អ្នកស្រី ហ៊ឹម សាវី កាន់ឧបករណ៍តន្ត្រីខ្លុយ។ រូបថត សហការី
ភ្នំពេញៈ ស្ថិតក្នុងពូជពង្សអ្នកសិល្បៈ អ្នកស្រី ហ៊ឹម សាវី ដែលត្រូវជាប្អូនស្រីបង្កើតតារាចម្រៀង ហ៊ឹម ស៊ីវន ដែលបានពុះពារហាត់រៀនឧបករណ៍ខ្លុយ(Flute) បែបបស្ចិមប្រទេស រហូតបានជោគជ័យក្លាយជាតន្រ្តីករឧបករណ៍ខ្លុយយ៉ាងចំណាន នៅលើឆាកអន្តរជាតិ។
សំឡេងព្យាណូដ៏គ្រលួចរបស់តន្រ្តីករខ្មែរ លោកសូ ស្រណោះ លាយឡំគ្នានឹងសំឡេងខ្លុយ របស់អ្នកស្រី ហ៊ឹម សាវី ដែលត្រូវជាប្អូនស្រីបង្កើតរបស់តារាចម្រៀងល្បីជើងចាស់ អ្នកស្រី ហ៊ឹម ស៊ីវន បានបន្លឺឡើងល្វើយៗ ជាមួយនឹងចម្រៀងច្រើនបទ ជាភាសាខ្មែរ និងជប៉ុន បានទាក់ចិត្តទស្សនិកជនឲ្យទះដៃកាន់តែខ្លាំងឡើងៗ នៅក្នុងការប្រគំតន្រ្តីមិត្តភាព កម្ពុជាជប៉ុន លើកទី៥ កាលពីចុងសប្តាហ៍មុន។
អ្នកស្រី ហ៊ឹម សាវី បានធ្វើឲ្យគេចាប់អារម្មណ៍ មិនត្រឹមតែមុខមាត់របស់អ្នកស្រី ដែលស្រដៀងនឹងបងស្រីដែលជាតារាចម្រៀងល្បីប៉ុណ្ណោះទេ ប៉ុន្តែដោយសារតែសមត្ថភាពផ្លុំឧបករណ៍ខ្លុយដ៏ប៉ិនប្រសប់របស់អ្នក ស្រី ចូលគ្នាជាមួយនឹងក្រុមតន្រ្តីករ សិល្បករ បរទេស ថ្វីដ្បិតតែមិនមានតន្រ្តីករក្នុងស្រុកច្រើន ចេះលេងឧបករណ៍មួយនេះក៏ដោយ។
ក្នុងវ័យ៣៩ ឆ្នាំ អ្នកស្រី ហ៊ឹម សាវី បានប្រាប់ភ្នំពេញ ប៉ុស្តិ៍ ឲ្យដឹងថា ពីដំបូងអ្នកស្រី មិនទាន់បានចាប់អារម្មណ៍ភ្លាមៗ ទៅលើឧបករណ៍ខ្លុយនេះទេ ប៉ុន្តែដោយសារតែមានឪពុកមា ណែនាំឲ្យរៀន ទើបអ្នកស្រីចាប់រៀន ឧបករណ៌ហ្លុតនេះតាំងពីអាយុ១៥ឆ្នាំមក ក្រោយពេលដែលអ្នកស្រី បានក្រេបជញ្ជក់យកមូលដ្ឋានគ្រឹះ ពីតន្រ្តីបុរាណខ្មែរជាច្រើនឆ្នាំពីជីតារបស់អ្នកស្រីមក។
អ្នកស្រីបានបន្តថា៖«កាលពីអាយុ៨ឆ្នាំ ខ្ញុំធ្លាប់រៀនឧបករណ៍គងធំ និងខ្លុយបុរាណខ្មែរដែរ។ មកដល់ពេលនេះ ខ្ញុំភ្លេចអស់ហើយ តែទោះជាមិនអាចលេងបាន ខ្ញុំនៅតែអាចស្តាប់ដឹងថា អ្នកណាខុស ឬត្រូវ ពីរោះ ឬមិនពីរោះ»។
អ្នកស្រី ហ៊ឹម សាវី បានមានប្រសាសន៍ថា៖«ដោយសារតែឪពុកមាខ្ញុំឈ្មោះលោក ហ៊ឹម សុភី ដែលជាអាណាព្យាបាលខ្ញុំ បានចេញទៅរៀនផ្នែកតន្រ្តីនៅប្រទេសរុស្ស៊ី ហើយគាត់បានឃើញនារីបរទេសជាច្រើនចេះលេងឧបករណ៍ខ្លុយនេះ គាត់ក៏បានចាប់អារម្មណ៍ និងណែនាំឲ្យខ្ញុំរៀនឧបករណ៍ខ្លុយនេះដែរ»។
អ្នកស្រីបន្តថា៖«គ្មានអ្វីដែលងាយស្រួលសម្រាប់ឧបករណ៍ភ្លេងឡើយ ទោះបីខ្ញុំធ្លាប់មានមូលដ្ឋានគ្រឹះពីភ្លេងខ្មែរ ប៉ុន្តែប្រសិនបើមិនធ្លាប់រៀនឧបករណ៍ខ្លុយនេះ គឺពិបាកដូចតែគ្នាទេ។ វាទាមទារនូវការអត់ធ្មត់ ស្រឡាញ់ជាប់ចិត្ត និងមិនបោះបង់»។
