គន្លឹះទាំង១០ដើម្បី អោយការនិយាយមាន ប្រសិទ្ធិភាព

អ្នកមិនអាច រៀនហែលទឹក ​ ពីក្នុងសៀវភៅ ឫតាមអ៊ីនធើណែត នោះទេ។ មធ្យោបាយល្អបំផុត ក្នុងការរៀនហែល ទឹកនោះគឺ ចុះទៅក្នុង ទឹកផ្ទាល់តែម្តង។ វិធីសាស្រ្តដែល ល្អបំផុតដើម្បីអោយមានជំនាញក្នុងការ និយាយក៏ដូចគ្នាដែរ គឺត្រូវឧស្សាហ៍ និយាយអោយបានញឹកញាប់។ កំហុសគឺជាគ្រូដ៏ល្អបំផុត។ យ៉ាងណាមិញ ការរៀនពីគន្លឹះខ្លីៗក៏ល្អម្យ៉ាងដែរ។ ខាងក្រោមនេះគឺជាគន្លឹះខ្លីៗរបស់ខ្ញុំមួយចំនួនសំរាប់អោយយើងក្លាយជាអ្នកពូកែនិយាយ៖

ផ្នែកទី ១ ៖ រៀបចំការនិយាយរបស់អ្នក

គន្លឹះទី១៖ ត្រូវមានសារច្បាស់លាស់ដើម្បីចែករំលែកដល់អ្នកស្តាប់ ឫទស្សនិកជន

កុំចេះតែនិយាយពាសវាលពាសកាល ត្រូវនិយាយពេលដែលអ្នកមានអ្វីដែលសំខាន់និង ចាំបាច់ដើម្បីចែករំលែកដល់អ្នកស្តាប់។ វាមិនអីទេ ពេលដែលអ្នកនិយាយថា “ខ្ញុំមិនដឹង” ប្រសើរជាងគិតថា “ខ្ញុំមិនដឹង តែខ្ញុំចេះតែនិយាយ”។​ សារដែលអ្នកផ្តល់អោយអ្នកស្តាប់ត្រូវតែខ្លី សាមញ្ញ និង ច្បាស់លាស់។

គន្លឹះទី២៖ ការស្គាល់អ្នកស្តាប់ ឫទស្សនិកជនរបស់អ្នក

មនុស្សគ្រប់រូបមានការគិតខុសៗគ្នា។ មុននឹងអ្នកនិយាយអ្វីមួយ អ្នកត្រូវដឹងថា តើអ្នកស្តាប់ ឫទស្សនិកជននោះគឺជានរណា? ប្រសិនបើពួគគាត់ជាយុវជនដែលមិនបានទៅសាលា នោះអ្នកត្រូវរៀបចំការនិយាយរបស់អ្នកអោយមានលក្ខណៈសាមញ្ញបំផុត។ ការដឹងថាទស្សនិកជន ឫអ្នកស្តាប់របស់អ្នកជានរណា អាចជួយយើងក្នុងការត្រៀមនូវឩទាហរណ៏ល្អៗ ងាយនឹងអោយពួកគាត់ឆាប់យល់។ ចូរចងចាំថា មនុស្សភាគច្រើនចូលចិត្តស្តាប់ឩទាហរណ៍ពិតៗជាងទ្រឹស្តី ពីព្រោះទ្រឹស្តីអាចរកនៅកន្លែងណាក៏បាន តែរឿងពិតមិនងាយរកបាននោះទេ។

