សារជាតិ របស់ សម្បុក ឃ្មុំ មាន នូវ សមាសធាតុ គួរ ឱ្យ ពេញចិត្ត និង ពុំ ទាន់ ត្រូវបាន រកឃើញអស់
ភ្នំពេញ:ថ្វីត្បិតបានមានការរីកចម្រើនក្នុងការស្រាវជ្រាវអំពីជំងឺមហារីកក៏ដោយ តែការព្យាករណ៍របស់ពួកអ្នកវិទ្យាសាស្ត្រតាំងពី៣០ឆ្នាំមុនថា មនុស្សនឹងរកឃើញវិធីសាស្ត្រប្រឆាំងតបបានជំងឺសម្លាប់មនុស្សនេះមុនសហស្សវត្សរ៍ថ្មី មិនបានក្លាយជាការពិតឡើយ ។ ជំងឺមហា រីកផ្សេងៗគ្នានៅតែសម្លាប់មនុស្សរាប់លាននាក់លើពិភពលោកក្នុងមួយឆ្នាំៗ ។ អ្នកជំងឺពេលកើតជំងឺនេះត្រូវព្យាបាលដោយវិធីចាក់ចូលសារជាតិជាច្រើនសំដៅសម្លាប់កោសិកាមហារីក តែទន្ទឹមនោះក៏មានគ្រោះថ្នាក់ណាស់ដែរសម្រាប់សរីរាង្គ ។ ដឹងថាដូច្នេះ តែពុំមាន ជម្រើសណាផ្សេងឡើយ ។
ប៉ុន្តែលទ្ធផលស្រាវជ្រាវរបស់ពួកអ្នកវិទ្យាសាស្ត្រអាល្លឺម៉ង់កំពុងផ្តល់ នូវក្តីសង្ឃឹមថ្មីអំពីអាវុធប្រឆាំងតបជំងឺមហារីក ។
សម្បុកឃ្មុំ ជានិច្ចកាលអ៊ូអរជាមួយនឹងសកម្មភាពដ៏រវល់របស់សត្វឃ្មុំ។ រៀងរាល់មួយវិនាទីម្តងមានក្រុមឃ្មុំមួយចុះមកសម្បុក ។ ហើយបើតាមការគិតនោះ សារជាតិធូលីកខ្វក់នឹងជាប់តាមចូលក្នុងសម្បុក ។ ក៏ប៉ុន្តែសម្បុកឃ្មុំមួយនៅស្អាតជាងមន្ទីរពេទ្យទាំងឡាយរបស់មនុស្សទៅទៀត ព្រោះឃ្មុំប្រើប្រាស់សារជាតិសម្អាតដ៏សែនពិសេសមួយប្រភេទ នោះជាសារជាតិប្រឆាំងមេរោគមួយមានឈ្មោះថា “propolis” ដែលបង្កើត ដោយសត្វឃ្មុំខ្លួនឯង ។
សត្វឃ្មុំប្រមូលយកសារជាតិស្អិតពីជ័ររុក្ខជាតិ រួមជាមួយនឹងសារជាតិមួយប្រភេទដែលបញ្ចេញដោយខ្លួនវាផ្ទាល់ និងប្រើល្បាយនេះដើម្បីលុបប្រឡោះក្នុងសម្បុក ។ សារជាតិជ័រ propolis ទន្ទឹមនោះក៏កម្ទេចបានពពួកវីរុស បាក់តេរីនិងផ្សិត ។ នោះគឺជាសារជាតិសម្លាប់មេរោគធម្មជាតិមួយ ។
ប្រភេទឱសថក្នុងសម្បុកឃ្មុំនេះ ធ្លាប់ត្រូវបានប្រើប្រាស់ក្នុងសម័យបុរាណ ។ ជនជាតិអេហ្ស៊ីបបានប្រើប្រាស់វាដើម្បីអប់សពអ្នកស្លាប់សំដៅទប់ស្កាត់ការ ពុករលួយ។ វេជ្ជបណ្ឌិតជនជាតិក្រិកបុរាណ Dioscorides បានប្រើ propolis ជាឱសថព្យាបាលជំងឺមិនប្រក្រតីនៃស្បែក ។ ដល់ដើមសតវត្សរ៍ទី២០ ពួកវេជ្ជបណ្ឌិត និងគិលានុបដ្ឋាកនៅតែប្រើទឹកឃ្មុំដើម្បីព្យាបាលស្នាមរបួសឆ្លងមេរោគ ។ ប៉ុន្តែមកដល់ចុងសម័យសង្គ្រាមលោកលើកទីពីរ សម័យកាលរបស់សារជាតិ propolis ត្រូវបានបិទមកវិញ, ជំនួសដោយឱសថអង់ទីប៊ីយ៉ូទិក, ប៉េនីស៊ីលីន ។ នោះជារឿងមួយគួរឱ្យសោកស្តាយ ព្រោះថាសារជាតិនេះរបស់សម្បុកឃ្មុំមាននូវសមាសធាតុគួរឱ្យពេញចិត្ត និងពុំទាន់ត្រូវបានរកឃើញអស់ ។ ពួកអ្នកស្រាវជ្រាវនៅមហាវិទ្យាល័យ Bochum កំពុងប្រឹងប្រែងរក អាថ៌កំបាំងមួយចំនួននោះ ។ ពួកគេជឿថា សារជាតិ propolis ពុំត្រឹមតែមានលក្ខណៈពិសេសរបស់ឱសថអង់ទីប៊ីយ៉ូទិកប៉ុណ្ណោះទេ តែនៅមានសារជាតិប្រឆាំងតបជំងឺមហារីក ។
