លី ច័ន្ទសីហា ស្រពាប់ស្រពោន បន្ទាប់ពីចំណងស្នេហ៍លើកដំបូងរបស់នាង បានដល់ទីបញ្ចប់ ក្រោយដុះដាលតែ៣ខែ កាលពីអំឡុងចុងឆ្នាំ២០០៩ និងដើម ២០១០ ជាពេលដែលនាង បាត់បង់ភាពមមាញឹកក្នុងសិល្បៈដូចមុន។ ប៉ុន្តែទើបតែពេលនេះ មានព័ត៌មានថា នាងជួប អព្ហូតហេតុស្នេហ៍…។
ក្រោយពីខកខានមង្គលការ ជាមួយអតីតគូដណ្តឹង ដែលគ្រោងចូលរោងជ័យ កាលពីដើមឆ្នាំ២០១០នោះ តារាសម្តែង អតីតជាតួកុមារីពូកែបង្ហូរទឹកភ្នែក ក្នុងរឿង”កត្តញ្ញូ” លី ច័ន្ទសីហា ត្រូវបានគេសម្គាល់ឃើញថា ហាក់មិនមានសកម្មភាពក្នុងសិល្បៈសោះតាំងនោះមក រហូតដល់ទស្សនិកជនចង់ភ្លេចមុខ ខណៈសាម៉ីខ្លួន ក៏យល់ដូច្នេះ។
ចំណុចនេះ មហាជនកាត់ស្មានថា ព្រោះតែនាងអាម៉ាស់នឹងបរាជ័យស្នេហ៍ដំបូង ទើបសម្ងំលាក់ខ្លួនបែបនេះ។ខុសពីការកាត់ស្មាននោះ សាម៉ីខ្លួន អះអាងថា ផ្តោតលើជំនួញសំអាងការរបស់នាង ដែលបើកកាលពីពាក់កណ្តាល ឆ្នាំ២០១១ នោះជាមូលហេតុធំ។ លី ច័ន្ទសីហា និយាយថា “ខ្ញុំបាត់មុខមួយរយៈ ព្រោះតែនាងខ្ញុំរវល់ ផ្តោតអារម្មណ៍ខ្លាំងលើមុខរបរសំអាងការ ដែលទើបបើកថ្មី”។
សីហា បន្តថា” ក្នុងអំឡុងពេលនោះ មានគេទាក់ទងឲ្យចេញសម្តែងខ្លះៗដែរ តែដូចប្រាប់អីចឹង ហាងទើបបើកថ្មីៗ មិនអាចព្រលែងដៃចោលតាំងពីដំបូងនោះទេ ទើបសុខចិត្តបាត់មុខរហូតដល់គេចង់ភ្លេចមុខបែបនេះ”។
តារាសម្តែង លី ច័ន្ទសីហា ត្រូវបានអ្នកនិយមតាមដានសិល្បៈចាត់ចូលក្នុងជំពូកតារា ដែលមិនសូវមានរឿងអាស្រូវស្នេហាឡើយ ដោយក្នុងនោះ បើទោះជាធ្លាប់បរាជ័យក្នុងផ្លូវស្នេហាក៏ដោយ តែនោះ ក៏ជាស្នេហាលើកដំបូងដែរ ដែលនាងបានពើបប្រទះ ក្នុងដំណើរប្រឡូកសិល្បៈតាំងពីវ័យ១១ឆ្នាំមកនេះ។
ហើយក្នុងពេលបាត់មុខនោះទៀតសោត ក៏គេមិនដែលឮថា កញ្ញា មានទំនាក់ទំនងលាក់មុខនឹងនរណាម្នាក់ដែរ។ ទើបតែថ្មីៗនេះ មានព័ត៌មានថា តារាស្រីដែលមានវ័យទើបតែ២០ឆ្នាំគត់នេះ មានសំរឹបស្នេហ៍រត់មករកជាថ្មីហើយ ហើយជាចំណងស្នេហ៍ដ៏មិននឹកស្មានដល់មួយ។
ឆ្លើយតបនឹងព័ត៌មាននេះ កញ្ញា លី ច័ន្ទសីហា អះអាងថា នាងមិនមានស្នេហាអីទេ ថែមទាំងមិនទាន់ចង់គិតទៀត។
សីហា ប្រាប់ Sabay ដូច្នេះថា” នាងខ្ញុំគ្មានរឿងដូចគេនិយាយនោះទេ តែព័ត៌មាននេះ ប្រហែលជាកើតឡើងដោយសារនាងខ្ញុំ កំពុងត្រៀមថតរឿងដំបូងមួយក្នុងឆ្នាំ២០១២នេះ ឲ្យផលិតកម្ម មហាហង្ស មានចំណងជើងថា”អព្ហូតហេតុស្នេហ៍”ប៉ុណ្ណោះ”។
សីហា បាន អធិប្បាយបន្តថា រឿងនេះ នាងមិនទាន់ដឹងច្បាស់ថា តួដែលគេគ្រោងឲ្យសម្តែងនេះ មានឈ្មោះអីទេ គ្រាន់តែដឹងថា ជាតួស្រីមានចរឹតម៉ឺងម៉ាត់ម្នាក់ ហើយរឿងនេះ នឹងចាប់ផ្តើមថតក្នុងឆាប់ៗនេះ។ តារាស្រីវ័យក្មេង ដែលសុខចិត្តទាត់ចោល សកម្មភាពក្នុងសិល្បៈមួយរយៈ ដើម្បីពង្រឹងជំនួញសំអាងការរូបនេះ បញ្ជាក់ថា រឿងស្នេហា គ្មាននរណាគេចរួចទេ តែសម្រាប់នាង ប្រហែលជាអាច ៤ឬ៥ឆ្នាំទៀត៕
0 comments:
Please add comment to express your opinion, and share it on Twitter or Facebook. Thank you in advance.