គន្លឹះទី៣៖ លំហាត់និយាយ ឫការហាត់សម

គ្មាននរណាម្នាក់កើតមកចេះឯងនោះទេ! ហើយក៏គ្មាននរណាម្នាក់ធ្វើអ្វីមួយបានល្អឥតខ្ចោះតាំងពីលើកដំបូងនោះដែរ! ជាការពិតណាស់ អ្នកនឹងមានអារម្មណ៍ភ័យនៅពេលឡើងនិយាយលើកទីមួយ។ ការសមនិយាយអាចជួយអ្នកអោយមានទំនុកចិត្តកាន់តែខ្លាំងឡើងៗ។ ម្យ៉ាងវិញទៀត ការសមនិយាយមិនមែនជាការទន្ទេញឃ្លានោះទេ។ តែវាជាអ្វីដែលអ្នកត្រូវត្រៀមដូចជា របៀបនៃការឈរ ការរៀបចំពេលវេលា ការដកដង្ហើមជាដើម។ អ្នកស្តាប់​ ឫទស្សនិកជន ចូលចិត្តស្តាប់នូវអ្វីដែលអ្នកនិយាយមិនមែនចូលចិត្តស្តាប់នូវអ្វីដែលអ្នកអាននោះទេ។ អ្នកមិនចាំបាច់ទន្ទេញឃ្លា ឫពាក្យរបស់អ្នកនោះឡើយ ប៉ុន្តែត្រូវទន្ទេញនូវដំណាក់កាលដែលអ្នកត្រូវឡើងនិយាយ។ នៅពេលសម ប្រសិនបើអ្នកមានកាមេរ៉ាថត ឫក៏មានអ្នកណាម្នាក់មើលនិងផ្តល់ជាមតិរិះគន់ដើម្បីកែលំអរអោយ គឺកាន់តែប្រសើរ។

ផ្នែកទី២៖ នៅពេលអ្នកកំពុងនិយាយ

គន្លឹះទី៤៖  ការលើកដាក់សម្លេង

បទចម្រៀងមួយបទពិរោះដោយសារតែអ្នកច្រៀងចេះលើកដាក់សម្លេងអោយត្រូវតាមកាលទេសៈរបស់វា។ ដូចេ្នះ ការនិយាយក៏ដូចគ្នា។ យើងត្រូវចេះតម្លើងសម្លេងឫលើកសម្លេងនៅពេលដល់ចំនុចសំខាន់។ បន្ទន់ ឫបន្ថយសម្លេងពេលចូលដល់ចំនុចកំសត់។ យ៉ាងណាក៏ដោយ ការតម្លើងសម្លេងមិនមែនសំដៅលើការស្រែកនោះទេ។ ហើយការតម្លើងសម្លេងអាចបញ្ចុះបញ្ចូលអ្នកស្តាប់ តែការស្រែកអាចធ្វើអោយអ្នកស្តាប់ភ័យ។

គន្លឹះទី៥៖ កាយវិការ និង ការប្រើក្រសែភ្នែក

និយាយគឺជាកិរិយាសព្ទ មិនមែនជានាមនោះទេ។ វាទាមទារអោយមានការវិការ។ អ្នកកំពុងនិយាយ មិនមែនច្រៀងបទគោរពទង់ជាតិទេ ដូចនេះកុំឈរថ្មឹងអោយសោះ។ តែក៏កុំបញ្ចេញកាយវិការហួសហេតុពេកដែរ។ ត្រូវបញ្ចេញកាយវិការតាមបែបធម្មជាតិ និងរក្សាប្រពៃណីតាមតំបន់និមួយៗ។ កុំមើលមកតែមនុស្សម្នាក់ ឫក៏ផ្នែកណាមួយនៃបន្ទប់នោះពេក។ ការមើលទៅអ្នកទស្សនា ឫអ្នកស្តាប់ទាំងអស់អាចជួយនាំអារម្មណ៏ពួកគាត់អោយជក់ចិត្តនូវអ្វីដែលយើងកំពុកតែនិយាយ។

គន្លឹះទី៦៖ សង្កេតទស្សនិកជន ឫអ្នកស្តាប់របស់អ្នក

ប្រសិនបើទស្សនិកជន ឫអ្នកស្តាប់របស់អ្នកចាប់ផ្តើមមើលនាឡិការបស់ពួកគាត់ ទៅបន្ទប់ទឹកញឹកញាប់ ចេញចូលនិយាយទូរសព្ទ កេះគ្នានិយាយ ឫក៏លេងហ្គេមក្នុងទូរស័ព្ទ ទាំងនេះជាសញ្ញាមួយប្រាប់ថាពួកគាត់មិនចាប់អារម្មណ៏នូវអ្វីដែលអ្នកកំពុងនិយាយនោះទេ។ ឃើញដូចនេះអ្នកត្រូវតែរវាសបន្តិច! ផ្លាស់ប្តូររបៀបនៃការនិយាយ និយាយរឿងកំប្លែងដែលទាក់ទងនឹងប្រធានបទ ឫក៏ឈប់និយាយបន្ត ហើយចាប់ផ្តើមចោទជាសំនួរវិញម្តង ដើម្បីបង្វែរអារម្មណ៍ទស្សនិកជន​ ឫអ្នកស្តាប់ អោយចូលរួមក្នុងប្រធានបទរបស់អ្នក រឺក៏អាចសួរជាសំនួរខ្លះៗទាក់ទងនឹងអ្វីដែលពួកគាត់ចាប់បានក្នុងកំឡុងពេលស្តាប់។