អ្នកស្រីបានបន្តទៀតថា៖«អ្វីដែលសំខាន់គឺទេពកោសល្យ និងឧបនិស្ស័យពីធម្មជាតិ ទើបធ្វើឲ្យយើងរៀនឆាប់ចេះ ជាងគេបន្តិច ប៉ុន្តែវានៅតែត្រូវការពេលវេលាច្រើនឆ្នាំ និងការព្យាយាមខ្លាំងបំផុត»។
ដោយមានស្រុកកំណើតលើទឹកដីខេត្តព្រៃវែង អ្នកស្រី ហ៊ឹម សាវី ដែលជាប្អូនស្រីបង្កើតទី២ របស់អ្នកស្រី ហ៊ឹម ស៊ីវន បានឲ្យដឹងថា ក្រៅពីអ្នកស្រី និងបងស្រី ហ៊ឹម ស៊ីវន ប្អូនៗបីនាក់ផ្សេងទៀតរបស់អ្នកស្រី គ្មាននរណាប្រកបរបរពាក់ព័ន្ធនឹងសិល្បៈទេ។
ក្រោយពីបានទទួលការបង្ហាត់បង្រៀនបន្ថែមពីលោកគ្រូ អៀង សេងថៃ នៅឆ្នាំ១៩៨៥ អ្នកស្រី ហ៊ឹម សាវី ក៏បានបន្តការសិក្សារយៈពេល ៦ឆ្នាំ នៅសាកលវិទ្យាល័យភូមិន្ទវិចិត្រសិល្បៈ ក្រោមការបង្ហាត់បង្ហាញពីសាស្រ្តាចារ្យក្នុងស្រុក និងបរទេសជាច្រើននាក់នៅក្នុងប្រទេសកម្ពុជា។
អ្នកស្រីនិយាយថា៖ «ខ្ញុំបានទទួលការបង្ហាត់បង្រៀនពី គ្រូជនជាតិអាល្លឺម៉ង់ម្នាក់ ដែលមានឈ្មោះថា Anton Issehardt និងការសម្តែងជាមួយនឹងតន្រ្តីករបុរាណរបស់បស្ចិមប្រទេស ទើបខ្ញុំមានថ្ងៃនេះ»។ អ្នកស្រីបានបញ្ជាក់ថា៖«ជាធម្មតា ទាំងអ្នកសិល្បៈ ទាំងតន្រ្តីករ មិនអាចរកប្រាក់ចំណូលបានតែមួយមុខទេ ដោយសារតែស្រុកយើងកំពុងអភិវឌ្ឍ»។
សាស្ត្រាចារ្យផ្នែកឧបករណ៍ខ្លុយ នៅមហាវិទ្យាល័យតូរ្យតន្រ្តី រូបនេះបានថ្លែងថា ក្រៅពីបង្រៀនសិស្សប្រមាណជាដប់នាក់នៅមហាវិទ្យាល័យ ខ្ញុំក៏មានបង្រៀនកុមារបរទេស នៅតាមផ្ទះ និងនៅតាមអង្គការនានាផងដែរ ដោយសារតែឧបករណ៍ភ្លេងប្រភេទនេះ ត្រូវបានគេឲ្យតម្លៃ និងអាចលេងចូលជាមួយវង់ភ្លេងប្រភេទណាក៏បាន»។
កាលពីជិត២០ឆ្នាំមុន អ្នកស្រី ហ៊ឹម សាវី បានរៀបអាពាហ៍ពិពាហ៍ជាមួយនឹង លោក កែវ សុភី ដែលជាអ្នកនិពន្ធតន្រ្តី និងជាសាស្រ្តាចារ្យដូចគ្នា សព្វថ្ងៃ អ្នកស្រីមានបុត្រីពីរនាក់ ដែលមានបំណងអភិវឌ្ឍខ្លួនជាមួយនឹងការងារផ្សេងក្រៅពីសិល្បៈ ទោះបីជាពួកគេ មានទេពកោសល្យក៏ដោយ។ អ្នកស្រី ហ៊ឹម សាវី ក៏ធ្លាប់បានចេញទៅសម្តែងតន្រ្តីខ្លុយនៅបណ្តាប្រទេសមួយចំនួនដូចជា វៀតណាម នូវែលសេឡង់ និងឥណ្ឌូនេស៊ី ជាដើម ជាពិសេសគឺការប្រគំតន្រ្តីបែបមិត្តភាព ក្នុងចំណោមប្រទេសជាច្រើននៅលើពិភពលោក។
ក្រៅពីផ្លុំខ្លុយ អ្នកស្រីក៏អាចលេងស្គរ និងច្រៀងចម្រៀងបែបបុរាណផងដែរ ប៉ុន្តែអ្នកស្រីបាន និយាយបែបដាក់ខ្លួនថា៖«ខ្ញុំអាចច្រៀងបាន តែមិនមែនល្អ ពីរោះអស្ចារ្យដូចជាបងស្រីខ្ញុំទេ ព្រោះធម្មតា មិនមែនជាជំនាញដែលយើងហ្វឹកហាត់ញឹកញាប់ផង»៕ source
0 comments:
Please add comment to express your opinion, and share it on Twitter or Facebook. Thank you in advance.