ពោធិ៍សាត់ៈ ដោយសារតែខ្វះការយល់ដឹងបានទៅយកថ្នាំសម្លាប់សត្វល្អិតទៅប្រើលើសក់ដើម្បីសម្លាប់ចៃ បានបណ្តាលឲ្យស្ត្រីមេម៉ាយវ័យក្មេងម្នាក់ រស់នៅភូមិជ្រៃក្រឹម ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ ដេកស្លាប់នៅក្រោមផ្ទះខ្លួនយ៉ាងអាណោចអាធ័ម កាលថ្ងៃទី១៩ ខែមករា។
លោក ឌុល ប៉ន នាយប៉ុស្តិ៍នគរបាលឃុំផ្ទះរុងប្រាប់ភ្នំពេញប៉ុស្តិ៍ ពីថ្ងៃអាទិត្យថា ជនរងគ្រោះគឺជាស្ត្រីមេម៉ាយ ឈ្មោះ ហ៊ុន នេត អាយុ១៩ឆ្នាំ មានកូនប្រុសម្នាក់អាយុជិត៩ខែ។ លោកថា ស្រីរូបនេះបានស្លាប់ដោយសារការយកថ្នាំបាញ់សម្លាប់សត្វល្អិត ម៉ាកស៊ូ ពែរមែន ទៅលាបសក់ជិត៣ ម៉ោង ទើបមានគ្រោះថ្នាក់បែបនេះ។
លោកមេប៉ុស្តិ៍បញ្ជាក់ថា មន្ត្រីផ្នែកបច្ចេកទេសនិងផ្នែកកោសល្យវិច័យពិនិត្យឃើញថា នៅលើស្បែកក្បាលស្ត្រីរងគ្រោះមានដំបៅជាច្រើនកន្លែង នៅពេលនាងប្រើថ្នាំសម្លាប់សត្វល្អិតពីលើ ថ្នាំបានជ្រាបចូលខួរក្បាលតាមដំបៅ ទើបបណ្តាលឲ្យមានប្រតិកម្ម ដំបៅឡើងជាំៗ រលាកពេញក្បាលពុលស្លាប់តែម្តង។ លោកនិយាយថា៖ «នៅថ្ងៃកើតហេតុ គ្រួសារនាងនាំគ្នាទៅដាំដំឡូងនៅឯចម្ការមិនមានអ្នកណានៅផ្ទះជាមួយទេ។ ចំណែកអ្នកជិតខាងពេលពួកគេមកដល់កន្លែងកើតហេតុ នាងបានផុតដង្ហើមទៅហើយ។
ម្តាយស្ត្រីរងគ្រោះ ឈ្មោះ រស់ សារឿន អាយុ៥៣ឆ្នាំ បានឲ្យដឹងថា មុនស្លាប់១ថ្ងៃ កូនប្រុសស្រីគាត់៣នាក់រួមទាំងស្ត្រីរងគ្រោះផងបានបបួលគ្នាទៅទិញថ្នាំស៊ូពែរមែនមកដាក់សម្លាប់ចៃ ប៉ុន្តែ អកុសល មានតែកូនស្រីម្នាក់នេះ ដែលបានយកថ្នាំនោះមកលាបមុនគេរហូតស្លាប់បែបនេះ។ គាត់និយាយថា៖ «ថ្នាំនោះ មិនដឹងជាកូនខ្ញុំបានមកពីណាទេ ហើយក៏មិនដឹងថា តើអ្នកណាជាអ្នកណែនាំវាឲ្យធ្វើរបៀបនេះដែរ»៕ source
0 comments:
Please add comment to express your opinion, and share it on Twitter or Facebook. Thank you in advance.