លោក Bill Gates សហស្ថាបនិករបស់ក្រុមហ៊ុន Microsoft។ Reuters
ក្រុងយ៉ាងហ្គូនៈ ក្រុមមន្ត្រីនៃក្រសួងឧស្សាហកម្មភូមា បានឲ្យដឹងកាលពីថ្ងៃពុធថា ប្រតិភូមួយក្រុមនៃថ្នាក់ដឹកនាំបណ្តាក្រុមហ៊ុនពាណិជ្ជកម្ម អាមេរិក នឹងធ្វើដំណើរទស្សនកិច្ចទៅកាន់ប្រទេសមីយ៉ាន់ម៉ានាពេលដ៏ខ្លី ខាងមុខ ដែលនេះគឺជាសញ្ញាមួយផ្សេងទៀត បង្ហាញពីការពង្រឹងទំនាក់ទំនងរវាងអាមេរិក និងប្រទេសឯការដ៏យូរនេះ បើទោះជាមានការដាក់ទណ្ឌកម្មសេដ្ឋកិច្ចលើប្រទេសនេះក្តី។
ដំណើរទស្សនកិច្ចរបស់ក្រុមប្រតិភូពាណិជ្ជកម្មអាមេរិកនេះ នឹងកើតមានឡើងក្នុងពេលតិចជាងបីខែក្រោយលោកស្រី Hillary Clinton ដែលបានក្លាយជារដ្ឋមន្ត្រីការបរទេសអាមេរិកទីមួយ បានធ្វើដំណើរទស្សនកិច្ចទៅកាន់ប្រទេសមីយ៉ាន់ម៉ាជាលើកដំបូងក្នុង រយៈពេលជាង ៥០ឆ្នាំ ហើយលោកស្រី មានប្រសាសន៍ក្នុងអំឡុងពេលទស្សនកិច្ចនៅប្រទេសនេះថា រដ្ឋាភិបាលក្រុងវ៉ាស៊ីនតោន បានត្រៀមខ្លួនរួចជាស្រេចហើយ ដើម្បីគាំទ្រដល់ការធ្វើកំណែទម្រង់របស់ប្រទេសមីយ៉ាន់ម៉ា ហើយអាចនឹងលុបចោលការដាក់ទណ្ឌកម្មផ្នែកសេដ្ឋកិច្ចលើប្រទេសនេះ ទៀតផង។
ដំណើរទស្សនកិច្ចរបស់ប្រតិភូអាមេរិក ដែលគេរំពឹងថានឹងធ្វើឡើងនៅខែកុម្ភៈខាងមុខនេះ គឺជារឿងចម្លែកមួយ ដោយសារវត្តមាននៃការដាក់ទណ្ឌកម្មសេដ្ឋកិច្ចរបស់អាមេរិកមកលើ ប្រទេសនេះនៅមាននៅឡើយ។ តែដំណើរទស្សនកិច្ចនេះ នឹងធ្វើឡើងស្របពេលដែលមានកំណែទម្រង់ខ្លាំងនៅក្នុងប្រទេសអតីត អាណានិគមរបស់អង់គ្លេស ដែលសម្បូរដោយធនធានធម្មជាតិមួយនេះ ចាប់តាំងពីរបបយោធានៅប្រទេសនេះ បានឡើងកាន់កាប់អំណាចតាមរយៈការធ្វើរដ្ឋប្រហារមួយក្នុងឆ្នាំ ១៩៦២ ដែលនៅពេលនោះ ប្រទេសនេះមានឈ្មោះថា ប៊ឺម៉ា។
មេដឹកនាំក្រុមហ៊ុនពាណិជ្ជកម្មមួយរូប និងជាសមាជិកជាន់ខ្ពស់នៃសភាពាណិជ្ជកម្ម និងឧស្សាហកម្មសហព័ន្ធមីយ៉ាន់ម៉ា (MFCCI) បានបញ្ជាក់ពីដំណើរទស្សនកិច្ចរបស់ក្រុមប្រតិភូអាមេរិកនេះ តែលោកបានបដិសេធមិនបញ្ចេញអត្តសញ្ញាណ ដោយសារលោកពុំមានសិទ្ធិបញ្ចេញមតិតាមសារព័ត៌មានទេ។
