កណ្តាលៈ ចៅក្រម ហួត ហ៊ាង ក្នុងចំណោមចៅក្រមពីរនាក់នៃសាលាដំបូងខេត្តកណ្តាលដែលត្រូវចាប់ខ្លួន កាលពីថ្ងៃសុក្រ ដោយអង្គភាពប្រឆាំងអំពើពុករលួយពីបទស៊ីសំណូក ត្រូវបានឃុំខ្លួននៅពន្ធនាគារព្រៃស ពីបទស៊ីសំណូកចំនួន ៥០០០ដុល្លារ រីឯចៅក្រម ខូវ ចាន់ថូ ត្រូវបានលើកលែងការចោទវិញ។ នេះបើយោងតាមមន្រ្តីតុលាការថ្លែងឲ្យដឹងកាលពីថ្ងៃម្សិលមិញ។
លោក អ៊ុក គីមសិដ្ឋ ព្រះរាជអាជ្ញាសាលាដំបូងខេត្តកណ្តាល បានប្រាប់ភ្នំពេញ ប៉ុស្តិ៍ កាលពីម្សិលមិញថា ចៅក្រមសាលាដំបូងខេត្តកណ្តាលម្នាក់ ត្រូវបានចោទប្រកាន់ពីបទស៊ីសំណូក ហើយត្រូវបានបញ្ជូនទៅឃុំឃាំងបណ្តោះអាសន្ននៅពន្ធនាគារព្រៃស បន្ទាប់ពីផ្តល់ចម្លើយកាលពីម្សិលមិញ។
លោក បានបន្តថា៖ «ចៅក្រម ហួត ហ៊ាង ត្រូវបានចោទប្រកាន់ពីបទស៊ីសំណូក ហើយបញ្ជូនទៅព្រៃស ប៉ុន្តែលោកស្រីចៅក្រម ខូវ ចាន់ថូ មិនត្រូវបានចោទប្រកាន់នោះទេ»។
លោក កែវ រ៉េមី អ្នកនាំពាក្យអង្គភាពប្រឆាំងអំពើពុករលួយ និងជាសមាជិកក្រុមប្រឹក្សាជាតិប្រឆាំងអំពើពុករលួយ បានប្រាប់ភ្នំពេញ ប៉ុស្តិ៍ ថា បន្ទាប់ពីតុលាការបញ្ចប់ការសាកសួរជនសង្ស័យ ព្រះរាជអាជ្ញាបានចោទប្រកាន់លោក ហួត ហ៊ាង ពីបទស៊ីសំណូក តាមមាត្រា ៥១៧ នៃក្រម ព្រហ្មទណ្ឌ ប៉ុន្តែលោកស្រីចៅក្រម ខូវ ចាន់ថូ ត្រូវបានដោះលែង ព្រោះលោកស្រី មិនបានទទួលផលប្រយោជន៍ពីអំពើស៊ីសំណូកនេះឡើយ។
លោកបានបន្តទៀតថា៖ «មុនពេលខ្ញុំចាកចេញពីតុលាការ ខ្ញុំឃើញនគរបាលយុតិ្តធម៌បញ្ជូនអតីតចៅក្រម [ហួត ហ៊ាង] ទៅព្រៃស ហើយដោះលែងលោកស្រីចៅក្រម»។ លោកបានបន្តថា ចៅក្រមពីរនាក់ និងមន្រ្តីសុរិយាដីម្នាក់ក្នុងខេត្តកណ្តាល ត្រូវបានចាប់ខ្លួន កាលពីរសៀលថ្ងៃសុក្រ ហើយពួកគេត្រូវបាននាំខ្លួនទៅអង្គភាពប្រឆាំងអំពើពុករលួយ ដើម្បីសាកសួរ។
លោកបានបន្តឲ្យដឹងទៀតថា៖ «យើងឃុំខ្លួនពួកគេនៅអង្គភាពប្រឆាំងអំពើពុករលួយ ដើម្បីសាកសួរ ហើយយើងបានបញ្ជូនពួកគេទៅតុលាការខេត្តកណ្តាលព្រមជាមួយនឹងឯកសារ សារភាព»។
លោក កែវ រ៉េមី បានបន្ថែមថា បន្ទាប់ពីបានសាកសួរពួកគេរួច អង្គភាពប្រឆាំងអំពើពុករលួយបានរកឃើញថា មានតែចៅក្រមម្នាក់ប៉ុណ្ណោះ ដែលពាក់ព័ន្ធនឹងករណីទារប្រាក់ជនរងគ្រោះ ក្នុងវិវាទដីធ្លី។
