“អីយ៉ា! ស្អាតដូចតួកុនវើយ…!”។ នេះគឺជាពាក្យពេចន៍ដែលប្រិយមិត្តអ្នកអានធ្លាប់បានលឺ និងនិយាយជាញឹកញយ នៅពេលដែលក្រឡេកឃើញស្រីស្អាត ឬប្រុសស្អាត។ ទន្ទឹមគ្នានេះក៏មានមហាជនជាច្រើនមានចម្ងល់ និងបានចោទជាសំណួរថា តើតារាសម្ដែង ឬតួកុន ទាល់តែស្អាតមែនទេ?
ឆ្លើយតបទៅនឹងការងឿងឆ្ងល់របស់មហាជននេះ អ្នកស្រី ពាន់ ភួងបុប្ផា អ្នកនិពន្ធ និងដឹកនាំរឿងចាស់វស្សាមួយរូបបានមានប្រសាសន៍ថា នៅលើពិភពលោកប្រទេសណាក៏ជ្រើសរើសយកតារាសម្ដែងស្អាតៗដើម្បីសម្ដែងជាតួឯក ឬតួអង្គសំខាន់ក្នុងរឿងដែរ ព្រោះការសម្ដែងខ្សែភាពយន្ត ឬសិល្បៈចម្រៀង ត្រូវតែស្រស់ស្អាត និងមានភាពទាក់ទាញ។
អ្នកស្រីបន្ដថា “ប្រសិនបើតួអង្គសម្ដែងមិនសូវមានរូបសម្បត្តិស្អាត តែគាត់មានចំណេះដឹង និងទេពកោសល្យល្អ អ្នកដឹកនាំរឿងអាចឲ្យសម្ដែងជាតួអង្គសំខាន់បានអាស្រ័យទៅលើប្រភេទ ឬខ្លឹមសារនៃរឿង”។
អ្នកស្រីបញ្ជាក់ថា ចំពោះតារាសម្ដែងដែលមានរូបសម្បត្តិល្អតែគាត់អត់មានចំណេះដឹងក្នុងការទន្ទេញប៉ារ៉ូលសម្ដែង និងទេពកោសល្យពីកំណើតដើម្បីសម្ដែងនៅក្នុងឈុតឆាកសំខាន់ៗដូចជា ការយំ ស្រែក ធ្វើឲ្យដូចជារឿងពិតៗ ដើម្បីឲ្យទស្សនិកជនមើលទៅជក់ចិត្ត និងចង់តាមដានបន្ត។
មានការកត់សម្គាល់ផ្សេងពីអ្នកស្រី លោក សុះ ម៉ាច សិល្បករជើងចាស់ម្នាក់ និងជាប្រធានសមាគមសិល្បករខ្មែរ បានមានលកឡើងថា រហូតមកដល់ពេលនេះប្រទេសកម្ពុជាមិនទាន់មានច្បាប់ ឬគោលការណ៍ណែនាំណាមួយ អំពីលក្ខណៈសម្បត្តិ នៃការជ្រើសរើសតួអង្គសម្ដែងនៅឡើយទេ។
ដោយឡែកអ្នកនិពន្ធ និងអ្នកដឹកនាំរឿងភាគច្រើន ជ្រើសរើសយកតែតារាណាដែលមានរូបសម្បត្តិស្អាត ឬសង្ហាប៉ុណ្ណោះ។ ចំពោះចំណេះដឹងគឺជាជំហានទីពីរក្នុងការជ្រើសរើសឲ្យចូលសម្ដែង។ លោកបានបន្តថា “ពេលខ្លះមិន ចាំបាច់មានទេពកោសល្យ និងចំណេះដឹង គឺឲ្យតែមានរូបសម្បត្តិស្អាត គេទទួលយកទៅសម្ដែងតែម្ដង។ ហើយការធ្វើបែបនេះយើងអាចនិយាយបានថារវាងអ្នកដឹកនាំរឿង និងតួសម្ដែងជាសាច់ញាតិ ឬស្គាល់គ្នាក៏អាចថាបាន ព្រោះយើងមិនទាន់មានច្បាប់ ឬក្រឹត្យក្រមណាមួយនិយាយពីរឿងនេះនៅឡើយ”។
ទោះជា យ៉ាងណាលោកបាន ទទួលស្គាល់ថា តារាសម្ដែងមួយចំនួនដែលមានរូបសម្បត្តិស្រស់ ស្អាត ឬសង្ហាហើយ តែមិនត្រូវបានអ្នកនិពន្ធ និងអ្នកដឹកនាំរឿងឲ្យដើរតួឯក ឬតួអង្គសំខាន់ក្នុងរឿងឡើយ ព្រោះគេរកតួអង្គណាដែលមានរូបសម្បត្តិសាកសមទៅនឹងខ្លឹមសារនៃរឿងនីមួយៗ។
