រាជធានីភ្នំពេញ ៖ ជនសង្ស័យចំនួន៩នាក់ត្រូវបានសមត្ថកិច្ចនគរបាលផ្នែកព្រហ្មទណ្ឌខណ្ឌចំការមន ដឹកនាំដោយលោកវរសេនីយ៍ត្រី ហ៊ាង ថារ៉េត អធិការរងនគរបាលខណ្ឌចំការមន និងលោកយឹម ហួង ប្រធានផ្នែកព្រហ្មទណ្ឌខណ្ឌចំការមន ដោយមានបញ្ជាដឹកនាំពីលោកវរសេនីយ៍ឯក អ៊ុច សុខុន អធិការនគរបាលខណ្ឌបានបើកប្រតិបត្តិការស្រាវជ្រាវចាប់ខ្លួនបានបន្តបន្ទាប់កាលពីថ្ងៃទី៩ មករា ឆ្នាំ២០១២ ។
លោកវរសេនីយ៍ឯក អ៊ុច សុខុន អធិការនគរបាលខណ្ឌចំការមន បានមានប្រសាសន៍ថា ជនសង្ស័យទាំង៩នាក់ដែលសមត្ថកិច្ចចាប់ខ្លួនបាន គឺសុទ្ធសឹងជាមុខសញ្ញាចោរប្លន់ម៉ូតូស៊េរីទំនើប (ស្គូពី) និងជាមុខសញ្ញាឆក់យ៉ាងសកម្មក្នុងរាជធានីភ្នំពេញ ។ ដូច្នេះក្រោយការឃាត់ខ្លួនជនសង្ស័យទាំង៩នាក់នេះ សមត្ថកិច្ចបានកសាងសំណុំរឿងបញ្ជូនពួកគេទៅសាលាដំបូងរាជធានី ដើម្បីផ្តន្ទាទោសតាមច្បាប់។ ទន្ទឹមនឹងនេះដែរ សមត្ថកិច្ចក៏បានអំពាវនាវដល់បងប្អូនប្រជាពលរដ្ឋដែលរងគ្រោះដោយអំពើប្លន់ប្រដាប់អាវុធនាពេលកន្លងមក សូមមេត្តាយកឯកសារពាក់ព័ន្ធមកផ្ទៀតផ្ទាត់គ្នានៅអធិការដ្ឋាននគរបាលខណ្ឌចំការមន ព្រោះសមត្ថកិច្ចបានដកហូតម៉ូតូដែលក្រុមចោរទាំងនោះជិះធ្វើសកម្មភាពប្លន់កន្លងមកផង និងម៉ូតូដែលពួកគេប្លន់បានផង សរុបទាំងអស់៦គ្រឿង ។ លោកអធិការអ៊ុច សុខុន បានមានប្រសាសន៍ថា ប្រតិបត្តិការបង្ក្រាបក្រុមចោរប្លន់មួយសម្បុកធំនេះ គឺមានការដឹកនាំបញ្ជាពីលោកឡូ ុយុយ អភិបាលខណ្ឌចំការមន ដែលជាប្រធានគណៈបញ្ជាការឯកភាពខណ្ឌ និងលោកឧត្តមសេនីយ៍ត្រី ទូច ណារ៉ុថ ស្នងការនគរបាលរាជធានីភ្នំពេញ ។
សូមបញ្ជាក់ថា ប្រតិបត្តិការឃាត់ខ្លួនក្រុមជនសង្ស័យចោរប្លន់ និងឆក់ទាំង៩នាក់ខាងលើនេះ សមត្ថកិច្ចដកហូតបានអាវុធខ្លីម៉ាក K54 ពណ៌ស មួយដើម ហើយអាវុធនេះក្រុមចោរធ្លាប់បាញ់សម្លាប់ជនរងគ្រោះប្លន់យកម៉ូតូនៅភូមិសាស្ត្រខណ្ឌទួលគោក កាលពីវេលាទៀបភ្លឺថ្ងៃទី៦ មករា ឆ្នាំ២០១២ ថ្មីៗនេះ ។ ជាងនេះទៅទៀត ក្រុមជនទាំងនោះធ្លាប់ធ្វើសកម្មភាពប្លន់ម៉ូតូស្គូពីនៅចុងឆ្នាំ២០១១ និងដើមឆ្នាំ២០១២ យ៉ាងសកម្មក្នុងរាជធានីភ្នំពេញ ។
ក្រុមជនទាំង៩នាក់នេះ ២នាក់ត្រូវសមត្ថកិច្ចឃាត់ខ្លួនក្នុងភូមិសាស្រ្តសង្កាត់បឹងកេងកងទី១ ខណ្ឌចំការមន ហើយម្នាក់ទៀតត្រូវសមត្ថកិច្ចឃាត់ខ្លួននៅសង្កាត់បឹងត្របែក ខណ្ឌចំការមននិង៦នាក់ទៀតត្រូវសមត្ថកិច្ចឃាត់ខ្លួនបាននៅក្នុងភូមិសាស្ត្រសង្កាត់បឹងទំពុន ខណ្ឌមានជ័យ។
ជនសង្ស័យទាំង៩នាក់ខាងលើនេះ ១-ឈ្មោះនូ សុខមេ៉ង អាយុ១៧ឆ្នាំ ២-ឈ្មោះអ៊ុក ឧត្តម អាយុ១៦ឆ្នាំ ៣-ឈ្មោះសុខ ជា អាយុ១៨ឆ្នាំ ៤-ឈ្មោះសុខ ខាត់ អាយុ១៩ឆ្នាំ ៥-ឈ្មោះនី ពិសិដ្ឋ អាយុ១៩ឆ្នាំ ៦-ឈ្មោះហេង អ៊ូរ៉ាស៊ី អាយុ១៩ឆ្នាំ ៧-ឈ្មោះតាំង ឈុនហេង អាយុ២៣ឆ្នាំ ៨-ឈ្មោះលឹម វិទូ អាយុ២១ឆ្នាំ និង៩-ឈ្មោះគង់ ឥស្សាត អាយុ១៨ឆ្នាំ ៕
0 comments:
Please add comment to express your opinion, and share it on Twitter or Facebook. Thank you in advance.