លោក Peter Reusch អ្នកស្រាវជ្រាវឱសថនៅមហាវិទ្យាល័យ Bochum ឱ្យដឹងថា “ពេលផ្តាច់សមាសធាតុទាំងឡាយរបស់សារជាតិចម្រុះ propolis យើងខ្ញុំបានឃើញសារជាតិមួយចំនួនមានលទ្ធភាពរារាំងការរីកចម្រើនរបស់ ដុំមហារីក ។ ពិសេសនោះវាមានឥទ្ធិពលតែទៅលើកោសិកាមហារីក រីឯចំពោះ កោសិកាធម្មតាវិញវាមានតិចតួច ឬគ្មានឥទ្ធិពលអ្វីទាំងអស់ ។ ដូច្នេះសារជាតិចម្រាញ់ពី propolis មិនធ្វើឱ្យគ្រោះថ្នាក់ទៅដល់កោសិកាល្អ ដោយវាយប្រហារតែកោសិកាមហារីក ។ propolis ជាល្បាយស្មុគស្មាញមួយ រួមមានដល់ទៅ២០០សមាសធាតុ ។ ពួកអ្នកវិទ្យាសាស្ត្រកំពុងកំណត់បញ្ជាក់ថា សារជាតិមួយណាមានសមត្ថភាពរារាំងកោសិកាមហារីក”។
ប៉ុន្តែ មានបញ្ហាធំមួយ ។ propolis ជាផលិតផលធម្មជាតិមួយ ។ សត្វឃ្មុំបានគួបផ្សំសមាសធាតុផ្សេងៗគ្នាតាមឆ្នាំនីមួយៗ ដើម្បីបង្កើតវា អាស្រ័យទៅលើអ្វីដែលវារកឃើញក្នុងធម្មជាតិ។ ល្បាយមួយដែលប្រែប្រួលដូច្នេះពិបាក ដើម្បីផលិតផលជាឱសថមួយប្រភេទ ។ propolis នៅតំបន់នីមួយៗមានចំណុច ពិសេសខុសៗគ្នា ។ ដូច្នេះនឹងពុំមានអត្ថន័យប្រសិនប្រមូលផ្តុំការត្រួតពិនិត្យតែមួយប្រភេទ ។ ពួកអ្នកវិទ្យាសាស្ត្រនឹងត្រូវស្រាវជ្រាវគំរូផ្សេងៗគ្នាយ៉ាងច្រើន អនេក ។ គំរូ propolis កំពុងត្រូវបានប្រើក្នុងបន្ទប់ពិសោធន៍ជាប្រភេទបង្កើតដោយសត្វឃ្មុំនៅតំបន់ Ruhr, អាល្លឺម៉ង់ មានលទ្ធភាពទប់ស្កាត់កោសិកាមហារីក។ វាមានប្រសិទ្ធភាពជាពិសេសចំពោះជំងឺមហារីកកោសិកាសរសៃប្រសាទ- ប្រភេទមហារីកច្រើនតែកើតចំពោះកុមារ ។ ប៉ុន្តែពួកអ្នកវិទ្យាសាស្ត្រនៅរក ឃើញរឿងដ៏វិសេសអស្ចារ្យមួយទៀតនៅសារជាតិ propolis នេះ ។ វាជាប្រភេទឱសថប្រឆាំងវីរុសដ៏អស្ចារ្យ សូម្បីតែចំពោះវីរុសហ៊ីវ ។
ពួកអ្នកវិទ្យាសាស្ត្រឱ្យដឹងថា “ការពិតនោះ យើងខ្ញុំបានសង្កេតឃើញថា ក្រៅពីលទ្ធភាពព្យាបាលជំងឺមហារីកសារជាតិក្នុង propolis អាចត្រូវបានប្រើ ប្រាស់ដើម្បីព្យាបាលជំងឺអេដស៍ ។ យើងខ្ញុំទើបតែចាប់ផ្តើមស្រាវជ្រាវក្នុងក្របខ័ណ្ឌនេះ តែលទ្ធផលដំបូងៗបង្ហាញថា វាពិតជាមានសមត្ថភាពរារាំងវីរុសហ៊ីវ”។
ផលិតផលដ៏វិសេសអស្ចារ្យរបស់សត្វឃ្មុំនេះអាចនឹងក្លាយជាឱសថមួយប្រភេទពោរពេញដោយសក្តានុពលក្នុងថ្ងៃអនាគត ។ បច្ចុប្បន្នសារជាតិ propolis ទើបតែមាននៅក្នុងពពួកក្រែមនិងប្រេងប្រើប្រាស់សម្រាប់ស្បែក ។ ពពួកសត្វឃ្មុំបានដឹងច្បាស់ពីតម្លៃរបស់សារជាតិ propolis ក្នុងពេលដែលមនុស្សទើបតែកំពុងស្ថិតនៅលើផ្លូវ ស្វែងរក៕
0 comments:
Please add comment to express your opinion, and share it on Twitter or Facebook. Thank you in advance.