ក្នុងសប្តាហ៍នេះ មន្រ្តីសមត្ថកិច្ចផ្នែកសុខាភិបាលបារាំង នឹងសំរេចថា តើត្រូវសំណូមពរឲ្យស្រ្តី ៣០.០០០នាក់ ដែលបានបញ្ចូលកញ្ចប់ Silicon នៅក្នុងសុដន់ត្រូវវះកាត់យកចេញ ឲ្យបានឆាប់ដែរ ឬទេ បន្ទាប់ពីមានកង្វល់ថា កញ្ចប់លាយ Poly Implant Prothese (PIP) ធ្វើឲ្យប៉ះពាល់ដល់សុខភាពនោះ។
តាមសារព័ត៌មាន Liberation កាលពីឆ្នាំទៅមិញ ក្រុមអ្នកជំនាញការបានរកឃើញថា កញ្ចប់លាយ PIP ដែលផ្ទុកប្រភេទ gel Silicone មិនស្របច្បាប់ មានភាគរយនៃការបែកខ្ពស់លើសប្លែកពីធម្មតា។ រដ្ឋាភិបាលបារាំងបានបង្កើតគណៈកម្មាធិការពិសេសមួយ ដើម្បីស្វែងយល់បញ្ហានេះ។
បណ្ឌិត Laurent Lantienri អ្នកឯកទេសវះកាត់កែសម្ផស្ស ស្ថិតក្នុងគណៈកម្មាធិការខាងលើ បានពោលថាៈ យើងត្រូវកំចាត់ចោលកញ្ចប់ទ្រសុដន់ទាំងអស់នេះ។ យើងទាំងអស់គ្នា កំំពុងប្រឈមនូវវិបត្តិសុខភាពទាក់ទិនដល់ការឆបោក។
អ្នកនាំពាក្យរដ្ឋាភិបាលបានឲ្យដឹងថា ស្រ្តីទាំងអស់ដែលធ្លាប់បានបញ្ចូលកញ្ចប់ PIP សុទ្ធតែត្រូវទៅជួបវេជ្ជបណ្ឌិតភ្លាម។ ប៉ុន្តែបើតាមមន្រ្តីម្នាក់របស់ក្រសួងសុខាភិបាលបារាំងនោះ បច្ចុប្បន្នពុំទាន់មានគ្រោះថ្នាក់ភ្លាមៗ ដល់សុខភាពអ្នកដែលបានដាក់កញ្ចប់ Silicon ឡើយ។
ការស៊ើបអង្កេតកាលពីឆ្នាំទៅមិញ បានបង្ហាញថា កញ្ចប់ទ្រសុដន់ PIP មានសមាមាត្របែកធ្លាយជាងប្រភេទកញ្ចប់ផ្សេងទៀត ហើយប្រភេទ Silicon ក្នុងនោះ ក៏ពុំត្រូវបានអនុញ្ញាតិឲ្យប្រើប្រាស់ក្នុងវិស័យសុខាភិបាលដែរ។
តាំងពីការរកឃើញមកទល់ពេលនេះ មានមនុស្សជាង ៥០០នាក់ យកកញ្ចប់នេះចេញ ហើយគេក៏បានឃើញករណីកើតមហារីកដោះចំនួន ៨ ក្នុងចំណោមអ្នកទាំងនោះផងដែរ៕
0 comments:
Please add comment to express your opinion, and share it on Twitter or Facebook. Thank you in advance.