កំពង់ស្ពឺ ៖ រទេះសាឡីជាច្រើនគ្រឿងកំពុងតែហ្វឹកហាត់ជារៀងរាល់ថ្ងៃដើម្បីត្រៀមខ្លួនចូលរួមការប្រណាំងដណ្ដើមពានរង្វាន់អបអរសាទរថ្ងៃបុណ្យចូលឆ្នាំខ្មែរប្រពៃណីជាតិនាពេលខាងមុខឆាប់ៗនេះ។
ក្រុមអ្នកលេងគោ និងរទេះសាឡីនបាននាំគ្នាហ្វឹកហាត់ស្ទើររាល់ថ្ងៃនៅត្រង់ចំណុចវាលស្រែខាងត្បូងភូមិព្រៃតាអូក ឃុំ រកាកោះ ស្រុក គងពិសី ខេត្តកំពង់ស្ពឺ ហើយកីឡារទេះសាឡីនេះមានការចូលរួមពីប្រជាពលរដ្ឋតាមភូមិក្នុងឃុំ សែនដី ស្រុក សំរោងទង ឃុំ រកាកោះ និង ឃុំ រលាំងកែន ស្រុក កណ្ដាលស្ទឹង ខេត្តកណ្ដាល។
ជារៀងរាល់ឆ្នាំអ្នកធ្វើដំណើរឆ្លងកាត់ផ្លូវលេខ២៤១ បាននាំគ្នាឈប់មើលសកម្មភាពហ្វឹកហាត់ ការប្រណាំងរទេះគោនេះយ៉ាងច្រើនកុះករ ព្រោះតែកីឡាប្រភេទនេះ ត្រូវបានគេបោះបង់ចោលជាច្រើនឆ្នាំមកហើយ ទើបតែបច្ចុប្បន្ននេះគេចាប់ផ្ដើមបង្កើតឡើងវិញប៉ុណ្ណោះ។
តាមសំដីក្រុមអ្នករទេះសាឡីក្នុងទឹកមុខសប្បាយរីករាយនិយាយថា ពួកគាត់ស្ទើររាល់ព្រឹកបាននាំគ្នាជួបជុំនៅទីលាននោះធ្វើការបង្វឹកគោរបស់ខ្លួនត្រៀមប្រណាំងពេលបុណ្យចូលឆ្នាំ។ ប្រភពបានបន្តថា អ្នកប្រណាំងភាគច្រើនសុទ្ធតែជាអ្នកលេងគោល្អ ដើម្បីបង្អួតគ្នា ពីសមត្ថភាពគោរបស់ខ្លួនរៀងៗខ្លួន។
ក្រុមកីឡាកររទេះសាឡីបានកីឡាប្រភេទនេះ ទើបតែរៀបចំឲ្យមានការប្រកួតក្នុងរយៈពេល២ទៅ៣ឆ្នាំនេះប៉ុណ្ណោះ ដែលកន្លងទៅត្រូវគេបានបោះបង់ចោលរាប់ឆ្នាំមកហើយនោះ។
យោងតាមការឲ្យដឹងពីសំណាក់មនុស្សចាស់ៗ ដែលមានអាយុចាប់ពី ៦០ឆ្នាំឡើង បានលើកឡើងថា ចាស់ៗជំនាន់មុនពួកគាត់តែងតែនាំគ្នាប្រណាំងរទេះសាឡីនេះក្រោយពេលច្រូតកាត់រួចរាល់ ដោយជំរើសគោល្អ ប្រចាំភូមិមួយៗ ទៅបង្អួតដាក់គ្នា ហើយវាជាប្រពៃណីមួយមានតាំងពីបុរាណកាលមកម្ល៉េះ ប៉ុន្តែត្រូវបាត់បង់មួយរយៈពេលវែង ឥឡូវនេះរំលឹកឡើងវិញ៕ប្រភព
0 comments:
Please add comment to express your opinion, and share it on Twitter or Facebook. Thank you in advance.