ពិធីបុណ្យនៃក្តីស្រលាញ់គឺជាថ្ងៃដែលអ្នកមានគូស្នេហ៍មានភាពរីករាយខណៈពេលអ្នកគ្មានគូគិតថា នោះគឺជាថ្ងៃដ៏ឯកោ និងសោកសៅសំរាប់ខ្លួន ។ វាពិតជាមិនមានអ្វីចំលែកនោះទេដែលលោកអ្នកគ្មានគូស្នេហ៍ ហើយមាននូវអារម្មណ៍កណ្តោចកណ្តែងនៅថ្ងៃបុណ្យនៃក្តីស្រលាញ់នោះ ។យ៉ាងណាមិញ លោកអ្នកក៏អាចចូលរួមក្នុងថ្ងៃបុណ្យនៃក្តីស្រលាញ់នោះដោយរីករាយ និងឆ្លងផុតឱកាសដ៏ពិសេសនោះដោយគ្មានអារម្មណ៍កណ្តោចកណ្តែងបានដោយគ្រាន់តែអនុវត្តតាមវិធីសាស្ត្រខាងក្រោមនេះ ។
វិធីសាស្ត្រទី១ ៖ ដើម្បីជៀសវាងអារម្មណ៍សោកសៅនៅថ្ងៃបុណ្យនៃក្តីស្រលាញ់ លោកអ្នកគួរតែគិតថា ថ្ងៃបុណ្យនៃក្តីស្រលាញ់គឺជាថ្ងៃដ៏ខ្ជះខ្ជាយពីព្រោះប្រសិនបើលោកអ្នកមានដៃគូ លោកអ្នកនឹងត្រូវចំនាយប្រាក់កាក់ច្រើនទៅលើបាច់ផ្កាដែលញ៉ាំមិនបាន និងស្ករសូកូឡាដែលបណ្តាលឱ្យឈឺធ្មេញ ។
វិធីសាស្ត្រទី២ ៖ ជៀសវាងការគិតថា ខ្លួនលោកអ្នកឯកោ ។ លោកអ្នកគួរតែគិតថា មនុស្សនៅជុំវិញពិភពលោកប្រមាណជាង៦០លាននាក់កំពុងតែប្រារព្ធពិធីបុណ្យនៃក្តីស្រលាញ់ម្នាក់ឯងមិនខុសពីស្ថានភាពរបស់លោកអ្នកប៉ុន្មាននោះទេ ។
វិធីសាស្ត្រទី៣ ៖ ក្រៅពីគូស្នេហ៍ លោកអ្នកអាចចូលរួមរីករាយថ្ងៃបុណ្យនៃក្តីស្រលាញ់ជាមួយមនុស្សជាទីស្រលាញ់ផ្សេងទៀតដូចជាម៉ាក់ប៉ា បងប្អូន និងមិត្តភក្តិ ជាពិសេសលោកអ្នកក៏អាចបង្ហាញទំហំនៃក្តីស្រលាញ់ទៅកាន់ពួកគេបានដោយជូនជាវត្ថុអនុស្សាវរីយ៍ផ្សេងៗ ឬក៏ចេញដើរកំសាន្តជាមួយនឹងពួកគេ ។
វិធីសាស្ត្រទី៤ ៖ លោកអ្នកត្រូវជៀសវាងឱ្យឆ្ងាយពីមនុស្សពូកែខាងអួតនៅថ្ងៃបុណ្យនៃក្តីស្រលាញ់ពីព្រោះពួកគេអាចនឹងអួតពីដៃគូរបស់ពួកគេជាហេតុធ្វើឱ្យលោកអ្នកកើតអារម្មណ៍ឯកោ ។ ផ្ទុយទៅវិញ លោកអ្នកគួរតែចំនាយពេលវេលានៅជាមួយមនុស្សដែលគ្មានគូស្នេហ៍ ឬស្ថិតក្នុងស្ថានភាពដូចជាលោកអ្នកពីព្រោះមានតែពួកគេទេដែលយល់ពីអារម្មណ៍របស់លោកអ្នក ។
វិធីសាស្ត្រទី៥ ៖ លោកអ្នកត្រូវដើរចេញឱ្យឆ្ងាយពីអ្នកដែលមានគូស្នេហ៍ ជាពិសេសនៅពេលដែលពួកគេហៅលោកអ្នកឱ្យចូលរួមកន្លែងណាមួយជាមួយពួកគេពីព្រោះវាមិនត្រឹមតែធ្វើឱ្យលោកអ្នកមានអារម្មណ៍ឯកោកាន់តែខ្លាំងប៉ុណ្ណោះទេ ថែមទាំងអាចបំផ្លាញភាពរ៉ូម៉ែនទិករបស់ពួកគេទាំងពីរទៀតផង ។
វិធីសាស្ត្រទី៦ ៖ លោកអ្នកគួរតែចេះធ្វើឱ្យខ្លួនឯងរីករាយ ។ មិនមែនដោយសារនេះគឺជាថ្ងៃបុណ្យនៃក្តីស្រលាញ់ លោកអ្នកត្រូវតែចូលរួមប្រារព្ធពិធីនេះនោះទេ ប៉ុន្តែលោកអ្នកគួរតែធ្វើអ្វីដែលលោកអ្នកចង់ធ្វើ ឬធ្វើដូចធម្មតាដើម្បីបង្វែរអារម្មណ៍របស់លោកអ្នកឱ្យឈប់គិតពីវា ៕
0 comments:
Please add comment to express your opinion, and share it on Twitter or Facebook. Thank you in advance.