ភ្នំពេញៈ មិនខុសពីពាក្យចាស់លោកពោលថា «ខ្ញីកាន់តែចាស់ កាន់តែហឹរ» តារាចម្រៀងឈរតំណែងកំពូលគ្មានគូប្រជែងជាង១០ឆ្នាំជាប់ៗគ្នា លោក ព្រាប សុវត្ថិ ក៏កំពុងតែមមាញឹកស្ទើរគ្មានពេលទំនេរនៅក្នុងកម្មវិធីប្រគំ តន្ត្រីផ្សេងៗនារដូវនេះ។ ទោះបីជាខ្លួនមានវ័យច្រើនបន្តិចក្តី តែបើតាមប្រភពពីមជ្ឈដ្ឋានសិល្បៈ និងក្រុមហ៊ុនផ្សេងៗបានឲ្យដឹងថា លោកព្រាប សុវត្ថិ នៅតែមានតម្លៃខ្លួនខ្ពស់កប់ពពកចន្លោះពី៣៥០០ ទៅ៤០០០ដុល្លារក្នុងមួយកម្មវិធី តែតម្លៃខ្លួននេះមិនមែនជាឧបសគ្គសម្រាប់ក្រុមហ៊ុន និងស្ថាប័នផ្សេងៗឡើយ ពោលគឺលោកនៅតែមានទីផ្សារយ៉ាងមមាញឹក។
រដូវនេះ បើក្នុងវិស័យសិល្បៈគេហៅថា «រដូវកើបប្រាក់តាមខេត្ត» ដែលតារាចម្រៀងប្រុសស្រីស្ទើរគ្រប់គ្នាតែងទទួលបានការងារចេញ ច្រៀងឲ្យស្ថាប័នផ្សេងៗយ៉ាងគគ្រឹកគគ្រេង។ ដោយឡែកកំពូលតារាចម្រៀង ព្រាប សុវត្ថិ បានឲ្យដឹងថា ឈានចូលខែនេះ ក្រុមហ៊ុនជាច្រើនតែងរៀបចំកម្មវិធីផ្សេងៗតាមបណ្តាខេត្តក្រុង ដូច្នេះលោកទទួលបានការងារច្រើននៅក្នុងរដូវនេះ។ លោកបន្តថា កម្មវិធីទាំងនោះមិនមែនសុទ្ធតែនៅតាមខេត្តទាំងអស់នោះទេ ពោលគឺអាស្រ័យតាមកម្មវិធី។
តារាចម្រៀងវ័យ៣៦ឆ្នាំរូបនេះ មានប្រសាសន៍ថា៖«ខ្ញុំទទួលបានការងារចេញច្រៀងច្រើននៅរដូវនេះ ព្រោះសឹងតែគ្រប់ក្រុមហ៊ុនគេតែងរៀបចំកម្មវិធីផ្សេងៗនៅក្នុង រដូវនេះ ជាខែដែលអត់ភ្លៀង ពោលគឺនៅរដូវប្រាំងរយៈពេល៥-៦ខែហ្នឹង យើងមានកម្មវិធីរហូត»។ តែទោះបីជាយ៉ាងណា នៅក្នុងរដូវវស្សាលោកបានឲ្យដឹងថា លោកក៏ទទួលបានកម្មវិធីច្រើននៅភ្នំពេញដែរ។
ទន្ទឹមនឹងទទួលបានការងារចេញច្រៀងក្នុងកម្មវិធីនានាច្រើន គេបានដឹងថា ក្នុងចំណោមតារាចម្រៀងល្បីៗទាំងប្រុសទាំងស្រីដូចជា ខេមរៈ សេរីមន្ត ឆាយ វីរៈយុទ្ធ ឆន សុវណ្ណរាជ កែវ វាសនា ឱក សុគន្ធកញ្ញា មាស សុខសោភា សុខ ពិសី គ្មានអ្នកណាម្នាក់មានតម្លៃខ្លួនខ្ពស់ដូចលោក ព្រាប សុវត្ថិ ដែរ ហើយប្រជាប្រិយភាពក៏មិនទាន់មានតារាចម្រៀងណាអាចនឹងប្រជែងនឹង លោកបាននៅឡើយ។
តាមប្រភពពីមជ្ឈដ្ឋានសិល្បៈបានឲ្យដឹងថា តម្លៃខ្លួនរបស់លោក ព្រាប សុវត្ថិ ពេលច្រៀងមួយកម្មវិធីមានតម្លៃខ្លួនចន្លោះពី៣០០០ទៅ៤០០០ដុល្លារ ពោលគឺមានការប្រែប្រួលទៅតាមទីតាំងជិតឆ្ងាយ ខេត្ត ឬក៏ក្រុង។ អ្នករៀបកម្មវិធីមួយចំនួនបានបង្ហើបឲ្យដឹងថា ពេលលោក ព្រាប សុវត្ថិ ច្រៀងនៅភ្នំពេញ តម្លៃខ្លួនគឺ៣០០០ដុល្លារ ឬក៏ច្រើនជាងនេះ។ រីឯតម្លៃខ្លួនរបស់លោកទៅច្រៀងនៅតាមបណ្តាខេត្តវិញ គឺចន្លោះពី៣៥០០ ទៅ៤០០០ដុល្លារ ដែលតម្លៃខ្លួននេះមានការកើនឡើងខ្ពស់ ខណៈដែលតារាចម្រៀងមួយចំនួនបានធ្លាក់តម្លៃខ្លួននោះ។
ពាក់ព័ន្ធនឹងតម្លៃខ្លួននេះ លោក ព្រាប សុវត្ថិ ហាក់មានភាពស្ទាក់ស្ទើរក្នុងការប្រាប់លម្អិត ដោយលោកបានលើកហេតុផលថា៖«បាទ! សុំទោស រឿងនេះ ខ្ញុំមិនអាចប្រាប់ដោយបើកចំហបានទេ ខ្ញុំសុំទុករឿងនេះជារឿង secret (ការសម្ងាត់) តែត្រង់គេថា ៣០០០ ឬ៤០០០ដុល្លារហ្នឹង វាជារឿងរបស់គេ»។ ទោះបីយ៉ាងណាលោក ព្រាប សុវត្ថិ ប្រាប់ថា តម្លៃខ្លួនរបស់លោកមិនមែនជាបញ្ហាចោទសម្រាប់ក្រុមហ៊ុននានានោះ ទេ។
លោកបានមានប្រសាសន៍ថា៖«ក្រុមហ៊ុនគាត់មករកខ្ញុំធ្វើការ ខ្ញុំមានតម្លៃខ្លួនរបស់ខ្ញុំ អ៊ីចឹងខ្ញុំដូចជាមិនដែលមានបញ្ហារឿងតម្លៃខ្លួននេះទេ»៕ source
0 comments:
Please add comment to express your opinion, and share it on Twitter or Facebook. Thank you in advance.