ពលករខ្មែររងការជួញដូរនៅថៃ ដែលឥណ្ឌូនេស៊ីសង្គ្រោះបាន បញ្ជូនមកដល់កម្ពុជាហើយពីម្សិលមិញ។ ម៉ៃ វិរៈ
ភ្នំពេញៈ បន្ទាប់ពីសុបិនអាក្រក់រយៈពេលពីរឆ្នាំ ដែលបានបណ្តាលឲ្យពួកគេ ធ្លាក់ចូលទៅក្នុងការងារទាសករ នៅលើទូកនេសាទថៃ បុរសជនជាតិកម្ពុជាចំនួន ១២ នាក់ នៅទីបំផុត បានវិលត្រឡប់មកដល់ស្រុកកំណើតវិញ ហើយបានរៀបរាប់ អំពីដំណើររឿងដ៏អាក្រក់របស់ពួកគេ នៅពេលមកដល់ព្រលានយន្តហោះភ្នំពេញកាលពីម្សិលមិញ។
បុរសទាំងនេះ ត្រូវបានជួយសង្គ្រោះ នៅក្នុងប្រទេសឥណ្ឌូនេស៊ី បន្ទាប់ពីពួកគេ ត្រូវបានគេលក់ទៅឲ្យធ្វើជាទាសករនៅលើទូកនេសាទថៃ ដូចសត្វធាតុ តាមរយៈមេខ្យល់ ដោយសន្យាថា នឹងរកការងារល្អឲ្យពួកគេ នៅក្នុងប្រទេសថៃ។
រដ្ឋា អាយុ ១៩ ឆ្នាំ បានថ្លែងកាលពីម្សិលមិញថា គាត់មិនបានទទួលប្រាក់ខែទេ«សូម្បីតែមួយរៀល» នៅលើទូកនេសាទ បន្ទាប់ពីត្រូវបានបោកដោយមេខ្យល់ កាលពីឆ្នាំ ២០០។ រដ្ឋា បានប្តេជ្ញាថា នឹងមិនស្វែងរកការងារនៅក្រៅប្រទេសទៀតទេ។ យុវជនរូបនេះឲ្យដឹងថា៖«យើងបានចាប់ត្រីយ៉ាងច្រើន ហើយពេលខ្លះច្រើនជាង ១០ តោនក្នុងមួយថ្ងៃ។ ខ្ញុំនឹងបុរសម្នាក់ទៀត ត្រូវតែធ្វើការ រហូតដល់ជិត ២៤ ម៉ោង មានតែ ២ម៉ោងប៉ុណ្ណោះ សម្រាប់ដេក»។ ដោយសារតែមានការឈឺចាប់ រដ្ឋា បានអំពាវនាវ ឲ្យប្រជាជនទាំងអស់ មិនត្រូវ ប្រថុយប្រថាន ទៅធ្វើការនៅក្រៅប្រទេសដូចគាត់នោះទេ។ «ប្រសិនបើខ្ញុំមិនធ្វើការពួកគេវាយដំធ្វើបាបខ្ញុំ»។
តូច ឌឿន អាយុ ៣០ ឆ្នាំមកពីខេត្តបៃលិន បានថ្លែងថា គាត់ត្រូវបានគេសន្យាថា នឹងផ្តល់ការងារ ជាអ្នកបេះក្រូច ដោយមេខ្យល់ម្នាក់ ក្នុងប្រទេសកម្ពុជា ប៉ុន្តែគាត់ត្រូវបានលក់ទៅឲ្យទូកនេសាទថៃ នៅពេលគាត់ទៅដល់។ គាត់ បានថ្លែងបន្តថា៖ «ជារៀងរាល់ថ្ងៃនៅសមុទ្រ ខ្ញុំបានបន់ព្រះឲ្យជួយខ្ញុំត្រឡប់មកស្រុកកំណើតវិញ។ ឥឡូវនេះ រដ្ឋាភិបាល និងអង្គការ បានជួយខ្ញុំ។ ខ្ញុំអរគុណពួកគេ»។
លោក ជីវ ផល្លី អនុប្រធាន នាយកដ្ឋានជួញដូរ និងការពារអនីតិជន នៃក្រសួងមហាផ្ទៃ បានថ្លែងថា បុរសទាំងនោះ បានទទួលការពិនិត្យសុខភាព ហើយកំពុងត្រូវបានសម្ភាសសាកសួរ ដើម្បីស្វែងរកកំណត់អត្តសញ្ញាណមេខ្យល់ ដែលបានជួញដូរពួកគេ។ លោកថ្លែងបន្តថា៖ «យើងត្រូវតែសាកសួរពួកគេដើម្បីស្វែងរកចាប់ខ្លួនមេខ្យល់ទៅតាមច្បាប់»។
លោកបានថ្លែងបន្តថា ការជួយសង្គ្រោះនេះត្រូវបានធ្វើឡើងតាមរយៈកិច្ចខិតខំប្រឹងប្រែង សម្របសម្រួលដោយអង្គការអន្តរជាតិ សម្រាប់ការចំណាកស្រុក (IOM) និងក្រសួងការបរទេស។
កាលពីខែធ្នូ ឆ្នាំមុន បុរសជនជាតិកម្ពុជាជិត ១០០ នាក់ ត្រូវបានជួយសង្គ្រោះពីប្រទេសឥណ្ឌូនេស៊ី ម៉ាឡេស៊ី និងប្រទេសម៉ូរីទូស បន្ទាប់ពីពួកគេ ទទួលរងការជួញដូរ ឲ្យទៅធ្វើការនៅលើទូកនេសាទក្នុងប្រទេសថៃ។
លោកស្រី លឹម មុនី អនុប្រធានផ្នែកកម្មវិធីស្ត្រី នៅអង្គការសិទ្ធិមនុស្សអាដហុក បានថ្លែងថា លោកស្រីបានទទួលករណីជួញដូរពលករជិត ១០០ ករណីបន្ថែមទៀត នៃបុរសជនជាតិកម្ពុជា ដែលត្រូវបានជាប់នៅក្នុងប្រទេសម៉ាឡេស៊ី ជប៉ុន ចិន អាហ្វ្រិកខាងត្បូង និងប្រទេសនេប៉ាល់ បន្ទាប់ពីការរត់គេចចេញពីទូកនេសាទ។
លោកស្រីបន្ថែមថា៖ «តាមដែលយើងដឹង ពួកគេត្រូវបានលួងលោម ដោយមេខ្យល់ ប៉ុន្តែរហូតមកដល់ឥឡូវនេះ មិនទាន់មានមេខ្យល់ណាម្នាក់ ត្រូវបានចាប់ខ្លួនយកទៅកាត់ទោសនៅឡើយទេ»៕
0 comments:
Please add comment to express your opinion, and share it on Twitter or Facebook. Thank you in advance.