ប្រជាពលរដ្ឋរាប់រយគ្រួសាររស់នៅក្នុងឃុំបាក់ខ្លង ស្រុកមណ្ឌលសីមា ខេត្តកោះកុង ដែលបានតាំងទីលំនៅ នៅលើភ្នំមួយ បានស្នើសុំឲ្យអាជ្ញាធរធ្វើការអភិវឌ្ឍន៍តំបន់ដែលពួកគាត់កំពុងរស់នៅ ដូចពលរដ្ឋដែលរស់នៅតាមភូមិធម្មតាដែរ។
៧-កុម្ភៈ-២០១២៖ ផ្លូវក្រួសក្រហមឆ្ពោះទៅកាន់ឃុំបាក់ខ្លង ស្រុកមណ្ឌលសីមា ខេត្តកោះកុង
ក្នុងស្ថានភាពផ្លូវក្រួសក្រហមដែលកំពុងអភិវឌ្ឍន៍ជាបណ្ដើរៗ ឆ្ពោះទៅលើភ្នំ ដើម្បីឆ្លងកាត់ពីព្រំប្រទល់ស្រុកមណ្ឌលសីមា ខេត្តកោះកុង ទៅស្រុកវាលវែងខេត្តពោធិ៍សាត់ មានផ្ទះប្រជាពលរដ្ឋរស់នៅតាមជម្រាលភ្នំជាបន្តបន្ទាប់។
ភ្នំនោះពុំមានឈ្មោះទេ ប៉ុន្តែនៅពេលគេធ្វើដំណើរទៅដល់ភូមិចាំយាម ឬហៅថាភូមិថ្មី ក្បែរច្រកឆ្លងដែនព្រំដែនខ្មែរ-ថៃ ស្ថិតក្នុងឃុំបាក់ខ្លង ស្រុកមណ្ឌលសីមា ខេត្តកោះកុង គេនិងឃើញមានភ្នំមួយនៅខាងស្ដាំដៃ ហើយមានផ្ទះប្រជាពលរដ្ឋរស់នៅលើភ្នំនោះជាហូរហែ។
ប្រជាពលរដ្ឋដែលរស់នៅលើភ្នំនោះ បានអះអាងថា ពួកគាត់បានរស់នៅទីនេះ មិនតិចជាងដប់ឆ្នាំនោះឡើយ។ ហើយពួកគាត់ចង់ឲ្យរដ្ឋាភិបាល និងអាជ្ញាធរខេត្តអភិវឌ្ឍន៍តំបន់នោះ។
ម្ចាស់ផ្ទះឈើសង់ផ្ទាល់ដីនៅលើចង្កេះភ្នំ គឺអ្នកស្រី វង្ស សុភឿន ថ្លែងថា អ្វីដែលគាត់ចង់បាននោះ គឺចង់ឲ្យអាជ្ញាធរអភិវឌ្ឍន៍តំបន់នេះ ដូចពលរដ្ឋដែលរស់នៅតាមភូមិធម្មតាដែរ។ អ្នកស្រីថា បញ្ហាចំពោះមុខរបស់ពលរដ្ឋរស់នៅលើភ្នំគឺជាបញ្ហាខ្វះទឹកស្អាតប្រើប្រាស់ ៖ "ចង់បានផ្លូវមានភ្លើងមានទឹកអីរកស៊ីដូចគេដូចឯងដែរហ្នឹងណា ដូចនៅក្រោមដែរគេតភ្លើងតអីមកយើងស្រួល ធម្មតាខ្វះខាតគ្រប់យើងពិបាករស់នៅដែរហ្នឹង។ បើទឹកអូរ បងឯងដឹងទេ ទឹកអូរទឹកភ្នំម៉េចវិញ នៅលើភ្នំនេះខ្លះណាអ៊ីចឹងគ្នានៅឆ្ងាយដាច់ស្រយាលអត់មានទេទឹក ឡើងទៅលើតិចទៀតយ៉ាប់ទឹកគ្នានៅលើភ្នំខ្ពស់ ពិបាកទឹកណាស់"។
ស្ត្រីឈ្មោះ សុម ខុម រស់នៅលើភ្នំចំណុចវង្សកឋៈ មានប្រសាសន៍ថា ជារៀងរាល់ឆ្នាំ ប្រជាពលរដ្ឋតែងតែទទួលបានការអប់រំផ្នែកសុខភាព អនាម័យពីអង្គការក្រៅរដ្ឋាភិបាល និងបានមុងជ្រលក់ថ្នាំពីមណ្ឌលសុខភាពរបស់រដ្ឋ។ គាត់ថា ពលរដ្ឋកំពុងទន្ទឹងរង់ចាំអំណោយនេះ ពីព្រោះប្រជាពលរដ្ឋនៅតំបន់គាត់កំពុងរស់នៅភាគច្រើនមានជីវភាពក្រីក្រ និងជាអ្នកចំណាកស្រុករស់នៅចាំចម្ការឲ្យគេជាដើម ៖ "មានដាំអីទេអូនដាំអត់បានយើងដាំដូចជា បន្លែត្រកួនអីដាំមិនបានហូបទេ វាឫសឈើឫសស្លាឫសដូងអី។ ចូលទៅក្នុងធូរេនអ៊ីចេះហ្នឹងមូសអើយមូស។ មូសសុទ្ធតែមូសខ្លា មើលកូនខ្ញុំមកវិញហើយវាអត់មុងអត់អីផង មុងដាច់ខ្ទេចខ្ទីអស់ហើយ អត់ហើយមានលុយទិញឯណា ចេះតែប៉ះប៉ុនទៅ"។
