ភាពយន្តខ្មែរទី៣រឿង “ស្នេហ៍គ្រាដំបូង” ត្រូវបានចាក់បញ្ចាំងជាលើកដំបូងនៅរោភាពយន្តលំដាប់អន្តរជាតិ The Cineplex ផ្សារទំនើបសូរិយា ជាន់ទី៥ កាលពីម្សិលមិញ ក្រោមវត្តមានតារាស្រី ប្រុស អ្នកដឹកនាំរឿង ចាងហ្វាងផលិតកម្ម SRGB ក៏ដូចជាប្រិយមិត្តនានាទៅចូលរួមគាំទ្រលើកទឹកចិត្តយ៉ាងច្រើនកុះករ។
តួឯកស្រីដ៏ស្រស់ស្អាត កញ្ញា ហ៊ុយ ច័ន្ទរាជនី Freshier Girl លេខ១ឆ្នាំ២០១១ បានសម្ដែងក្ដីរំភើបថា កញ្ញាស្ទើរតែមិនជឿទាល់តែសោះថាក្រោយពីជាប់ Freshier Girl មិនទាន់បាត់ក្ដៅផង ស្រាប់តែត្រូវទទួលតំណែងជាតួឯកស្រីក្នុងរឿង “ស្នេហ៍គ្រាដំបូង” នេះភ្លាមៗ ដែលធ្វើឲ្យកញ្ញា ភ័យផង អរផង ព្រោះមិនធ្លាប់មានបទពិសោធន៍សម្ដែងពីមុនមក។ ទទួលស្គាល់នូវការលំបាក កញ្ញាក៏បានគូសបញ្ជាក់ថា ការណែនាំ និងកែតម្រូវពីក្រុមការងារបានធ្វើឲ្យអ្វីៗដំណើរការណ៍បានប្រសើរដូចថ្ងៃនេះ។
ស្របគ្នានេះ ជាមួយទឹកមុខញញឹមញញែម ប្រកបដោយក្ដីរីករាយ អ្នកដឹកនាំរឿង លោក លាង ខេងហេង ក៏បាននិយាយដែរថា លោកមានសេចក្ដីសោមនស្សជាខ្លាំងនៅពេលដែលឃើញស្នាដៃថ្មីនេះទទួលបានការគាំទ្រយ៉ាងច្រើនពីសំណាក់ទស្សនិកជន។ លោកបានបន្ថែមថា ការចូលរួមគាំទ្រនេះជាសញ្ញាបញ្ជាក់ពីការរីកចម្រើនទៅមុខនៃសិល្បៈភាពយន្តខ្មែរ។ ដោយឡែកនៅពេលត្រូវចោទសួរពីមូលហេតុដែលតម្រូវឲ្យរូបលោកជ្រើសរើស កញ្ញាដ៏ស្រស់សោភា ហ៊ុយ ច័ន្ទរាជនី ជាតួអង្គឯកក្នុងរឿងថ្មីនេះ លោកបានបង្ហើបថាគឺផ្អែកលើកត្តាពីរ ទី១ គឺកញ្ញាមានកេរ្តិ៍ឈ្មោះស្រាប់ក្នុងនាមជា Freshier Girl ចំណាត់ថ្នាក់លេខ១ និងទី ២ គឺសាច់រឿងនេះនិយាយពីសែស្រឡាយចិន ដែលកញ្ញាមានមុខមាត់ស្រដៀងផងដែរ។
ទន្ទឹមគ្នានេះ លោកបានលើកឡើងពីផលវិបាកដែលកើតមានឡើងនៅពេលខ្លះដោយហេតុថា កញ្ញាជាតួសម្ដែងថ្មី តែទោះជាយ៉ាងណា ការបង្ហាត់បង្ហាញជាមុន គួបផ្សំនឹងការខិតខំប្រឹងប្រែងរបស់កញ្ញាផ្ទាល់ អ្វីៗគ្រប់យ៉ាងបានប្រព្រឹត្តិទៅមុខយ៉ាងរលូន។ ជាចុងក្រោយអ្នកដឹកនាំរូបនេះ បានអំពាវនាវឲ្យទស្សនិកជនបន្តគាំទ្ររឿងនេះឲ្យបានច្រើន ដែលនេះជាកម្លាំងចិត្តដល់រូបលោកផ្ទាល់ក្នុងការបន្តផលិតភាពយន្តក្រោយៗទៀត ក៏ដូចជាលើកស្ទួយវិស័យភាពយន្តជាតិផងដែរ។
ចុះប្រិយមិត្តវិញ បានទស្សនាខ្សែភាពយន្តថ្មីនេះហើយឬនៅ? បើមិនទាន់បានទស្សនាទេ សូមប្រញាប់រួសរាន់ទៅទស្សនាឲ្យបានទាំងអស់គ្នា នៅរោងភាពយន្ត The Cineplex ផ្សារទំនើបសូរិយា ជាន់ទី៥ ជារៀងរាល់ថ្ងៃ។ កុំឲ្យរំលងឲ្យសោះណា!
0 comments:
Please add comment to express your opinion, and share it on Twitter or Facebook. Thank you in advance.