តាមទំនៀមទម្លាប់តាំងពីបុរាណមក នំអន្សមត្រូវបានប្រជាពលរដ្ឋខ្មែរជាពុទ្ធបរិស័ទនិយមធ្វើក្នុងពិធីសំខាន់ៗ ដូចជា សែនព្រេនជីដូនជីតា ពិធីមង្គលការ និងពិសេសបំផុតក្នុងថ្ងៃកាន់បិណ្ឌ និងភ្ជុំបិណ្ឌខ្មែរ។
មុនថ្ងៃភ្ជុំបិណ្ឌមួយថ្ងៃ ឬថ្ងៃបិណ្ឌទី១៤ គេឃើញប្រជាពលរដ្ឋសឹងគ្រប់គេហដ្ឋានទាំងអស់មមាញឹករៀបចំ គ្រឿងប្រដាប់ប្រដាសម្រាប់ធ្វើនំនេះ ដែលរួមមានអង្ករដំណើប ស្លឹកចេក សណ្ដែក និងស្នូល មានចេកណាំវ៉ា សាច់-ខ្លាញ់ជ្រូក ចំណង ស្លឹកចេក ត្រៀមវេច ក្នុងន័យយកទៅវត្ត ចែកកូនចៅ ជូនឳពុកម្ដាយ ឬសាច់ញាតិជិតឆ្ងាយនានា និងទុកទទួលទានបន្ទាប់ពីភ្ជុំបិណ្ឌ។
អ្នកស្រី នូ សុផាវី ប្រជាពលរដ្ឋរស់នៅក្នុងស្រុកទ្រាំង ខេត្តតាកែវ តែងវេចនំអន្សមជ្រូកមិនដែលខកខានមួយឆ្នាំណាឡើយ។ អ្នកស្រីយល់ថា នេះជាទំនៀមទម្លាប់ប្រពៃណីរបស់ខ្មែរ។ ដើម្បីធ្វើនំអន្សមជ្រូកឲ្យឆ្ងាញ់ពិសា កត្តាសំខាន់គឺត្រូវចេះលាយគ្រឿងអង្ករ ស្នូលសណ្ដែក និងខ្លាញ់ជ្រូកនោះឲ្យល្មម កុំឲ្យប្រៃពេក ឬសាបពេក។
“ម្យ៉ាងនំអន្សមនេះ ត្រូវការចំណាយពេលប្រមាណ៣ទៅ៤ម៉ោង ដើម្បីស្ងោរឲ្យឆ្អិន ហើយដាច់ខាតត្រូវយកចិត្តទុកដាក់ថែរក្សាភ្លើងនំនេះ ឲ្យបានល្អ ទើបនំឆ្អិនសព្វ និងមានរសជាតិឆ្ងាញ់ពិសា” ។ នេះជាការរៀបរាប់បន្ថែមរបស់អ្នកស្រី សុផាវី។
មិនត្រឹមតែប្រើប្រាស់សម្រាប់ជាគ្រឿងប្រគេនព្រះសង្ឃ សែនព្រេនដល់ជីដូនជីតាក្នុងពិធីកាន់បិណ្ឌនិងភ្ជុំបិណ្ឌប៉ុណ្ណោះទេ តែនំអន្សមនេះ ថែមទាំងត្រូវបានគេរក្សាទុកក្នុងទូទឹកកក និងឆ្អើភ្លើងសម្រាប់ទុកទទួលទានក្រោយពិធីភ្ជុំបិណ្ឌ។ នៅកន្លែងខ្លះ គេយកអន្សមជ្រូកទៅត្រាំទឹកក្នុងរយៈពេលកំណត់ណាមួយ ក៏ជាមធ្យោបាយរក្សាទុកបានយូរដែរ។ បន្ទាប់ពីថ្ងៃភ្ជុំរួចជាពេលដែលអ្នកទាំងឡាយទាំងពួងលែងនឿយណាយនឹងចំណីចំណុកនោះ នំអន្សមត្រូវប្រជាពលរដ្ឋខ្មែរនិយមកាត់ជាកង់ខ្លីៗ បំពងឬចៀន ទទួលទានផ្ទាប់ជាមួយបន្លែ អន្លក់ ទឹកត្រីផ្អែម យ៉ាងឆ្ងាញ់ពិសា៕
0 comments:
Please add comment to express your opinion, and share it on Twitter or Facebook. Thank you in advance.