24hPlus

ក្រុមស្ដ្រីវ័យក្មេងមានសម្រស់ស្រស់ស្អាតមិនចាញ់បវរកញ្ញា ត្រូវបានគេជ្រើសរើសតាមបណ្ដាមហាវិទ្យាល័យនានាទូទាំងប្រទេសចិន ចូលរួមវគ្គហ្វឹកហ្វឺនដើម្បីក្លាយជាអង្គរក្សស្រីដ៏ឆ្នើមប្រចាំកោះហាយណាន ។
នៅក្នុងការជ្រើសរើសមានស្ដ្រីសាច់សហ្មត់ខៃប្រមាណ២០នាក់បានស្មគ្រចិត្ដចូលរួមវគ្គបណ្ដោះបណ្ដាលអង្គរក្សដែលធ្វើឡើងដោយក្រុមហ៊ុនប្រឹក្សាសន្ដិសុខ និងការពារពិសេស (Tianjiao) នៅតំបន់សានយ៉ា ខេត្ដហាយណាន ។
តាមក្រុមហ៊ុន Tianjiao បានឱ្យដឹងថា មានស្ដ្រី២០នាក់បានចូលរួមវគ្គហ្វឹកហ្វឺនជាលើកដំបូងនៅថ្ងៃទី២៨ មករា ជាការចាប់ផ្ដើមសម្រាប់អង្គរក្សស្រីនៅចិន ។ ក្រុមស្ដ្រីទាំងអស់នោះចាំបាច់ត្រូវតែមានកម្រិតវប្បធម៌ខ្ពស់ចាប់ពីមហាវិទ្យាល័យឡើងទៅ ។ ក្នុងលក្ខខណ្ឌនៃការជ្រើសរើសក្រុមស្ដ្រីទាំងអស់នោះត្រូវតែមានរូបសម្បត្ដិស្រស់ស្អាតជាការចាំបាច់ ។
ក្រុមអង្គរក្សស្រីទាំងអស់នោះត្រូវឆ្លងកាត់ការហ្វឹកហ្វឺនរយៈពេលពី៨ទៅ១០ខែ មុនពេលចូលបម្រើការពារដល់អតិថិជនរបស់ពួកគេ ។ ក្រុមហ៊ុន នឹងផ្ដល់ឱកាសដល់សិស្សរបស់ខ្លួនដើម្បីបង្ហាញសមត្ថភាព ហើយស្ដ្រីអង្គរក្សតែ២-៣នាក់ប៉ុណ្ណោះដែលមានសមត្ថភាពខ្ពស់ជាងគេនឹងបន្ដបញ្ជូនទៅហ្វឹកហ្វឺនបន្ថែមនៅមជ្ឈមណ្ឌលសន្ដិសុខអន្ដរជាតិក្នុងប្រទេសអ៊ីស្រាអែល ។
ក្រុមស្ដ្រីអង្គរក្សត្រូវឆ្លងកាត់ការហ្វឹកហ្វឺនយ៉ាងលំបាក ក្នុងនោះមានការវាលើវាលខ្សាច់ មុជទឹក រត់ប្រណាំង លីឈើ ដើរលើរាង្គកាយមិត្ដរួមការងារ... ហើយការហ្វឹកហ្វឺនទាំងអស់នោះសុទ្ធសឹងតែខិតខំឱ្យអស់ពីសមត្ថភាពទើបទទួលបានជោគជ័យ ។ ការហ្វឹកហ្វឺននោះមិនខុសពីទាហាននោះឡើយ មិនត្រឹមតែប៉ុណ្ណោះថែមទាំងមានច្បាប់តានតឹងទៀតផង ៕