តារាគ្រប់រូបតែងស្វែងរកអ្វីមួយប្លែកពីគេ ដើម្បីទាក់ទាញការចាប់អារម្មណ៍ពីសាធារណជនទូទៅនៅពេលចូលក្នុងកម្មវិធីសម្ដែងផេ្សងៗ។ ម៉ាដូណា វិញ គឺជាតារាចូលចិត្តតុបតែងខ្លួនប្លែកៗគួរឲ្យទាក់ទាញ នៅពេលបង្ហាញមុខក្មុងកម្មវិធីសិល្បៈ។
បើនិយាយពីកេរ្តិ៍ឈ្មោះនៅក្រៅសិល្បៈ ទស្សនិកជន និងមិត្តយុវវ័យប្រហែលមិនសូវស្គាល់តារារូបនេះនោះទេ។ ប៉ុន្តែបើនិយាយក្នុងពិភពសិល្បៈវិញ កេរ្តិ៍ឈ្មោះរបស់លោក អ្នកសិល្បៈណាក៏ស្គាល់ដែរ ដោយសារតែលោកមានក្រុមកំប្លែងភេទទី៣ ចូលចិត្តតុបតែងខ្លួនប្លែកៗ ហើយការសម្ដែងរបស់គេទទួលបានការចាប់អារម្មណ៍ និងស្ងើចសរសើរពីមិត្តរួមអាជីព។
នៅតាមកម្មវិធីមង្គលការ ខួបកំណើត ឡើងគេហដ្ឋាន និងពិធីផ្សេងៗទៀត គេតែងអញ្ជើញតារារូបនេះឲ្យសម្ដែង ដោយសារតែលោកចេះធ្វើឲ្យទស្សនិកជនចាប់អារម្មណ៍ បង្កបរិយាកាសឲ្យកាន់តែមានភាពសប្បាយរីករាយ។
ម៉ាដូណា បានប្រាប់ថាមូលហេតុនាំឲ្យខ្លួនចូលចិត្តតុបតែងប្លែកពីគេ ដោយសារតែនិស្ស័យ និងចំណង់ចំណូលចិត្តតាំងពីតូច។ ម្យ៉ាងទៀតការធ្វើបែបនេះជាសិល្បៈមួយដើម្បីទាក់ទាញ ។ “ខ្ញុំគិតថា ការធ្វើអ្វីដែលប្លែកពីគេនេះ ជាជំហានមួយធ្វើឲ្យខ្ញុំមានឈ្មោះបោះសំឡេងនៅក្នុងសិល្បៈ…មិនហួសហេតុប៉ុន្មានទេ ចំពោះការធ្វើខ្លួនបែបនេះ!”។
តារារូបនេះ បានបន្ថែមទៀតថា ដោយសារតែលោកចេះរៀបចំខ្លួនប្លែក និងមានក្រុមសម្ដែងភេទទី៣ គេច្រើនអញ្ជើញទៅសម្ដែងមិនដែលដាច់ម្ដងណាឡើយ មិនថានៅភ្នំពេញឬនៅតាមបណ្ដាខេត្ត។ មានពេលខ្លះទៀតរកពេលសម្រាកគ្មានផង។ លោកបន្តថា ចំណូលដែលទទួលបានមកពីការសម្ដែងផ្សេងៗកើនឡើងច្រើននាំឲ្យកម្រិតជីវភាពប្រសើរជាងមុន។
ម៉ាដូណា បានបង្កើតក្រុមនារីអច្ឆរិយ ដែលសុទ្ធសឹងតែជាភេទទី៣ ហើយក្រុមរបស់លោកតែងទទួលបានការអញ្ជើញឲ្យសម្ដែងក្នុងកម្មវិធីជាច្រើន។ ក្រុមនេះទទួលបានការចាប់អារម្មណ៍ច្រើនពីទស្សនិកជនជាច្រើនតាមរយៈការសម្ដែងនៅតាមស្ថានីយទូរទស្សន៍។ ជាងប្រាំបីឆ្នាំនៃការឈានចាប់អាជីពជាអ្នកសិល្បៈកន្លងមកនេះ ត្បិតតែមិនដែលបានសម្ដែងរឿងណាមួយធ្វើឲ្យមិត្តយុវវ័យចាប់អារម្មណ៍យ៉ាងណាក៏ដោយ ប៉ុន្តែបើនិយាយពីកម្រិតជីវភាពដែលទទួលបានមកពីការសម្ដែងតាមកម្មវិធីផ្សេងៗវិញគឺចំណូលទទួលបានច្រើន។
បច្ចុប្បន្ន ម៉ាដូណា បានបើកហាងមួយដោយចូលហ៊ុនជាមួយបងស្រីឈ្មោះ”សម្រស់សុធា”។ នៅពេលខាងមុខលោកត្រៀមបើកហាងបីបន្ថែមទៀត គឺ ហាងកាត់សក់បុរស ហាងកាត់សក់នារី និងហាងលក់សំលៀកបំពាក់៕
0 comments:
Please add comment to express your opinion, and share it on Twitter or Facebook. Thank you in advance.