ខណៈការប្រលងប្រណាំងបញ្ចេញភាពវ័យឆ្លាត និងការច្នៃប្រឌិតផ្នែកក្រាហ្វិកឌីហ្សាញក្នុងកម្មវិធី “Dream Girl”នៅសល់រយៈពេលមិនដល់ ៥ ថ្ងៃទៀត នោះ ពេលនេះស្នាដៃរបស់បេក្ខនារីមួយចំនួនក៏បានបញ្ជូនទៅប្រទេសជប៉ុនជាបណ្ដើរៗហើយដែរ ដើម្បីឲ្យគណៈកម្មការធ្វើការវិនិច្ឆ័យផ្តល់ចំណាត់ថ្នាក់ដល់ម្ចាស់ជយលាភី។
ប្រធានបទក្នុងការចូលរួមប្រកួតត្រូវបែងចែកជាពីរប្រភេទគឺ Pattern Design និង Character Designសម្រាប់ឲ្យបេក្ខនារីទាំងឡាយដាក់ពាក្យ និងធ្វើការប្រកួតប្រជែងគ្នាដែលក្នុងនោះ Pattern Design តម្រូវឲ្យបេក្ខនារីដែលចូលរួមទាំងអស់ Design រូបទាំងឡាយណាដែលមានទ្រង់ទ្រាយជាផ្កា និងតែម្នាក់ឯងគត់។ ដោយឡែកសម្រាប់ផ្នែក Character Design គឺតម្រូវឲ្យមានសមាជិក ៣នាក់ជាចាំបាច់ដើម្បីឌីហ្សាញវត្ថុអ្វីមួយមិនថាជា ផ្លែឈើ សត្វ មនុស្ស ឬអ្វីផ្សេងប៉ុន្តែតួអង្គនោះត្រូវមានភ្នែក។
អ្នករៀបចំកម្មវិធីប្រឡងប្រជែងកញ្ញា ហេង ផាន់យ៉ា បានឲ្យដឹងថា រហូតមកដល់ថ្ងៃនេះមានស្នាដៃសិល្បៈចំនួន ៣៣ ត្រូវបានបញ្ជូនទៅឲ្យគណៈកម្មការនៅឯប្រទេសជប៉ុនធ្វើការវាយតម្លៃដើម្បីផ្ដល់ចំណាត់ថ្នាក់រូបដែលមានលក្ខណៈលេចធ្លោជាងគេ និងប្រកបដោយភាពច្នៃប្រឌិតខ្ពស់។ ក្នុងនោះផ្នែក Pattern Design មានចំនួន ៣០ រូប និង Character Design មានចំនួន ៣ រូប ដែលរូបទាំងអស់នេះសុទ្ធតែកើតចេញពីគំនិត និងទេពកោសល្យផ្ទាល់របស់បេក្ខជនចូលរួម។
ប្រធានរៀបចំរូបនេះបន្តទៀតថា សម្រាប់លទ្ធផលនៃការប្រកួតប្រជែងនឹងត្រូវគេប្រកាស ១ សប្ដាហ៍ក្រោយកាលបរិច្ឆេទផុតកំណត់នៅថ្ងៃ ៣១ មករាខាងមុខនេះ។ ជាមួយគ្នានោះដែរ រូបដែលជាប់ចំណាត់ថ្នាក់នឹងត្រូវគេដាក់បង្ហាញ និងលក់នៅតាមបណ្ដាហាងមួយចំនួននៅប្រទេសជប៉ុនផងដែរ។
នៅចាំអីទៀត! ប្រិយមិត្តមិត្តយុវវ័យដែលមានទេពកោសល្យនិងភាពច្នៃប្រឌិតហើយដែលចង់ចូលរួមប្រកួតប្រជែងផ្នែកក្រាហ្វិកឌីហ្សាញ អាចមកសុំនិងដាក់ពាក្យប្រលងបាននៅអាសយដ្ឋានអាគារលេខ ១០ (ជាន់ទី៣ បន្ទប់ 3FB អគារ Vtrust) សង្កាត់មិត្តភាព ខណ្ឌ ៧មករា រាជធានីភ្នំពេញ ឬសាកសួរព័ត៌មានលំអិតបន្ថែមតាមរយៈទូរស័ព្ទលេខ ០២៣ ៩៩៨ ៤៥៥ រៀងរាល់ម៉ោងធ្វើការ។ កាលបរិច្ឆេទផុតកំណត់ទទួលពាក្យត្រឹមថ្ងៃទី ៣១ មករា ២០១២។
ម្ចាស់ជយលាភីក្នុងការប្រកួតប្រជែងនេះ នឹងមានឱកាសធ្វើដំណើរទស្សនកិច្ចទៅប្រទេសជប៉ុន ទទួលរង្វាន់ជាទឹកប្រាក់ចន្លោះពី ១លានរៀល ទៅ ២លានរៀល ភាគរយដែលទទួលបានពីការលក់ស្នាដៃរបស់ខ្លួន និងនៅមានរង្វាន់លើកទឹកចិត្តជាច្រើនទៀត៕
0 comments:
Please add comment to express your opinion, and share it on Twitter or Facebook. Thank you in advance.