ក្រុមបះបោរជាង ៥០នាក់ ព្រមចុះចាញ់ រដ្ឋាភិបាល អាហ្វហ្គានីស្ថាន

ទីក្រុង PUL-E-KHUMRI ៖ យោងតាមប្រភពព័ត៌មាន ពីប៉ូលិសប្រចាំតំបន់ បានឲ្យដឹង នៅថ្ងៃអាទិត្យ ទី២៩ ខែមករា ឆ្នាំ២០១២ នេះថា យោធាក្រុមបះបោរជាង ៥០នាក់ បានសុំចុះចាញ់រដ្ឋាភិបាល អាហ្វហ្គានីស្ថាន នៅភាពខាងជើងខេត្ត អាហ្គាន ជាប់ខេត្ត បាងលែន ។

យោងតាមទីភ្នាក់ងារសារព័ត៌មានចិន ស៊ិនហួ បានឲ្យដឹងថា ក្រុមយោធាប្រឆាំងរដ្ឋាភិបាល សរុបចំនួន ៥០នាក់ រាប់បញ្ចូលទាំងអគ្គមេបញ្ជាការក្រុមជាច្រើននាក់ទៀត បានបដិសេធមិនធ្វើការវាយប្រហារ និងបានចូលរួមជាមួយរដ្ឋាភិបាល នៅក្នុងខេត្ត បាងលែន កាលពីថ្ងៃសៅរ៍ ទី២៨ ខែមករា កន្លងទៅថ្មីៗនេះ ។

លោក Shirzad មេបញ្ជាការប៉ូលិសខេត្តបាងលែន បាននិយាយថា ការចុះចូលរបស់ក្រុមយោធាប្រឆាំង រដ្ឋាភិបាលទាំងនេះ នឹងធ្វើឲ្យខេត្តបាងលែន ទទួលបាន សន្តិភាពកាន់ខ្លាំងឡើង នៅថ្ងៃអនាគតជាមិនខាន ព្រោះពួកគេក៏ស្រលាញ់សន្តិភាពដែរ។ ជាមួយគ្នានេះដែរ លោកបានបន្តថា យោធាដែលមានមុខងារសំខាន់ៗជាង ១០០នាក់ ផ្សេងទៀត នៅក្រុមបះបោរតាលីបង់ ក៏បានសុំចុះចូលជាមួយរដ្ឋាភិបាលនៅក្នុងខេត្តនេះដែរ កាលពីពីរបីថ្ងៃកន្លងមកនេះ ។

គួរបញ្ជាក់ថា តាមប្រភពព័ត៌មានក្នុងតំបន់ បានឲ្យដឹងថ្មីៗនេះថា រដ្ឋាភិបាលអាហ្វហ្គានីស្ថាន និងសកម្មប្រយុទ្ធ ឥស្លាម Hezb-i- កំពុងតែធ្វើការពិភាក្សាគ្នា ក្នុងគោលដៅឈានទៅរកសន្តិភាព នៅថ្ងៃខាងមុខ ៕

Share