ឆ្លើយតបបញ្ហានេះ ប្រធានមណ្ឌលសុខភាពនាងកុក លោកស្រី ស៊ីង ច័ន្ទវាសនា បានឲ្យដឹងនៅថ្ងៃទី០៧កុម្ភៈថា ចំណុចវង្សកឋៈ គឺជាតំបន់គោលដៅនៃជំងឺគ្រុនចាញ់ ដែលមណ្ឌលសុខភាពនេះអាចនឹងបើកយុទ្ធនាការចែកមុងជ្រលក់ថ្នាំនៅចុងខែកុម្ភៈនេះ។
ទីដែលប្រជាពលរដ្ឋកំពុងរស់នៅលើភ្នំនោះ អាជ្ញាធរបានដៅចំណុច ឈ្មោះថា ចំណុចវង្សកឋៈ ប្រានីត ខណាំខៀវ គីរីវង្ស និងចំណុចថ្មអណ្ដែត ក្រោមការគ្រប់គ្រងរបស់ភូមិចាំយាម មានពលរដ្ឋសរុបទាំងខ្មែរនិងជនជាតិចាម ចំនួន៩៥២គ្រួសារ នេះបើតាមលោកប្រធានភូមិចាំយាម។
នាយករងសេនាធិការនគរបាលការពារព្រំដែនគោក លោក ម៉ឹង ថា បញ្ជាក់បន្ថែម ៖ "នៅខាងលើនេះ តាមខ្ញុំស្រាវជ្រាវក្នុងផែនទីនោះគឺ មាន កម្ពស់ភ្នំ ១៩៩ម៉ែត្រ ២៥៥ ១៩៣ ៣៩១ ២០៧ និងឆ្លងទៅដល់ភ្នំត្រងោល៣២៩ ចប់ពីនោះទៅគឺឆ្លងចូលដី ខេត្តពោធិ៍សាត់"។
ប្រធានភូមិចាំយាម ឬហៅថាភូមិថ្មី លោក សេង សាយ ថ្លែងថា ប្រជាពលរដ្ឋមកតាំងទីលំនៅលើភ្នំនោះ តាំងពីឆ្នាំ១៩៩៤ និង១៩៩៥មកម្ល៉េះ។ លោកទទួលស្គាល់ចំពោះការលំបាកដែលពលរដ្ឋនៅតំបន់នោះកំពុងជួបប្រទះ ដូចជា តំបន់នោះសម្បូរដោយសត្វមូស កង្វះទឹកស្អាត និងគ្មានអគ្គិសនីប្រើប្រាស់។ ប៉ុន្តែតាមការដាក់គម្រោងស្នើសុំកន្លងមកគាត់ពុំឃើញមានការឆ្លើយតបឡើយ ៖ "នៅទីនេះនិយាយរួមទៅចម្ការតិចតួចគាត់ធ្វើនេះធ្វើនោះ និយាយរួមទៅគាត់រស់នៅឯកោដែរទេ។ កាលពីមុនគាត់គិតថា ចង់បានដីធ្លី គាត់ទៅកាប់ឆ្ការអ៊ីចឹងទៅ គាត់ដាំពោត ដាំនេះ ដាំនោះ ដាំចន្ទីដាំអ៊ីចឹងបាន។ ជួនកាលគាត់ក៏រស់នៅក្នុងនោះបានតែដល់ពេលខ្លះអត់មានអ៊ីចឹង គាត់ចេញមកធ្វើសំណង់ធ្វើអីទៅណា។ ចង់អំពាវនាវឲ្យ មានអង្គការជួយគាត់ដូចជា ពាក់ព័ន្ធភ្លើង ទឹកដូចជាមានធុងចម្រោះ ដើម្បីកាត់បន្ថយរោគអី ដើម្បីសុខភាពគាត់អ៊ីចឹងណា"។
ទាក់ទងបញ្ហានេះ អភិបាលរងខេត្តកោះកុង លោក អ៊ុន ឆាលី មានប្រសាសន៍ថា តំបន់ដែលពលរដ្ឋរស់នៅលើភ្នំនោះ នឹងបានស្នើសុំឲ្យមានការអភិវឌ្ឍន៍នោះ គឺជាតំបន់មួយស្ថិតនៅក្នុងផែនការអភិវឌ្ឍន៍ខ្សែក្រវាត់ព្រំដែន ដែលអាជ្ញាធរខេត្តចង់ឲ្យមានពលរដ្ឋរស់នៅកុះករនាពេលអនាគត។
យ៉ាងណាក៏ដោយប្រជាពលរដ្ឋដែលទៅរស់នៅលើភ្នំទាំងនោះ មន្ត្រីអាជ្ញាធរខេត្តបញ្ជាក់ថា នៅពុំទាន់ចេញលិខិតបញ្ជាក់ឬលិខិតកាន់កាប់ដីធ្លីដែលពួកគាត់កំពុងរស់នៅនោះឡើយ៕
0 comments:
Please add comment to express your opinion, and share it on Twitter or Facebook. Thank you in advance.