ប្រសិនបើលោកអ្នកគិតថា ការបង្កើនសមត្ថភាពខួរក្បាលគឺជាកិច្ចការដ៏លំបាកមួយនោះ សូមគិតជាថ្មីម្តងទៀត ។ វាមិនមែនគ្រាន់តែជាវិធីសាស្ត្រងាយៗនោះទេ ប៉ុន្តែវាប្រាកដជាអាចជួយលោកអ្នកបាន ។ វីធីសាស្ត្រល្អៗមួយចំនួនខាងក្រោមនឹងអាចជួយលោកអ្នកក្នុងការបង្កើនថាមពលខួរក្បាលឱ្យបានកាន់តែប្រសើរ ។ធ្វើលំហាត់ប្រាណ
លំហាត់ប្រាណមានសារសំខាន់ណាស់សម្រាប់ជីវិតប្រចាំថ្ងៃ ។ លំហាត់ប្រាណជាប្រចាំថ្ងៃជួយលោកអ្នកបញ្ចេញជាតិពុលពីរាងកាយ ដុតបំផ្លាញកាឡូរី និងរក្សារាងកាយឱ្យបានស្អាតសមសួន ។ ក្រៅពីអត្ថប្រយោជន៍នេះ លំហាត់ប្រាណជួយឱ្យខួរក្បាលដំណើរការបានល្អ ពង្រឹងសមត្ថភាពប្រព័ន្ធប្រសាទខួរក្បាល និងបង្កើនថាមពលដល់ខួរក្បាល ។
ធ្វើលំហាត់ខួរក្បាល
ក្រៅពីធ្វើលំហាត់ប្រាណ លោកអ្នកគួរតែធ្វើលំហាត់ខួរក្បាលបន្ថែមទៀត ។ លោកអ្នកគួរតែសាកល្បងធ្វើលំហាត់ខួរក្បាលដូចខាងក្រោមនេះ ហើយសម្គាល់ពីអត្ថប្រយោជន៍របស់វា ។
- ប្រើដៃម្ខាងទៀត (ដៃឆ្វេង) ធ្វើកិច្ចការប្រចាំថ្ងៃដូចជាបើកទ្វារ បើកគម្របកំប៉ុង ឬលើករបស់ស្រាលៗ... ។
- ធ្វើការពិភាក្សាលើប្រធានបទអ្វីមួយជាមួយមិត្តភក្តិ ។
- បង្កើនការចងចាំដោយរៀនច្រៀងចម្រៀងថ្មីៗ ឬអត្ថបទកំណាព្យរាល់សប្តាហ៍ ។
- ព្យាយាមគណនាលេខដោយខ្លួនឯងដោយមិនចាំបាច់ប្រើម៉ាស៊ីនគិតលេខ ។
- បង្ខំខួរក្បាលរបស់លោកអ្នកឱ្យចងចាំអ្វីមួយពីអតីតកាល ។ វាអាចជាឈ្មោះរបស់នរណាម្នាក់ ប៉ុន្តែលោកអ្នកមិនគួរប្រើប្រាស់តម្រុយណាមួយនោះទេគឺត្រូវព្យាយាមនឹកឱ្យឃើញដោយប្រើតែខួរក្បាលប៉ុណ្ណោះ ។
លេងល្បែងខួរក្បាល
កិច្ចការមួយដែលសប្បាយក្នុងការពង្រឹងសមត្ថភាពខួរក្បាលនោះគឺលេងល្បែងកំសាន្តដែលតម្រូវឱ្យអ្នកប្រមូលអារម្មណ៌ សម្មាធិ និងគិត ។ មានល្បែងកំសាន្តជាច្រើនដែលជួយពង្រឹងថាមពលខួរក្បាល ហើយគួរជ្រើសរើសល្បែងកំសាន្តណាដែលលោកអ្នកចូលចិត្ត ។ ចំណាយពេលខ្លះលេងល្បែងកំសាន្ត Sudoku (ល្បែងម្យ៉ាងដែលប្រើសលេខដើម្បីលេងកំសាន្ត) ឬប្រសិនបើលោកអ្នកចាប់អារម្មណ៌លើការស្វែងរកពាក្យអ្នកគួរតែលេងល្បែងកំសាន្តស្បែងរកពាក្យ និងគួរតែព្យាយាមសាកល្បងលេងល្បែងកំសាន្តដែលប្រាស់ប្រាស់ខួរក្បាលដើម្បីលេងផ្សេងៗទៀត ។ ម្យ៉ាងទៀត លោកអ្នកគួរលេង វីដេអូហ្គេម ណាដែលតម្រូវឱ្យលោកអ្នករៀបផែនការ និងប្រើយុទ្ធវិធី ។
សម្រាក
វិធីសំខាន់មួយទៀតដែលជួយបំពេញថាមពលខួរក្បាលគឺការសម្រាកឱ្យបានគ្រប់គ្រាន់ ។ ការធ្វើសម្មាធិជួយឱ្យលោកអ្នកប្រមូលអារម្មណ៌បានល្អ និងមានចិត្តស្ងប់ ហើយខួរក្បាល និងរាងកាយសម្រាកបានល្អ ។ លើសពីនេះ វាជួយឱ្យលោកអ្នកគេងយប់បានយ៉ាងលង់លក់ ។ ប្រសិនបើសម្រាកមិនបានគ្រាប់គ្រាន់ លោកអ្នកនឹងមិនមានថាមពលសម្រាប់បំពេញកិច្ចការផ្សេងៗនោះទេ ។
របបអាហារ
ការគ្រប់គ្រងរបបអាហារមិនមែនជាកិច្ចការដែលលំបាកនោះទេ ។ មានអាហារល្អៗជាច្រើនសម្រាប់ខួរក្បាលដូចជាស្កសូកាឡា អាស៊ីតអូមេហ្គា ៣ (ភាគច្រើនសម្បូរក្នុងខ្លាញ់ត្រីសមុទ្រ) គ្រាប់ធញ្ញជាតិ និងត្រីជាដើម ។ ការទទួលបានសារធាតុចិញ្ចឹមគ្រប់គ្រាន់គឺជាគន្លឹះសំខាន់ក្នុងការបង្កើនថាមពលខួរក្បាល ។
វិធីសាស្ត្រមួយចំនួនផ្សេងទៀត ៖
- រៀនប្រើឩបករណ៌តន្ត្រី
- អានអត្ថបទដែលចូលចិត្តជាប្រចាំ
- គេងថ្ងៃ
- បង្កើតទំលាប់ថ្មី
- រៀនភាសា
- សរសេរកំណត់ហេតុប្រចាំថ្ងៃ
- សើចឱ្យបានច្រើនយ៉ាងតិចណាស់ពីរដងក្នុងមួយថ្ងៃ
- គ្រប់គ្រងភាពតានតឹងឱ្យបានល្អ
- ជួបនឹងមនុស្សថ្មីៗ
- យំនៅពេលលោកអ្នកចង់យំ ។ ការទុកភាពសោកសៅធ្វើឱ្យខូចប្រយោជន៍ដល់ខួរក្បាល ហើយការយំឱ្យអស់ទឹកភ្នែកជួយឱ្យឈាមរត់បានល្អក្នុងសរសៃរឈាម ។
លោកអ្នកអាចប្រើវិធីសាស្ត្រណាមួយខាងលើដើម្បីជួយពង្រឹងថាមពលខួរក្បាលដោយវានឹងជួយឱ្យសមត្ថភាពខួរក្បាលកាន់តែប្រសើរឡើង ៕
0 comments:
Please add comment to express your opinion, and share it on Twitter or Facebook. Thank you in advance.