ចំណែកតារាសម្ដែងជើងចាស់ អ្នកស្រី ឌី សាវ៉េត ដែលបច្ចុប្បន្នជាគ្រូបង្រៀនសិល្បករ បានមានប្រសាសន៍ថា អ្នកស្រីចូលប្រឡូកក្នុងសិល្បៈតាំងពីអាយុ១៦ឆ្នាំ ដែលកាលនោះអ្នកស្រីចូលប្រឡងកញ្ញាឯក បង្ហាញម៉ូដ និងចូលប្រឡងក្នុងកម្មវិធីភាពសង្ហារបស់រថយន្ត ហើយទទួលបានជោគជ័យជាហូរហែរ។
បន្ទាប់ពីនោះអ្នកស្រីត្រូវបានផលិតកម្មខ្សែភាពយន្តមួយអញ្ជើញឲ្យចូលរួមសម្ដែងជាតួអង្គសំខាន់ក្នុងរឿង ដោយមើលឃើញរូបសម្បត្តិល្អ។ អ្នកស្រីបានបញ្ជាក់ថា “កាលណោះជំហានដំបូងគេមើលលើរូបសម្បត្តិខ្ញុំ ចំពោះទេពកោសល្យ និងចំណេះដឹងសំខាន់ក៏ដែរ តែគេត្រូវជ្រើសរើសតួឲ្យស៊ីទៅនឹងសាច់រឿង ហើយពេលសម្ដែងហ្នឹងខ្ញុំមានការលំបាកមែនទែន ដោយពេលហ្នឹងខ្ញុំថ្មីទើបចូលសម្ដែងដំបូង”។ ទោះជាយ៉ាងណាអ្នកស្រីទទួលស្គាល់ថា រូបសម្បត្តិ ចំណេះដឹង និងទេពកោសល្យត្រូវតែមានទាំងព្រមសម្រាប់តារាសម្ដែងឯក ឬតួអង្គសំខាន់ក្នុងរឿង។
ស្រដៀងគ្នាទៅនឹងការលើកឡើង របស់អ្នកស្រី ឌី សាវ៉េត គឺកញ្ញា ម៉ាកសែន សូនីតា តារាសម្ដែងជំនាន់ក្រោយ ដែលមានរូបសម្រស់ស្រស់សោភា បានបង្ហាញពីចំណាប់អារម្មណ៍របស់ខ្លួនថា រូបសម្បត្តិគឺជាផ្នែកមួយយ៉ាងសំខាន់ ក្នុងចំណោមធាតុផ្សំសំខាន់ផ្សេងៗទៀត។ តារាសម្ដែងរូបនេះបានបន្តទៀតថា “ប្រសិនបើរូបសម្បត្តិអន់ហើយ គឺលំបាកនឹងធ្វើឲ្យទស្សនិកជនចាប់អារម្មណ៍ណាស់ ប៉ុន្តែតារាសម្ដែងត្រូវតែមានទេពកោសល្យពីកំណើត បូកផ្សំជាមួយនឹងចំណេះដឹងផ្សំផងដែរទើបអាចទៅរួច។ កាលពីខ្ញុំចូលសម្ដែងដំបូងគ្រប់ឈុត ឆាកទាំងអស់សុទ្ធតែមានការពិបាក”។
ខ្សែភាពយន្តខ្មែរមួយចំនួនបានរងការរិះគន់ពីអ្នកទស្សនាដោយសារតែតួសំដែងហាក់ចូលតួ មិនសម មិនស៊ីនឹងសាច់រឿងជាដើម។ ការទាំងនេះ ត្រូវសាធារណជន ព្រលយឲ្យដឹងថា មកតែពីយកតែតួមានរូបសម្រស់ស្អាតសំដែង ដោយមិនគិតពីភាពប៉ិនប្រសព្វ និងទេពកោសល្យពីកំណើត។ ប៉ុន្តែ គេក៏សង្កេតឃើញតួអង្គដែលមានរូបសម្រសស្រស់ស្អាតមួយចំនួនមានទេពកោសល្យខាងសំដែងដែរ។ ក្រៅពីនេះ ក៏មានការកត់សំគាល់ដែរថា តារាដែលមានលក្ខណៈសម្បត្តិមិនសូវស្អាតក៏សំដែលមិនសមដែរ។ បើតាមការលើកឡើងខាងលើៗ អ្នកដឹកនាំរឿង គួរជ្រើសរើសតួដោយគិតទាំងចំណេះដឹង ទេពកោសល្យ ភាពប៉ិនប្រសព្វ ដោយមិនផ្តោតតែលើរូបសម្បត្តិមួយមុខគត់នោះទេ៕
0 comments:
Please add comment to express your opinion, and share it on Twitter or Facebook. Thank you in advance.