គន្លឹះទី៧៖ គោរពពេលវេលាដែលគេផ្តល់អោយក្នុងការនិយាយ

ពេលខ្លះនិយាយតិចតែមានន័យ។ ហេតុផលតែងតែមាននៅពេលដែលពេលវេលាអំណោយផលដល់អ្នក។  តែត្រូវចេះគោរពពេលវេលាផង។ នៅពេលដែលអ្នកនិយាយលើសម៉ោងដែលបានកំណត់ នោះអ្នកស្តាប់ នឹងគ្មានចំណាប់អារម្មណ៍លើការនិយាយរបស់អ្នកទៀតឡើយ។

គន្លឹះទី៨៖ ការសរុប

ត្រូវគិតថា មិនមែនអ្វីគ្រប់យ៉ាងដែលយើងនិយាយសុទ្ធតែមានសារសំខាន់នោះទេ។ ដូច្នេះ សូមកុំភ្លេចធ្វើការសរុប នៅពេលអ្នកបញ្ចប់ ពាក្យសំដីរបស់អ្នក ហើយ រំលឹកដល់អ្នកស្តាប់ផង ពីចំនុចសំខាន់ដែលអ្នកចង់និយាយ។

គន្លឹះទី៩៖ ធ្វើ​ការ​អរគុណដល់​ទស្សនិកជន របស់​អ្នក

មនុស្ស​គ្រប់​គ្នាតែង​តែ​ចង់​អោយគេ​គិតថា​ខ្លួន​មានសារៈសំខាន់ ដូច្នេះ​បន្ទាប់​ពីនិយាយគ្នា​បញ្ចប់​ របស់​អ្នក​ហើយ សូម​និយាយ​ពាក្យ​អរគុណ ដល់​ទស្សនិកជន​របស់អ្នក ដែល​បាន​ចំណាយ​ពេល​វេលា​ និង ​​ចាប់​អារម្មណ៍​លើ​ការ​និយាយ​របស់​អ្នក។ ការ​អរគុណ​នេះ វាជារឿង​ងាយៗធម្មតា ប៉ុន្តែមាន
សារៈសំខាន់។ នៅ​ពេល​ដែល​អ្នកចេះ​អោយតំលៃទៅ​ទស្សនិកជនរបស់អ្នក ពួក​គាត់នឹង​ត្រលប់​មក​ស្តាប់​ការ​និយាយ របស់អ្នកម្តងទៀតជា​មិនខាន។

 ផ្នែកទី៣៖ ចេះ​រៀនពីបទពិសោធន៍

គន្លឹះទី១០៖ បន្ទាប់​ពី​និយាយ​ចប់​ហើយ អង្គុយ​ស្ងៀម​ ហើយ​សួរខ្លួន​ឯង​បីសំនួរៈ
១​ តើ​អ្វី​ខ្លះទៅ​ ដែល​អ្នក​និយាយ​បានល្អ?
២​ តើ​អ្វី​ខ្លះទៅ ដែល​អ្នក​និយាយ​មិនបានល្អ?
៣ តើ​អ្វីខ្លះទៅ ដែល​អ្នក​អាច​នឹងធ្វើ​អោយប្រសើរឡើងទៅ​ពេល​ក្រោយ?

ប្រសិន​ជា​អាចធ្វើ​បាន​សាកសួរសំនួរ​ទាំងនេះ​ទៅ​ទស្សនិកជន​ របស់​អ្នក​ដើម្បីទទួល​បាន​យោបល់​ពីពួកគាត់។
ខ្ញុំ​សូម​រំលឹក​អ្នក​ម្តងទៀតថា គន្លឹះទាំងនេះគឺចេញមក​ពីបទពិសោធន៍ផ្ទាល់​របស់ខ្ញុំ ដូច្នេះ​មុន​នឹង​ប្រើ​វា​សូម​ធ្វើការ​រៀបចំវា អោយស្របតាមស្ថានភាពជាក់ស្តែង​ របស់អ្នក។ បើ​ស្រាវជ្រាវ​បន្ថែមកាន់តែល្អ។

Share