តាកែវៈ ក្នុងបំណងលើកស្ទួយវិស័យសិល្បៈ និងធ្វើការផ្សព្វផ្សាយពីវិស័យទេសចរណ៍នៅកម្ពុជាឲ្យកាន់តែបាន ទូលំទូលាយនោះ ក្រុមតារាចម្រៀងល្បីៗប្រចាំកម្ពុជាជាច្រើនដួងបានមកធ្វើការ ជួបជុំប្រមូលផ្តុំគ្នាដើម្បីធ្វើការប្រគំតន្ត្រីទេសចរណ៍ខ្នាត ធំ១៤ខេត្តក្រុងដែលមានឈ្មោះថា ការប្រគំតន្ត្រីទេសចរណ៍ស្រាបៀរអាន់ឆ័រ ដែលកម្មវិធីនេះត្រូវបានរៀបចំឡើងដោយក្រុមហ៊ុនស្រាបៀរ អាន់ឆ័រ(Anchor Beer) ។
ការប្រគំតន្ត្រីដ៏ធំនោះ មានការចូលរួមពីសំណាក់តារាល្បីប្រចាំផលិតកម្មនានាដូចជា លោក ព្រាប សុវត្ថិ ឆន សុវណ្ណរាជ ឆាយ វីរៈយុទ្ធ កញ្ញា ឱក សុគន្ធកញ្ញា មាស សុខសោភា អ៊ីវ៉ា ឈិត សុវណ្ណបញ្ញា សុខ ស្រីល័ក្ខណ៍ ប្រេម៉ា សូលីដេត និងតារាកិត្តិយសជាច្រើនដួងទៀត។
ទោះបីជាត្រូវធ្វើដំណើរផ្លូវឆ្ងាយ និងលំបាកបន្តិចក្តី ប៉ុន្តែការប្រគំតន្ត្រីនៅតែប្រព្រឹត្តទៅយ៉ាងរលូន ជាមួយនឹងស្នាមញញឹម និងសំឡេងហ៊ោទះដៃយ៉ាងរីករាយរបស់ពលរដ្ឋខ្មែរ១៤ខេត្តក្រុង។
តារាល្បីៗទាំងនោះ បាននិយាយថា៖«ពួកយើងមានភាពរីករាយមែនទែន នៅក្នុងយុទ្ធនាការផ្សព្វផ្សាយនេះ ក្រៅពីពួកយើងទទួលបានកម្រៃយ៉ាងសមរម្យក្នុងកម្មវិធីនេះ អ្វីដែលសំខាន់នោះ គឺពួកយើងបានចូលរួមចំណែកក្នុងសង្គមក្នុងការផ្សព្វផ្សាយពី វិស័យសិល្បៈខ្មែរ និងវិស័យទេសចរណ៍នៅកម្ពុជាដែលជាវិស័យអាទិភាពចម្បងរបស់ជាតិ»។
ក្រុមសិល្បៈទាំងនោះបន្តថា៖«នេះមិនមែនជាលើកទី១សម្រាប់ពួក យើងឡើយ ពួកយើងបានចូលរួមការប្រគំតន្ត្រីនេះចំនួន៣ឆ្នាំមកហើយ។ ឆ្នាំនេះយើងទទួលបានការងារច្រើន និងធំជាងមុន»។
អ្នកដឹកនាំកម្មវិធីការប្រគំតន្ត្រីទេសចរណ៍ របស់ស្រាបៀរ អាន់ឆ័រ និងជាអ្នកផលិតកម្មវិធីម្នាក់នៅស្ថានីយទូរទស្សន៍បានយ័ន លោក គង់ វិសាល បានឲ្យដឹងថា ព្រឹត្តិការណ៍ប្រគំតន្ត្រីដ៏ធំបែបនេះបានប្រព្រឹត្តទៅចំនួន៣ ឆ្នាំមកហើយ។
លោក គង់ វិសាល និយាយថា៖«ការប្រគំតន្ត្រីនេះ ធ្វើឡើងជារៀងរាល់ឆ្នាំ។ ខ្ញុំបានទទួលការងារនេះ ពីក្រុមហ៊ុនអាន់ឆ័រ ជាច្រើនឆ្នាំមកហើយ ដើម្បីធ្វើការផ្សព្វផ្សាយពីផលិតផលស្រាបៀរក្រុមហ៊ុននេះដោយ ផ្សារភ្ជាប់ទៅនឹងវិស័យទេសចរណ៍»។ លោកបន្តថា៖ «ការប្រគំតន្ត្រីនេះ ខ្ញុំគិតថា មានសារៈសំខាន់យ៉ាងខ្លាំង ព្រោះវាបានផ្តល់នូវពេលវេលាជាច្រើនសម្រាប់សិល្បករ-ការិនីយើង ក្នុងការចូលរួមផ្សព្វផ្សាយវិស័យទេសចរណ៍នៅកម្ពុជា»។
