កៅស៊ូក្រែបដែលគេកែច្នៃរួចត្រូវបានដាក់តាំងបង្ហាញក្នុងសន្និសីទសកលស្តីពីកៅស៊ូកាលពីពេលថ្មីៗនេះនៅរាជធានីភ្នំពេញ។ រូបថត ហេង ជីវ័ន
ភ្នំពេញៈ កំណើននៃការនាំចេញកៅស៊ូរបស់កម្ពុជា ឆ្នាំ២០១១ មានរហូតដល់៥៥,៥៤ភាគរយ បើធៀបនឹងឆ្នាំ ២០១០ ខណៈតម្លៃនៃការនាំចេញបានកើនឡើង១៣១,៥៩ភាគរយ។ នេះបើតាមទិន្នន័យផ្លូវការដែលភ្នំពេញប៉ុស្តិ៍ទទួលបានពីក្រសួងពាណិជ្ជកម្មកាលពីចុងសប្តាហ៍មុន។
មន្ត្រីអះអាងថា តម្រូវការទីផ្សារក្រៅប្រទេស និងកំណើនបរិមាណផលកៅស៊ូជាកត្តាជំរុញសន្ទុះនៃការនាំចេញនេះ។
ទិន្នន័យបង្ហាញថា ការនាំចេញកៅស៊ូនៅ ២០១១ មានប្រមាណ ៤៦ ៧២៧តោន បើធៀបកាលពីឆ្នាំ២០១០ ដែលមានប្រមាណតែ ៣០ ០៤០តោនប៉ុណ្ណោះ។ ទន្ទឹមនោះតម្លៃនៃការនំាចេញកើនឡើង ពី៨៦,៧៦លានដុល្លារកាលឆ្នាំ២០១០ទៅដល់២០០,៩៣លានដុល្លារនៅឆ្នាំ ២០១១។
លោក លី ផល្លា អគ្គនាយកនៃអគ្គនាយកដ្ឋានកៅស៊ូនៃក្រសួងកសិកម្មរុក្ខាប្រមាញ់ និងនេសាទ បានឲ្យដឹងថា ការនាំចេញកៅស៊ូរបស់កម្ពុជានៅអំឡុងពេលឆ្នាំ ២០១១កើនឡើងដោយសារតែទិន្នផលកៅស៊ូកម្ពុជាមានការកើនឡើង និងតម្រូវការជ័រកៅស៊ូបានស្ទុះឡើងវិញ។ ទោះបីយ៉ាងណាក៏ដោយនៅឆ្នាំនេះកំណើននឹងមានតិចតួចប៉ុណ្ណោះ។
លោកបញ្ជាក់ថា៖ «តម្រូវការជ័រកៅស៊ូរបស់ពិភពលោកនៅឆ្នាំ ២០១២នេះ ត្រូវបានគេព្យាករថានឹងកើនលើស ២០១១ តែ៥,៥ភាគរយប៉ុណ្ណោះ ដោយសារតែពិភពលោកកំពុងតែស្តារសេដ្ឋកិច្ច ដែលផលិតកម្មខ្លះកំពុងនៅទ្រឹងនៅឡើយ»។
ប៉ុន្តែលោកលើកឡើងថា ការនាំចេញកៅស៊ូកម្ពុជានៅឆ្នាំ២០១២ នឹងនៅតែបន្តកើនឡើង។
លោក ម៉ក់ គឹមហុង ប្រធានសមាគមកៅស៊ូកម្ពុជា និងជាម្ចាស់ចម្ការកៅស៊ូជុប នៅខេត្តកំពង់ចាមឲ្យដឹងថា ការនាំចេញជ័រកៅស៊ូរបស់ក្រុមហ៊ុនលោកនៅឆ្នាំ២០១១ មានប្រមាណ១២ ០០០តោន ដែលចំនួននេះបានកើនឡើងលើសពីឆ្នាំ២០១០ ប្រមាណ១ពាន់តោន។ លោកបញ្ជាក់ថា៖ «ដោយសារតែចំនួនដើមកៅស៊ូដែលផ្តល់ផលរបស់យើងមានការកើនឡើង»។
លោកបន្តថា បច្ចុប្បន្នតម្លៃកៅស៊ូប្រភេទលេខមួយក្នុងមួយតោនថ្លៃប្រហែល ៣ ៣០០ ដុល្លារ។
លោកបន្ថែមទៀតថា តម្លៃកៅស៊ូកើនឡើង នៅអំឡុងប៉ុន្មានខែដើមឆ្នាំនេះ។
តាមលោក លី ផល្លា ការដាំកៅស៊ូនៅឆ្នាំ ២០១០ មានប្រមាណតែ ១៨១ ៤៥០ហិកតា និងបានកើនឡើងដល់ជាង២១ម៉ឺនហិកតានៅឆ្នាំ២០១១ ហើយវាត្រូវបានគេរំពឹងថានឹងអាចកើនបានយ៉ាងហោចណាស់ ៣០ម៉ឺនហិកតានៅឆ្នាំ២០២០។
រដ្ឋាភិបាលនឹងជំរុញការនាំចេញកៅស៊ូដូចអង្ករដែរ៕ source
0 comments:
Please add comment to express your opinion, and share it on Twitter or Facebook. Thank you in advance.