ការបង្ហាញនៃការជួញដូរមូលបត្រសាកល្បងកាលពីថ្ងៃម្សិលមិញ។រូបថត ហេង ជីវ័ន
ភ្នំពេញៈ រដ្ឋាភិបាលកម្ពុជា បានប្រកាសជាផ្លូវការកាលពីថ្ងៃព្រហស្បតិ៍ថា ផ្សារមូលបត្រកម្ពុជា(CSX) ត្រៀមខ្លួនជាស្រេចសម្រាប់ការជូញដូរភាគហ៊ុន ប៉ុន្តែមិនទាន់កំណត់ពេលវេលាជាក់លាក់នៅឡើយទេ។
លោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុថ្លែងថា៖ «ពិធីបើកបង្ហាញការជួញដូរនៅថ្ងៃនេះ(ម្សិលមិញ) បង្ហាញពីការត្រៀមខ្លួនជាស្រេចសម្រាប់តួនាទីពាក់ព័ន្ធនៅ លើផ្សារហ៊ុន»។ លោកបន្តថា CSX ក្រុមហ៊ុនមូលបត្រជាសមាជិក និងធនាគារ ជាភ្នាក់ងារផាត់ទាត់សាច់ប្រាក់ បានតភ្ជាប់ទៅប្រព័ន្ធ IT រវាងគ្នា និងគ្នារួចជាស្រេចហើយ។
លោកបន្ថែមថា CSX បានរៀបចំហេដ្ឋារចនាសម្ព័ន្ធផ្សារហ៊ុនទាំងផ្នែកទន់ ទាំងផ្នែករឹងរួចរាល់ហើយ ហើយបច្ចុប្បន្ន CSX បានបញ្ចប់សព្វគ្រប់ហើយ។ ទោះបីជាយ៉ាងនេះក្តី លោកមិនបានបញ្ជាក់ទេថា តើពេលប្រព័ន្ធនេះនឹងត្រូវចាប់ផ្តើមនៅពេលណា។
លោក Chong-Kil Park អគ្គនាយករងផ្សារមូលបត្រកូរ៉េ(KRX) អះអាងអំពីការត្រៀមខ្លួនជាស្រេចរបស់ CSX ដោយបញ្ជាក់ថា ផ្សារមូលបត្រកម្ពុជា នឹងទាក់ទាញចំណាប់អារម្មណ៍កាន់តែច្រើនពីវិនិយោគិនទាំងក្នុង ស្រុក និងក្រៅស្រុកដែលជាធម្មតាតែងមានចម្ងល់អំពីបញ្ហានេះ។
លោកថ្លែង ការបើកផ្សារមូលបត្រ មិនមែនមានន័យតែការចាប់ផ្តើមសម័យកាលថ្មីនោះទេ ប៉ុន្តែវាក៏មានន័យថា ជាបញ្ហាប្រឈមដ៏ធំសម្រាប់សេដ្ឋកិច្ច និងសង្គមដែលពាក់ព័ន្ធនឹងទីផ្សារនេះផងដែរ៖ «ខ្ញុំជឿថា CSX នឹងមានការរីកចម្រើនយ៉ាងខ្លាំង និងមាននិរន្តរភាព អាចដោះស្រាយបញ្ហាប្រឈមទាំងនោះបាន»។
ក្រសួងសេដ្ឋកិច្ច និងហិរញ្ញវត្ថុ បានចុះហត្ថលេខាលើការវិនិយោគរួមគ្នាមួយ ដើម្បីបង្កើត CSX ជាមួយ KRX កាលពីឆ្នាំ២០០៦ ដោយផ្សារហ៊ុនកូរ៉េ មានភាគហ៊ុន ៤៥ភាគរយ ហើយរដ្ឋាភិបាល មាន៥៥ភាគរយ។
រដ្ឋាភិបាល សម្រេចចុះបញ្ជីសហគ្រាសរដ្ឋបី គឺរដ្ឋករទឹកភ្នំពេញ ក្រុមហ៊ុនទូរគមនាគមន៍កម្ពុជា និងកំពង់ផែព្រះសីហនុ។
លោក ហ៊ាន សាហ៊ីប ប្រធានក្រុមប្រឹក្សាផ្សារមូលបត្រកម្ពុជា បានឲ្យដឹងថា ថ្មីៗនេះ CSX ទើបតែបានពិនិត្យវាយតម្លៃលទ្ធភាពចុះបញ្ជីរបស់រដ្ឋាករទឹក ភ្នំពេញ និងបានអនុម័តកាលពីថ្ងៃទី១៥ ខែធ្នូ ឆ្នាំមុន។ លោកបន្តថា៖ «ផ្សារមូលបត្រកម្ពុជា ជឿជាក់ថា រដ្ឋាករទឹកភ្នំពេញ នឹងបញ្ចប់នីតិវិធី IPO ឲ្យបានឆាប់តាមដែលអាចធ្វើទៅបាន ហើយអាចនឹងចុះបញ្ជីក្នុងរយៈពេលដ៏ខ្លីខាងមុខ»៕ CS
0 comments:
Please add comment to express your opinion, and share it on Twitter or Facebook. Thank you in advance.