ធុរជនដដែលនេះ ក៏បានឲ្យដឹងដែរថា លោក Bill Gates ដែលជាសហស្ថាបនិករបស់ក្រុមហ៊ុន Microsoft និងជាប្រធានមូលនិធិ Gates Foundation ក៏នឹងចូលរួមជាមួយនឹងក្រុមប្រតិភូនេះដែរ តែអ្នកនាំពាក្យរបស់លោក Gates នៅទីក្រុង Seattle ក្នុងរដ្ឋវ៉ាស៊ីនតោន បានបដិសេធមិនអធិប្បាយចំពោះដំណើរទស្សនកិច្ចរបស់លោក Gates ដោយលោកបានបញ្ជាក់ថា ការរាយការណ៍ពីដំណើរទស្សនកិច្ចនេះ គឺមិនពិតទេ។
អគ្គនាយកក្រុមហ៊ុនជាច្រើន ដែលភាគច្រើនមកពីតំបន់អាស៊ី បាននាំគ្នាសម្រុកចូលទៅកាន់រដ្ឋធានីពាណិជ្ជកម្មយ៉ាំងហ្គូន របស់ប្រទេសភូមាក្នុងរយៈពេលប៉ុន្មានសប្តាហ៍ចុងក្រោយនេះ ដើម្បីស្វែងរកឱកាសវិនិយោគនៅក្នុងប្រទេសដែលមានប្រជាជនចំនួន៦០ លាននាក់នេះ និងជាប្រទេសមួយនៃទីផ្សារព្រំដែនចុងក្រោយនៅតំបន់អាស៊ី។
មន្ត្រីឧស្សាហកម្មមួយរូបទៀត បានរៀបរាប់ថា អគ្គនាយកក្រុមហ៊ុនពាណិជ្ជកម្មអាមេរិក នឹងជួយសវនាការជាមួយលោកប្រធានាធិបតី ថេន សេន ទស្សនាតំបន់ទេសចរណ៍នៅក្នុងប្រទេសមីយ៉ាន់ម៉ា ព្រមទាំងចំណាយពេលវេលាជួបពិភាក្សាជាមួយប្រធានក្រុមហ៊ុន ពាណិជ្ជកម្មក្នុងស្រុក ដែលក្រុមហ៊ុនក្នុងស្រុកជាច្រើនរបស់មីយ៉ាន់ម៉ា កំពុងប្រឈមនឹងការដាក់ទណ្ឌកម្មសេដ្ឋកិច្ចពីសំណាក់រដ្ឋាភិបាល អាមេរិក។
អ្នកវិភាគវិនិយោគមួយចំនួន បានប្រៀបធៀបការអភិវឌ្ឍរបស់ប្រទេសភូមាទៅនឹងការអភិវឌ្ឍរបស់ប្រទេស វៀតណាមកាលពីឆ្នាំ១៩៩៤ នៅពេលដែលការដាក់ទណ្ឌកម្មសេដ្ឋកិច្ចរបស់រដ្ឋាភិបាលអាមេរិក ប្រឆាំងរដ្ឋាភិបាលក្រុងហាណូយ ត្រូវបានលុបចោល។ តែទីតាំងរបស់ប្រទេសភូមា ត្រូវបានចាត់ទុកថាជាទីតាំងប្រកបដោយយុទ្ធសាស្រ្ត និងងាយស្រួលជាងរវាងការបង្កើនអំណាចរបស់ប្រទេសឥណ្ឌា និងចិន ដែលមានកំពង់ផែនៅលើមហាសមុទ្រឥណ្ឌា៕ BP
0 comments:
Please add comment to express your opinion, and share it on Twitter or Facebook. Thank you in advance.