៀត ប៉ុន្តែមកការងារនៅក្នុងស្រុកមមាញឹក គួបផ្សំនឹងសុខភាពមិនសូវស្រួលក្នុងដំណើរជិះយន្តហោះផងនោះ ទើបលោកមិនសូវហ៊ានទទួលការងារក្រៅស្រុកដូចមុន។
ជីវិតស្នេហា
តារាចម្រៀងបែបមនោសញ្ចេតនា លោក សួស សងវាចា បានរៀបអាពាហ៍ពិពាហ៍តាំងពីឆ្នាំ១៩៩៩ មកម្ល៉េះជាមួយអ្នកស្រី វ៉ាន់ សុភា នៅឯខេត្តព្រៃវែង ដែលជាកូនស្រីអ្នកភូមិផងរបងជាមួយលោក។សព្វថ្ងៃលោក និងភរិយា មានកូនបីនាក់ ប្រុសពីរស្រីមួយ លោកគ្មានគម្រោងយកកូនទីបួនទៀតឡើយ ដោយសារតែគិតថាចំនួនកូនដែលមានស្រាប់គឺសមល្មមសម្រាប់គ្រួសារ។
គម្រោងអនាគត
នៅថ្ងៃអនាគតលោក សួស សងវាចា ចង់បង្កើតកន្លែងចិញ្ចឹមត្រីមួយកន្លែងនៅក្នុងទឹកដីភូមិកំណើត ប៉ុន្តែលោកមិនដឹងថា តើដល់ពេលណាទើបមហិច្ឆតានេះ នឹងក្លាយជាការពិតនោះទេ។ លោកបញ្ជាក់ថា បើទោះជាថ្ងៃក្រោយលោកនៅតែច្រៀង តែលោកនឹងបង្កើតកសិដ្ឋានចិញ្ចឹមត្រីមួយកន្លែងសម្រាប់ទ្រទ្រង់ជីវភាព។ ក្រៅពីនោះលោកក៏នឹងបន្តអាជីពជាគ្រូបង្ហាត់ច្រៀងនៅតាមក្លឹប ដើម្បីផ្ដល់បទពិសោធន៍ និងទេពកោសល្យសិល្បៈដល់ក្មេងៗជំនាន់ក្រោយផងដែរ។
លោកសួស សងវាចា គឺជាតារាចម្រៀងមួយរូប ដែលផុសចេញពីអ្នកចម្រៀងក្នុងកងអង្គរក្សសម្ដេចហ៊ុនសែន កាលពីឆ្នាំ១៩៩៤។ លោកមានកេរ្តិ៍ឈ្មោះក្នុងពិភពសិល្បៈ នៅអំឡុងឆ្នាំ១៩៩៩ បន្ទាប់លោកសោម ឆាយា ជួយឲ្យបានច្រៀងនៅក្នុងផលិតកម្មបក្សីចាំក្រុង និងចេះតែមានឱកាសចេញច្រៀងលើឆាកទូរទស្សន៍បន្តកន្ទុយគ្នា។
កាលពីអតីតកាល ដ្បិតថារូបលោកមិនជាជួបការលំបាកណាស់ ប៉ុន្តែជីវិតតស៊ូក៏មានមិនតិចដែរ ពិសេសក្នុងពេលដែលលោកផ្សងព្រេងមករស់នៅភ្នំពេញដំបូងៗ ដែលត្រូវរត់ម៉ូតូឌុបផង ចេញច្រៀងផង ដើម្បីបានប្រាក់ជួលផ្ទះគេនៅ។ លោកបានក្លាយជាអ្នកចម្រៀងមានជីវភាពធូរធារ ក្រោយពីមានឱកាសចេញច្រៀងនៅក្រៅស្រុកហូរហែ និងក្រោយពីមានទីផ្សារសិល្បៈកាន់តែច្រើន៕
0 comments:
Please add comment to express your opinion, and share it on Twitter or Facebook. Thank you in advance.