រាជនី ប៉ុបជប៉ុន លែង ប្តី

តូក្យូ ៖ បណ្តាញព័ត៌មាន ក្នុងស្រុក បានរាយការណ៍ ឲ្យដឹងថា រាជនី ប៉ុប ដ៏កំពូល របស់ជប៉ុន ឈ្មោះ អាយូមី ហាម៉ាសាគី បាន លែងលះគ្នា ជាមួយស្វាមី របស់នាង ដែលជាតារាសម្តែង សញ្ជាតិ អូស្រ្តាលី លោក Manuel Schwarz ក្រោយពេលដែល រៀបការ ជាមួយគ្នា អស់រយៈពេល មួយឆ្នាំមកនោះ ។

យោងតាម គេហទំព័រ Channel News Asia បានឲ្យដឹង នៅថ្ងៃពុធ ទី ១៨ ខែមករា ឆ្នាំ ២០១២ ថា ហាម៉ាសាគី អាយុ ៣៣ឆ្នាំ និង លោក Manuel Schwarz អាយុ ៣១ឆ្នាំ បានរៀបការ ជាមួយគ្នា កាលពីថ្ងៃទី០១ ខែមករា ឆ្នាំមុន ហើយនាងមានគម្រោងផ្លាស់ប្តូរ ទៅរស់នៅ សហរដ្ឋអាមេរិក ជាមួយស្វាមីរបស់នាង ផងដែរ ។

សេចក្តីរាយការណ៍ របស់ព័ត៌មានជប៉ុន ក្យូដូ បានឲ្យដឹងថា នាង ហាម៉ាសាគី ដែលគេស្គាល់ជា ទូទៅថា អាយូ ដោយសារតែ ភាព ល្បីល្បាញរបស់នាង នៅអាស៊ី ហើយបានចាប់ផ្តើម ការគិតជាលើកទីពីរ អំពីការចាកចេញ ពីជប៉ុន ក្រោយពីមានការរញ្ជួយដី និង ស៊ូណាមិ កាលពីថ្ងៃទី១១ ខែមីនា កន្លងមកនោះ ។

ក្យូដូបានបន្តទៀតថា ហាម៉ាសាគី បានជួបជាមួយនឹង តួសម្តែងប្រុសនៅ Los Angeles កាលពីខែសីហា ឆ្នាំ ២០១០ ខណៈដែល នាងកំពុងធ្វើការ ផ្សព្វផ្សាយវីដេអូ ចម្រៀង Virgin Road របស់នាង ចំពោះឯកសារ នៃការលែងលះ នៅអាមេរិក គឺឆ្លងតាមរយៈ មេធាវី របស់នាងផងដែរ ។

គួរបញ្ជាក់ផងដែរថា នាង ហាម៉ាសាគី បានចាប់អាជីព ជាតារាម៉ូដែល និងតារាសម្តែងស្រី នឹងបានទទួលភាពល្បីល្បាញ ក្នុង ចំណោមយុវតីជាច្រើនទៀត ហើយនាងក៏បាន ចាប់យក អាជីព ជាអ្នកចម្រៀងផងដែរ នៅឆ្នាំ ១៩៩៨ នោះ ៕

Share