លោក កែវ រ៉េមី បានបន្តថា ៖ «យោងតាមចម្លើយសារភាព លោក ហួត ហ៊ាង បានប្រាប់ថា លោកទារប្រាក់តែ ៥ ពាន់ដុល្លារប៉ុណ្ណោះ ពីជនរងគ្រោះ។ វាមិនពាក់ព័ន្ធនឹងចៅក្រម ខូវ ចាន់ថូ ទេ»។
មន្រ្តីអង្គភាពប្រឆាំងអំពើពុករលួយបានចាប់ខ្លួនលោកស្រី ខូវ ចាន់ថូ ដើម្បីសាកសួរ ព្រោះលោកស្រី ក៏ស្ថិតនៅក្នុងបន្ទប់ជាមួយនឹងចៅក្រម ហួត ហ៊ាង ដែរ ពេលមន្រ្តីអង្គភាពចុះទៅបង្រ្កាប។
លោក កែវ រ៉េមី បានបន្ថែមថា៖«យើងបានចាប់ខ្លួនពួកគេពេលចុះបង្រ្កាប នៅក្នុងបន្ទប់តុលាការ ហើយយើងនាំពួកគេមកអង្គភាពប្រឆាំងអំពើពុករលួយ ដើម្បីសាកសួរ»។
លោកបានបន្តថា ៖ «លោក ចៅក្រម ហួត ហ៊ាង បានប្រាប់យើងថា ប្រាក់ដែលគាត់ទារពីជនរងគ្រោះមិនពាក់ព័ន្ធនឹងចៅក្រម ខូវ ចាន់ថូ នោះទេ។ ជនរងគ្រោះ ក្នុងរឿងក្តី បានស្នើចៅក្រម ខូវ ចាន់ថូ ឲ្យធ្វើជាសាក្សី ព្រោះលោកស្រី ជាមិត្តភក្តិរបស់ជនរងគ្រោះ។ លោកស្រីមិនពាក់ព័ន្ធនឹងប្រាក់នេះទេ»។
លោក កែវ រ៉េមី បន្តថា ចៅក្រម ហួត ហ៊ាង អាចប្រឈមនឹងបទចោទប្រកាន់ស៊ីសំណូក ដែលបង្កឡើង ដោយចៅក្រម ហើយអាចប្រឈមទោសពី ៧ ទៅ ១០ ឆ្នាំ បើយោងតាមក្រមព្រហ្មទណ្ឌ។ លោកបានលើកឡើងថា៖ «យើងបានបញ្ជូនចៅក្រមជាមួយនឹងឯកសារ សារភាពទៅព្រះរាជអាជ្ញាខេត្តកណ្តាល។ មានតែព្រះរាជអាជ្ញាទេ ដែលជាអ្នកសម្រេចត្រូវចោទប្រកាន់ ឬដោះលែងចៅក្រម ខូវ ចាន់ថូ។ ប៉ុន្តែ យើងមានឯកសារបង្ហាញព្រះរាជអាជ្ញាថា ចៅក្រមមិនពាក់ព័ន្ធនឹងការទារប្រាក់នោះទេ»។
លោក កែវ រ៉េមី បានបន្ថែមថា លោក ហួត ហ៊ាង បានគំរាមទារប្រាក់ ៥ ពាន់ ដុល្លារអាមេរិកពីជនរងគ្រោះក្នុងវិវាទដីធ្លីថា ដីកាចាប់ខ្លួនត្រូវបានចេញរួចហើយ ប៉ុន្តែ នៅរង់ចាំចុះហត្ថលេខា។ ជនរងគ្រោះ បានដាក់ពាក្យបណ្តឹងមកអង្គភាពប្រឆាំងអំពើពុករលួយ ហើយពួកគេត្រូវចាប់ខ្លួនពេលកំពុងទទួលប្រាក់»។
លោកបានបន្តថា៖ «យើងបានស៊ើបអង្កេត និងស្រាវជ្រាវយ៉ាងប្រុងប្រយ័ត្ន ក្នុងរឿងក្តីនេះ មុនពេលចាប់ខ្លួនអ្នកណាម្នាក់។ យើងបានទទួលជោគជ័យហើយមន្រ្តីអង្គការក្រៅរដ្ឋាភិបាលអបអរសាទរ ការងាររបស់យើង»។ លោកបានបន្ថែមថា មានមន្រ្តីពុករលួយជាច្រើននាក់ ប៉ុន្តែលោកបានបដិសេធមិនផ្តល់ការអត្ថាធិប្បាយទេ៕ source
0 comments:
Please add comment to express your opinion, and share it on Twitter or Facebook. Thank you in advance.