24hPlus

នៅពេលល្ងាចគេតែងឃើញមានគេដាក់លក់ មាត់ដុតដែលជាអាហារពេលយប់ ទទួលបានការពេញនិយមខ្លាំងពេលបច្ចុប្បន្ននេះ។ តើវាមានរសជាតិបែបណា ទើបទទួលបានការពេញនិយមបែបនេះ?

អ្នកលក់មាន់អាំងនៅផ្សារញ៉ែជិតស្តុបដេអិន សម្បុរកូនកាត់ចិន លោក ស្រ៊ុន ហួត បាននិយាយថា មាន់អាំងរបស់លោកពិតជាមាន់អាំងលាបទឹកឃ្មុំ ប្រាកដមែន ទោះបីទឹកឃ្មុំថ្លៃបន្តិចក៏ដោយ។ អ្នកលក់ម្នាក់នេះបានបន្តថា គាត់លក់នៅទីនេះជិត ៨ឆ្នាំហើយ មានម៉ូយច្រើនណាស់ដែរ ចំណែកឯវិធីអាំងវិញ គាត់ប្រើម៉ាស៊ីនដុតបង្វិលដោយស្វ័យប្រវត្តិតែម្ដង។

លោក ស៊្រុន ហួតនិយាយពីការលក់ដាច់របស់គាត់ថា ”ពីមុនមួយថ្ងៃខ្ញុំលក់អស់មាន់១០០ក្បាល តែឥឡូវ៥០ក្បាលនឹងតែម្ដង១ថ្ងៃ ដោយសារតែមានម៉ូយស្រាប់…មានអ្នកខ្លះទិញម្ដង៥ឯណោះ”។

ឈរចាំទិញមាន់អាំង អ្នកមីងលឹម ឡាង បានឲ្យដឹងថា គាត់តែងទិញមាន់អាំង១ក្បាលក្នុងមួយថ្ងៃ ព្រោះមានគ្នាតែពីនាក់ ម្ដាយ និងកូន។ អ្នកមីងបាននិយាយដូច្នេះថា “មានតែ២នាក់កូន មាន់មួយនឹងសល់ផង…មាន់អាំងទឹកឃ្មុំឆ្ងាញ់មែនទែន”។

មិនខុសពីអ្នកលក់ខាងលើ យុវជន អ៊ុងចំរើន អ្នកលក់មាន់ដុតនៅស្តុបឧកញ៉ាទេពផន បានអះអាងថា “ខ្ញុំលក់មាន់ដុតនៅទីនេះ៧ឆ្នាំហើយ ក្នុង១ថ្ងៃលក់បាន៣០ ទៅ៤០ក្បាលឯណោះ ភាគច្រើនអតិថិជនរបស់ខ្ញុំ មកពីគ្រប់កន្លែងក្នុងរាជធានីភ្នំពេញ”។

ដៃខាងប្រែមាន់ និងដៃម្ខាងទៀត កាន់ដង្កៀបចាប់ធ្យូងចេញបាន និយាយពីរូបមន្តថា “គ្មានអ្វីពិសេសទេ មាន់លាយគ្រឿងធម្មតា និងដាក់អាំងតែប៉ុណ្ណោះ”។ ប្អូនប្រុសវិចិត្រ កំពុងទិញមាន់អាំងនៅស្តុបទេពផន បាននិយាយថា “យូរៗទិញម្ដងព្រោះមាន់នេះ ក៏មានតម្លៃថ្លៃគួរសមដែរ…”។