លោកបានលើកឡើងថា សិល្បករ-ការិនីមានតួនាទីយ៉ាងសំខាន់ក្នុងការជួយជំរុញការផ្សព្វផ្សាយ ព្រោះបើឲ្យមនុស្សធម្មតាទៅធ្វើការផ្សព្វផ្សាយនោះ មហាជនពួកគាត់មិនចង់ស្តាប់យើងទេ តែបើឲ្យសិល្បករ-ការិនីទៅផ្សព្វផ្សាយវិញ ពួកគាត់ពិតជារីករាយ និងធ្វើតាម។
លោក មាន សំអុល ប្រធានទីផ្សារក្រុមហ៊ុនស្រាបៀរអាន់ឆ័រ បានឲ្យដឹងថា ការប្រគំតន្ត្រីទេសចរណ៍នេះ បានធ្វើឡើងមិនមែនត្រឹមតែក្នុងបំណងផ្សព្វផ្សាយស្លាកសញ្ញាស្រាបៀរ អាន់ឆ័រ ឲ្យកាន់តែល្បីល្បាញប៉ុណ្ណោះទេ តែនោះក៏ជាការជួយលើកស្ទួយវិស័យសិល្បៈខ្មែរផងដែរ ពិសេសដើម្បីផ្សព្វផ្សាយពីវិស័យទេសចរណ៍នៅកម្ពុជា។
លោកបន្តថា ដោយសារទទួលការគាំទ្រកាន់តែខ្លាំង ពីមួយឆ្នាំទៅមួយឆ្នាំក្រុមហ៊ុនអាន់ឆ័រ កាន់តែពង្រីកនូវការផ្សព្វផ្សាយរបស់ខ្លួនជាបន្តបន្ទាប់។ ជាក់ស្តែងដូចជានៅឆ្នាំ២០១២នេះ យើងធ្វើការប្រគំតន្ត្រីចំនួន១៤ខេត្តក្រុង ខណៈកាលពីឆ្នាំ២០១០ យើងធ្វើ១០ខេត្ត និងឆ្នាំ២០១១ យើងធ្វើ១២ខេត្តនោះ។ លោកបញ្ជាក់ថា សម្រាប់ឆ្នាំ២០១២ ព្រឹត្តិការណ៍សិល្បៈទេសចរណ៍នេះ នឹងប្រព្រឹត្តទៅចំនួន១៤ខេត្តក្រុងក្នុងនោះ មានខេត្តព្រះសីហនុ កំពត តាកែវ កំពង់ស្ពឺ កំពង់ឆ្នាំង បន្ទាយមានជ័យ បាត់ដំបង សៀមរាប កំពង់ធំ ស្វាយរៀងព្រៃវែង ក្រចេះ ស្ទឹងត្រែង និងខេត្តរតនគិរី។
លោក មាន សំអុល មានប្រសាសន៍ថា៖«គោលបំណងសំខាន់សម្រាប់កម្មវិធីនេះធ្វើឡើងមិនគ្រាន់តែដើម្បីផ្សព្វផ្សាយពីស្លាកសញ្ញាស្រាបៀរអាន់ឆ័រមួយមុខ នេះទេ គឺយើងធ្វើស្ទើរតែគ្រប់ខេត្តក្រុង ដើម្បីលើកស្ទួយវិស័យសិល្បៈ ពិសេសដើម្បីបញ្ជ្រាបពីការផ្សព្វផ្សាយវិស័យទេសចរណ៍កម្ពុជាដ៏ សម្បូរបែប»។
លោកបន្ថែមថា៖«ការប្រឹងប្រែងរបស់យើង មួយឆ្នាំចំណាយប្រមាណ៣០ម៉ឺនដុល្លារនេះ ក៏ដើម្បីជាការជួបជុំគ្នារបស់ពលរដ្ឋខ្មែរក្នុងភូមិស្រុកនីមួយ ៗ ចែករំលែកក្ដីសប្បាយរីករាយជាមួយគ្នាផងដែរ ដោយយើងចាប់ផ្តើមនៅខេត្តព្រះសីហនុ និងបញ្ចប់នៅខេត្តរតនគិរី»៕
0 comments:
Please add comment to express your opinion, and share it on Twitter or Facebook. Thank you in advance.