សូលីដូ តារាចម្រៀងវ័យក្មេង នៅក្នុងផលិតកម្មប៊ិកមែន បានចាប់យកទ្រនំថ្មីហើយ។ បច្ចុប្បន្នលោកកំពុងតែច្រៀងឲ្យផលិតកម្មថ្មីមួយ ដែលគ្រោងនឹងចេញលក់នៅលើផ្សារក្នុងពេលឆាប់ៗនេះ។
តារាចម្រៀងមានមុខមាត់ និងStyleយុវវ័យមិនចាញ់លោក ព្រាប សុវត្ថិ រូបនេះបានបញ្ជាក់ថា លោកទើបតែចាកចេញពីផលិតកម្មប៊ិកមែន កាលពីចុងឆ្នាំ២០១១។
មូលហេតុដែលលោកចាកចេញនោះគឺមិនមានបញ្ហាអ្វីនៅក្នុងផលិតកម្មនោះទេ គឺគ្រាន់តែចង់ផ្លាស់ប្ដូរទ្រនំថ្មីតែប៉ុណ្ណោះ។ “បាទ…!មិនមានបញ្ហាអ្វីនោះទេ ខ្ញុំនិងប្រធាននៅប៊ិកមែនរាប់អានគ្នាធម្មតា គ្រាន់តែថា ខ្ញុំចង់ប្ដូរកន្លែងថ្មីហ្នឹង ខ្ញុំ និងប៊ិកមែនមិនបានចុះកុងត្រាទេ អីចឹងខ្ញុំចង់ឈប់ពេលណាក៏បានដែរ ”។
លោកបានបង្ហើបថា ទ្រនំថ្មីដែលលោកទើបចូលច្រៀងនេះគឺជាផលិតកម្មថ្មីមួយដែលទើបតែបង្កើត។ លោកបានចុះកុងត្រាជាមួយគ្នារួចរាល់អស់ហើយ បច្ចុប្បន្នកំពុងតែថត និងគ្រោងនឹងចេញលក់នៅលើទីផ្សារឆាប់ៗខាងមុខនេះ។
វ៉ុលដំបូងនៃផលិតកម្មមួយនេះ មានបទចម្រៀងរបស់លោកចំនួន៥បទ ដែលសុទ្ធសឹងជាបទមនោសញ្ចេតនា។ លោកមិនអាចប្រាប់ពីឈ្មោះ បទចម្រៀង និងឈ្មោះផលិតកម្មបានទេ ព្រោះខាងផលិតកម្មមិនទាន់ឲ្យបញ្ចេញ។ “ខ្ញុំចុះកុងត្រាជាមួយគាត់១ឆ្នាំ ប៉ុន្តែកុំអាលទាន់ចង់ដឹងអីបង ចាំជិតពេលចេញលក់សិន ព្រោះខាងក្រុមហ៊ុនមិនទាន់ឲ្យបញ្ចេញឈ្មោះទេ”។
លោកបានដាក់សេចក្ដីសង្ឃឹមយ៉ាងខ្លាំងទៅលើទ្រនំថ្មីដែលលោកទើបតែចូលនេះ ថានឹងអាចជួយឲ្យកាន់តែល្បីមួយកម្រិតថែមទៀត ព្រោះខាងម្ចាស់ផលិតកម្មថ្មីមួយនេះបានផ្ដល់ទំនុកចិត្តដល់លោកច្រើនគួរសម។ “គាត់ផ្ដល់ទំនុកចិត្តដល់យើងច្រើនណាស់បង ទាំងថៅកែក្រុមហ៊ុន ក៏ដូចជាអ្នកដឹកនាំ និយាយទៅអាចសង្ឃឹមច្រើន”។
សូលីដូ ជាតារាចម្រៀងមួយរូបមានកំណើតនៅស្រុកត្រាំកក់ ខេត្តតាកែវ ។ លោកបានចាប់ផ្ដើមអាជីពជាតារាចម្រៀងតាំងពីឆ្នាំ ២០០០២។ កាលពីដំបូងឡើយលោកគឺជា តារាចម្រៀងនៅតាមរោងការ និង បៀរហ្គាឌិន។ ការដែលលោកចាកចេញពីនេះមិនមែនជាការប្ដូរទ្រនំលើកទី១របស់សូលីដូ នោះទេ អាចនិយាយថា ការផ្លាស់ប្ដូរទ្រនំលើកនេះ គឺទី៣របស់លោកទៅហើយ ដែលទ្រនំដំបូងរបស់លោកគឺផលិតកម្មសាន់ដេ។
លោកបានចូលច្រៀងក្នុងផលិតកម្មនេះនៅដើម ឆ្នាំ២០០៦ មកដល់ឆ្នាំ២០០៩លោកបានផ្លាស់មក ប៊ិកមែនវិញម្ដង។ នៅចុងឆ្នាំ ២០១១នេះលោកបានឈប់ពីប៊ិកមែន បែរជាមកចូលក្នុងផលិតកម្មដែលទើបនិងបង្កើតថ្មីទៅវិញ។ មិនដឹងថា ផលិតកម្មថ្មីដែលលោកចូលនេះ អាចជួយបង្កើនប្រជាប្រិយភាពរបស់លោកបន្ថែមឬយ៉ាងណានោះទេ។
អ្វីដែលធ្វើទស្សនិកជនចាប់អារម្មណ៍លោកនេះ មុខមាត់របស់លោកនិងStyle នៃការតុបតែងខ្លួនរបស់លោកគឺ មានលក្ខណៈស្រដៀងនិងតារាចម្រៀង លោក ព្រាប សុវត្ថិ ដែលធ្វើឲ្យទស្សនិកជនមួយចំនួនអាចច្រឡំថា រូបលោកគឺជាតារាចម្រៀង ព្រាប សុវត្ថិ ក៏មាន។ ចំណុចនេះហើយដែលធ្វើឲ្យលោកមានកេរ្តិ៍ឈ្មោះរហូតមកដល់សព្វថ្ងៃនេះ៕
0 comments:
Please add comment to express your opinion, and share it on Twitter or Facebook. Thank you in advance.