រថយន្ត March បង្ហាញនៅការិយាល័យកណ្តាលរបស់ក្រុមហ៊ុន។ Reuters
ក្រុងយូកូយ៉ាម៉ាៈ ក្រុមហ៊ុន Nissan Motor ដែលជាក្រុមហ៊ុនផលិតរថយន្តធំជាងគេទីពីររបស់ជប៉ុន បានវ៉ាដាច់ក្រុមហ៊ុនផលិតរថយន្តបរទេសជាច្រើន រួមមានក្រុមហ៊ុន BMW ផងដែរ កាលពីឆ្នាំ២០១១ ដើម្បីក្លាយជាក្រុមហ៊ុននាំចូលរថយន្តធំជាងគេទីពីរទៅកាន់ ទីផ្សារប្រទេសជប៉ុន។
សមាគមក្រុមហ៊ុននាំចូលរថយន្តជប៉ុន បានឲ្យដឹងក្នុងសេចក្តីថ្លែងការណ៍មួយនៅលើគេហទំព័ររបស់ខ្លួនកាល ពីថ្ងៃពុធថា ក្រុមហ៊ុន Nissan ដែលកំពុងផលិតរថយន្តធុនតូចម៉ូដែល March នៅប្រទេសថៃ ហើយនាំចូលទៅប្រទេសជប៉ុនវិញនោះ បានបង្កើនការនាំចូលរថយន្តបាន ៨៦ភាគរយ ដល់ ៥០ ២៦៩គ្រឿងកាលពីឆ្នាំ២០១១។ ក្រុមហ៊ុន Volkswagen AG ដែលមានមូលដ្ឋាននៅទីក្រុង Wolfsburg ប្រទេសអាល្លឺម៉ង់ បាននាំមុខទីផ្សារនាំចូលរថយន្តទៅកាន់ប្រទេសជប៉ុននេះ ដោយនាំចូលរថយន្តបានចំនួន ៥០ ៦៣៥គ្រឿង ពោលគឺកើនឡើង ៨,៤ភាគរយ ធៀបនឹងឆ្នាំ២០១០។
លោក Toshitake Inoshita អ្នកនាំពាក្យរបស់ក្រុមហ៊ុន Nissan ដែលមានមូលដ្ឋាននៅទីក្រុង យូកូហាម៉ា បានឲ្យដឹងតាមទូរស័ព្ទកាលពីម្សិលមិញថា៖ «កំណើននាំចូលរថយន្តរបស់ក្រុមហ៊ុន Nissan នេះ ភាគច្រើនគឺទទួលបានដោយសារការនាំចូលរថយន្តម៉ូដែល March»។
ក្រុមហ៊ុន Nissan បានផ្លាស់ប្តូរទីតាំងផលិតរថយន្តម៉ូដែល March នេះពីទីក្រុងអូប៉ាម៉ា ប្រទេសជប៉ុនទៅកាន់ប្រទេសថៃនៅខែមីនា ឆ្នាំ២០១០ ដើម្បីប៉ះប៉ូវផលប៉ះពាល់ដែលបង្កឡើងដោយកំណើនថ្លៃប្រាក់យ៉េន ដែលបានកាត់បន្ថយប្រាក់ចំណេញទទួលបានពីការនាំចេញរថយន្ត ដែលផលិតក្នុងប្រទេសជប៉ុន និងដើម្បីកាត់បន្ថយចំណាយថ្លៃដើម តាមរយៈការបោះមូលដ្ឋានផលិតកម្មឲ្យនៅជិតទីតាំងរបស់ក្រុមហ៊ុន ផ្គត់ផ្គង់។
លោក Carlos Ghosn ជាអគ្គនាយកក្រុមហ៊ុន Nissan and Renault SA មានប្រសាសន៍កាលពីខែតុលាកន្លងទៅនេះថា ក្រុមហ៊ុនផលិតរថយន្តរបស់ជប៉ុនជាច្រើន នឹងបន្តផ្លាស់ប្តូរទីតាំងផលិតកម្មទៅក្រៅប្រទេស ដោយសារកំណើនថ្លៃប្រាក់យ៉េន។
លោក Yoshiaki Kawano អ្នកវិភាគប្រចាំក្រុមហ៊ុនស្រាវជ្រាវឧស្សាហកម្មរថយន្ត IHS Automotive បានមានប្រសាសន៍តាមទូរស័ព្ទកាលពីម្សិលមិញថា៖ «កំណើនរថយន្តនៅក្នុងប្រទេសជប៉ុន ដែលផលិតដោយក្រុមហ៊ុនផលិតរថយន្តជប៉ុននៅក្រៅប្រទេស នឹងបន្តកើនឡើង»។
លោកបានបន្តថា៖ «ដោយសារកំណើនថ្លៃប្រាក់យ៉េន ការនាំចូលរថយន្តម៉ូដែលផ្សេងៗ ដូចជារថយន្តម៉ូដែល March នេះជាដើម ដែលរថយន្តទាំងនោះ ត្រូវបានកំណត់ជាគោលដៅសម្រាប់ការនាំចេញទៅកាន់តំបន់ទាំងអស់ នឹងទំនងជាកើនឡើង»៕ BP
0 comments:
Please add comment to express your opinion, and share it on Twitter or Facebook. Thank you in advance.