មិនមានការប្រកាសថា មានការប្រែប្រួល ឬឈុតឆាកការសម្ដែងថ្មីប្លែកក្នុងកម្មវិធីប្រឡងច្រៀងខ្នាតធំរបស់អាមេរិកAmerican Idol ជំនាន់ថ្មីទី១១ ប្រចាំឆ្នាំ២០១២នេះទេ តែតាមរយៈការសម្ដែងខ្លីនៅតាមរដ្ឋនីមួយៗ ពិសេសនៅទីក្រុងឆ្នេរ Galveston ក្នុងរដ្ឋ Texas កាលពីថ្ងៃព្រហស្បតិ៍ ម្សិលមិញនេះ ជឿជាក់ថាប្រិយមិត្តពិតជាប្លែកអារម្មណ៍។
បេក្ខជន Ramiro Garcia ដែលកើតមកមិនមានត្រចៀក មកចូលរួមប្រឡង ហើយបានជាប់ទៅជុំ Hollywood ទៀត។
បេក្ខជនរូបនេះ កើតមកមិនមានត្រចៀកទាំងសងខាង ហើយមិនអាចស្ដាប់ឮ និងនិយាយបានដូចគេឯងទេ។ ពេលមានអាយុ៤ឆ្នាំ Ramiro ទៅទទួលការវះកាត់ព្យាបាលរយៈពេលយូរ ពោលគឺវះកាត់មួយលើកជាពីរលើក រហូតបានជោគជ័យ អាចស្ដាប់ និងនិយាយបាន។ មិនត្រឹមតែប៉ុននេះ Ramiro ថែមទាំងអាចច្រៀងបាន រហូតឈ្នះចិត្តគណៈកម្មការ Jennifer Loez, Steven Taylor និង Randy Jackson ហើយអាចទៅជុំ Hollywood ទៀត។
សប្បាយចិត្តពេក Ramiro ក៏រត់ចេញទៅរកក្រុមគ្រួសារ។ ឪពុករបស់ Ramiro រំភើបរហូតស្រក់ទឹកភ្នែក ហើយក៏និយាយប្រាប់ពីប្រវត្តិ Ramiro ធំធាត់។ គាត់និយាយថា “ខ្ញុំចាំបានពេលវេជ្ជបណ្ឌិតថា Ramiro មិនអាចនិយាយ និងស្ដាប់បាន តែឥឡូវខ្ញុំពិតជាសប្បាយចិត្តរកអ្វីផ្ទឹមគ្មានទេ”។
ជាមួយគ្នានេះ Ramiro និយាយថា “ការធំធាត់របស់ខ្ញុំគឺពិបាក។ ខ្ញុំកើតមកមិនធម្មតាដូចគេឯងទេ… ខ្ញុំអត់មានត្រចៀកតាំងពីកំណើត។ អត់មានអ្វីទាំងអស់នៅត្រចៀកខាងឆ្វេង តែនៅខាងស្ដាំ មានសាច់ទងត្រចៀក។ គេគិតថាខ្ញុំនឹងថ្លង់ ហើយមិនអាចនិយាយបាន តែខ្ញុំមានរន្ធ និងក្រដាសត្រចៀក ដែលបង្កជាលទ្ធភាពឱ្យខ្ញុំអាចស្ដាប់ឮ។ ខ្ញុំចាំបានពេលត្រូវទៅទទួលការវះកាត់ម្ដងហើយម្ដងទៀតរហូតបានជោគជ័យ”។
សង្ឃឹមថាប្រិយមិត្ត ពិសេសអ្នកកើតមកមានកាយសម្បទាមិនគ្រប់គ្រាន់ កុំអស់សង្ឃឹមនឹងជីវិតអី ព្រោះរឿងរ៉ាវអាចនឹងក្លាយទៅជាល្អប្រសើរ!
ដោយឡែក កុំភ្លេចរង់ចាំតាមដានជាមួយ Sabay ថាតើ Ramiro Garcia អាចឡើងទៅដល់ជុំផ្ដាច់ព្រ័ត្រដែរឬទេ? សូមជូនពរ Ramiro!
0 comments:
Please add comment to express your opinion, and share it on Twitter or Facebook. Thank you in advance.