តាមការសិក្សាស្រាវជ្រាវថ្មីមួយបង្ហាញថា ការទទួលទានថ្នាំគ្រាប់វីតាមីនបន្ថែមច្រើនអាចប៉ះពាល់អាក្រក់ច្រើនជាងផលល្អ ។ ក្រុមអ្នកស្រាវជ្រាវមកពីសាកលវិទ្យាល័យ Minnesota បានសិក្សាលើទិន្នន័យនៃការសិក្សាដែលបានចាប់ផ្តើមតាំងពីឆ្នាំ១៩៨៦អំពីសុខភាពរបស់ស្ត្រីចំនួនច្រើនជាង៣៩.០០០នាក់ដែលមានអាយុប្រហែល៦២ឆ្នាំដោយការប្រមូលទិន្នន័យអំពីការប្រើប្រាស់ថ្នាំវីតាមីនបន្ថែមរបស់ស្ត្រីនៅឆ្នាំ១៩៨៦ ១៩៩៧ និង២០០៤ ។លទ្ធផលនៃសិក្សានេះបង្ហាញថា ស្ត្រីដែលបានប្រើប្រាស់ថ្នាំវីតាមីនបន្ថែមមានកំណើនប្រឈមនឹងការស្លាប់ជាមធ្យម២,៤ភាគរយច្រើនជាងស្ត្រីដែលពុំបានប្រើប្រាស់ថ្នាំវីតាមីនបន្ថែម ។
ការសិក្សានេះសង្កត់ធ្ងន់លើទំនាក់ទំនងរវាអត្រាមរណៈភាព និងការប្រើប្រាស់ថ្នាំវីតាមីនបន្ថែម និងសារធាតុខនិជដែលរួមមានការប្រើប្រាស់ថ្នាំវីតាមីនចំរុះ វីតាមីន B6 អាស៊ីតហ្វូលិច (folic acid) ជាតិដែក ម៉ាញ៉េស្យូម ស័ង្កសី និងទង់ដែង ។ លទ្ធផលបានបង្ហាញថា ក្នុងចំណោមស្ត្រី១២.៧៦៩នាក់ដែលបានប្រើប្រាស់ថ្នាំវីតាមីនបន្ថែម មាន៤០,៨ភាគរយបានទទួលមរណៈភាពនៅចុងឆ្នាំ២០០៨ ខណៈដែល៣៩,៨ភាគរយនៃស្ត្រីចំនូន១០.១៦១នាក់ដែលពុំប្រើប្រាស់ថ្នាំវីតាមីនបន្ថែមបានទទួលមរណៈភាពនៅក្នុងឆ្នាំដូចគ្នានេះដែរ ។
លោក Mursu និយាយថា កំណើនគ្រោះថ្នាក់នៃការស្លាប់នេះអាចបណ្តាលមកពីការប្រមូលផ្តុំគ្នាយ៉ាងច្រើននៃសារធាតុរបស់វីតាមីនបន្ថែមទាំងនោះ ។ ថ្នាំវីតាមីនបន្ថែមភាគច្រើនផ្ទុកបរិមាណសារធាតុចិញ្ចឹមយ៉ាងច្រើនជាងបរិមាណសារធាតុចិញ្ចឹមដែលអាហារអាចផ្តល់ឱ្យ ហើយវាក៏ត្រូវបានដឹងដែរថា ការប្រមូលផ្តុំសារធាតុចិញ្ចឹមច្រើនមុខអាចបណ្តាលឱ្យពុល ជាពិសេសប្រសិនបើការប្រើប្រាស់កាន់តែយូរព្រោះសារធាតុចិញ្ចឹមទាំងនោះនឹងត្រូវបានសារពាង្គកាយប្រើប្រាស់ ។
ខណៈដែលសារធាតុខនិជ និងវីតាមីនជាប្រភពនៃសារធាតុចិញ្ចឹម ការប្រើប្រាស់ច្រើនហួសពុំបានបង្ហាញថាមានប្រយោជន៍នោះទេ ។ ការប្រើប្រាស់ថ្នាំវីតាមីនបន្ថែមផ្តល់ឱ្យសារពាង្គកាយនូវសំណាញ់សុវត្ថិភាពចំពោះមនុស្សដែលទទួលវីតាមីនពុំគ្រប់គ្រាន់ ចំណែកការប្រើប្រាស់វីតាមីនច្រើនពេកនឹងបង្កឱ្យមានបញ្ហា ។
លោក Mursu និងក្រុមអ្នកស្រាវជ្រាវរបស់លោកជឿជាក់ថា គ្រោះថ្នាក់ដែលអាចបង្កឡើងដោយពពួកសារធាតុចិញ្ចឹមមានក្នុងថ្នាំវីតាមីនគឺទាក់ទងនឹងបរិមាណមិនគ្រប់គ្រាន់ និងច្រើនពេក ។ ការទទួលបានវីតាមីនតិចតួចពេកបណ្តាលឱ្យវីតាមីនគ្មានប្រសិទ្ធភាព ចំណែកការប្រើប្រាស់វីតាមីនច្រើនពេកបណ្តាលឱ្យប្រឈមមុខនឹងជាតិពុលរួមទាំងជម្ងឺផងដែរ ។
ការសិក្សារបស់ក្រុមលោក Jaakko Mursu ក៏ដូចជាការសិក្សាស្រដៀងគ្នានេះដទៃទៀតដែរបានផ្តល់ភស្តុតាងតិចតួចដែលបញ្ជាក់ថា ការប្រើប្រាស់ថ្នាំវីតាមីនបន្ថែមជាប្រចាំអាចជួយការពារពីជម្ងឺរ៉ាំរ៉ៃ ។ លោក Mursu បានឱ្យដំបូន្មានថា មនុស្សគ្រប់រូបគួរពិចារណាឡើងវិញថាតើគួរជ្រើសរើសយកការប្រើប្រាស់ថ្នាំវីតាមីនបន្ថែម ឬយកចិត្តទុកដាក់លើរបបអាហារសុខភាព ៕
0 comments:
Please add comment to express your opinion, and share it on Twitter or Facebook. Thank you in advance.