“សាច់ក្រកអាំងសំខាន់គឺបច្ចេកទេសមើលថែរក្សាភ្លើងឲ្យមានកម្ដៅគ្រប់គ្រាន់ ទើបសាច់ក្រកអាចឆ្អិនដល់សាច់ខាងក្នុងនិងមានរសជាតិឈ្ងុយឆ្ងាញ់”។ នេះជាសម្ដីរបស់អ្នកលក់សាច់ក្រកអាំងនៅផ្សារអូរឫស្សី។
អ្នកស្រី គឹម វ៉ាន អាយុ៦៣ឆ្នាំ អ្នកលក់សាច់ក្រកនៅម្ដុំផ្សារអូរឬស្សីបានឲ្យដឹងថា គាត់លក់សាច់ក្រកនៅទីនេះ ជិត៧ឆ្នាំហើយ។ អ្នកលក់រូបនេះអះអាងថា សាច់ក្រកគាត់លក់ដាច់ខ្លាំងណាស់ ព្រោះថា អ្នកញ៉ាំតែងចូលចិត្តរសជាតិបែបនេះ។ អ្នកស្រីអះអាងបន្ថែមទៀតថា សាច់ក្រកកន្លែងគាត់ ទទួលបានការនិយមចូលចិត្តពីគ្រប់វ័យ មិនថាចាស់ មិនថាក្មេង មិនថាអ្នកមាន ឬអ្នកក្រនោះទេ។
ប្រែសាច់ក្រកបណ្ដើរ អ្នកស្រីងាកមកឆ្លើយប្រាប់ Sabay បន្ថែមទៀតថា សាច់ក្រក មានរសជាតិឆ្ងាញ់ បើវានៅក្ដៅៗ។ ជាទូទៅ សាច់ក្រកគោ មានជាតិខ្លាញ់ច្រើន អាចទ្រលាន់ ដូចនេះ គេច្រើនញ៉ាំជាមួយជ្រក់ និងនំប៉័ង ទើបមិនសូវទ្រលាន់ដូចមុន។
លោកស្រី គឹម វាន់ បានបង្ហាញពីរូបមន្តដោយលាក់លៀមថា “គ្មានអ្វីក្រៅពីទិញសាច់គោត្រង់យាវៗ ដែលភាគច្រើនគេហៅសាច់គោសម្រាប់ស្លម្ជូរគ្រឿង ដែលមានជាប់ខ្លាញ់ច្រើន… រួចហើយយកមកចិញ្ច្រាំផ្សំជាមួយគ្រឿងឲ្យគ្រប់”។
លោក សុគន្ធ អង្គុយលើម៉ូតូ ប្រាប់អ្នកលក់ឲ្យខ្ចប់បាននិយាយថា “ទិញសាច់ក្រកទីនេះ រាល់ថ្ងៃ ព្រោះរសៀលបែបនេះ វាជាអាហារសម្រន់ ទម្រាំដល់ពេលបាយល្ងាច… រស់ជាតិរបស់វាក៏ឆ្ងាញ់គ្រាន់បើដែរ”។
យុវជនស៊ុយ ម៉េងហុង រស់នៅម្ដុំ ក្រោយវត្តមហាមន្ត្រី ដែលបានមកទិញសាច់ក្រកដែរនោះ និយាយថា ”សាច់ក្រកជាអាហារ ដែលយើងអាចញ៉ាំទទេក៏បាន ទិញយកទៅញ៉ាំជាមួយបាយក៏បាន”។ ប៉ុន្តែយុវជនម្នាក់នេះបានសម្ដែងការព្រួយបារម្ភថា ”ខ្លាចតែដុះក្បាលពោះ ដោយសារខ្លាញ់ច្រើនពេក”។
អ្នកលក់ម្នាក់នេះ បាននិយាយរាងត្អូញបន្តិចថា “ឥឡូវនេះ មិនដូចពីមុនទេ កាលមុននៅកន្លែងចាស់លក់ដាច់ខ្លាំងជាងនេះទៅទៀត មួយថ្ងៃលក់បាន៧០០ដើម ប៉ុន្តែកាលណោះ ម្ចាស់ផ្ទះគេដេញជើង ដោយដាក់ឲ្យអ្នកផ្សេងលក់”។ គាត់បានបន្ថែមទៀតថា ឥឡូវនេះ ទាំងបោះដុំ និងអាំងលក់ផ្ទាល់លក់បានជិត២០០ដើមដែរ។ បើគិតពីចំណូល គឺបានជិត៣០ម៉ឺនក្នុង១ថ្ងៃ៕
0 comments:
Please add comment to express your opinion, and share it on Twitter or Facebook. Thank you in advance.